Zeremii 47 - LAWA A BOO SONBORE

Lawa a boo Filisiti minin wɔ paǹ li

¹ Dɛnaa Lawa boo da Lawa a boo gii-dali Zeremii ni, Filisiti minin wɔ paǹ li. A bɛ́ n zɛnɛɛ, bɛ̀ Eziptin kii tɔn yoo Gaazaa gialaa wa.

² Dɛnaa Lawa boo mɛn da á ke: Mu gole n boe gɔsɛ a lɛ̀gɔn la die. Á mu zii baa, á pã á toɛ̃. Á n kɔ gána lɛ tumaa lɛ, màn mɛn tumaa bɛ́ a nɛ, a kiwin ni ka a minin ni. Minin man gú diɛ, gána lɛ a min tumaa n gɛ̀ loe loe.

³ Sùin gòã wuu n boe, ziabaa ǹ wotoron wuu n boe, Ǹ gòã wuu n nyɛ́ɛ diɛ. Díin foo ziziɛ̃, ǹ ba giɛ ǹ nɛnyaanan walan doo wa.

⁴ A giala, Filisiti minin sii tumaa ziziɛ̃ lɛawaa nɛ. Min mɛn tumaa bɛ́ re n doe Tiiri laanka Sidɔn kiwi lɛ, maǹ die bɛn ziziɛ̃. Filisiti minin li, Dɛnaa Lawa n màn tumaa ziziɛ̃, ka min mɛnɛn yii goã koo mu a bǎã da bii wole Krɛti ni.

⁵ Gaazaa kiwi, minin mìi n kɔɔ̃ nɛ, maǹ gɛ̀ koɛ. Asikalɔn kiwi, min tumaa nə́ n lɛ tã. Kasɛn kɛn giã-n nyankɔrɔ lɛ kɛ nɛ, ka ǹ die ka gɔ̀nɔn tɔtoɛ̃ yǎa biĩ kəni?

⁶ Ka n pii: «E! Dɛnaa Lawa a gɔya sa, yǎa biĩ kəni n tɔ nə n susui? N dɔ n kii ni, n giã kiĩni, n nyan sii kɔn zɛnaa doo wa.»

⁷ Sɛnɛ, bɛa gɔya sa lɛn siɛ lɔn a n susu. Dɛnaa Lawa na á dí kɔ la, mà a wo yǎa Asikalɔn, yǎa yìsi mu lɛ-a. A dí mɛn kɔ la, bɛ n ka kɛ nɛ.