Yiriwoorobaa 51 - LAWA A BOO SONBORE

Zɔɔ-da ǹ loe

¹ Man die zɔɔ diɛ n nɛ, Dɛnaa Kii, ma n tɔ bɔ, Lawa, ma kirisibaali, man zɔɔ diɛ n tɔ nɛ.

² A giala, ma nə́ n goã masɛ a tamaali wole lɛa, n nə́ n doe ma lɛ, n ma gɔ̀nɔn kirisibaa bɔ̀nbaa ganaa, lɛwɔn baraa a kan ganaa, lɛ gɔ́ɔ̃ mɛn bɛ́ boe soɛ-bɔ la minin yɔrɔ-a, ǹ mɛnɛn nə ma lɛnpɛnɛ, n goã maa dɔmalɛ-wɔle lɛa, n ma kirisibaa.

³ N makara-doɛ̃ a golebaa ka n tɔ a golebaa nɛ, sɔn dɔ ma-a wolen mɛnɛn nə n yɔrɔ bɔ, ǹ nə́ giɛ maa sɔ̃ ǹ gɔn li, min mɛnɛn bɛ́ giɛ mà ǹ ma nyin bɔ, n ma gɔsɛ ǹ gɔn ka sii damatan kɛ nɛ, ǹ nə́ ma yɛ.

⁴ Tɛ kɛ nɛ ma lɛnpɛnɛ, má n ma a piɛ̃ sii doɛ̃ wa, tɛ bii, má n ma tɛ mɛn da wa,

⁵ geren piɛ zuzulu kɛ nɛ, lɛwɔn gɔ̀dɛnaa kɛ nɛ ka soɛ boon ne.

⁶ Biɛ-kɔ ǹ lɛwɔn kɔkɔrɔ kie kii genli, ma telenboen kunu kɔ gɛ̀ ganaa foɛɛ̃ nɛ, ma nyin gisĩ á woo golee geren piɛ a kiɛnlɛ-a.

⁷ Ǹ nə́ ma lɛnpɛnɛ paǹ tumaa li, min kɔ́n ba n doe ma lɛ wa, má ga ka ma yii ni, min mɛn bɛ́ re die maa gú ganaa, min kɔ́n.

⁸ Ma yiri daa ka n makara-doɛ̃ kɛ-n kəni Dɛnaa, ka nə n sii-zɛnaan kɛn nɛ, biikoo yii tumaa waáraa, man doɛ̃ máa min mɛnɛn yii bɛ́ n la, n tá ǹ kirisibiɛ, n tá ǹ kanbiɛ ǹ zɔ́ɔn ganaa.

⁹ Má maa Lawa-nyankɔ saa tán má dia n la lon, má n gòã kũ máa n ma si gɛ̀ la.

¹⁰ Má Dɛnaa bíi wɔ, maa Dɛnaa a díi: «N nyan nə n la bɔ ma-a damagɔ́ɔ̃li pinaa wa. Din-koalin biikoo li, ka la bɔ ma-a nɛ.

¹¹ Ma á re n tɔ guguru koe, ma wo-n nyɛɛnɛ, man die loe loe n ne, bǐɛ̃-doɛ̃ gɔ́ɔ̃ nɛ.» Maa nyankɔ lɛ si,

¹² n ma kirisibaa papaã ganaa, n ma kanbaa baraa waáraa ganaa. Bɛ lɛ nɛ, ma á zoɛ̃ máa ma zɔɔ da n nɛ, man tɔ bɔ, man die Dɛnaa laakalɛɛ.

Ga yiriwoorobaa li ka n foo tumaa nɛ

¹³ Maa tenmaa waáraa, bɛ̀ ma tɔn maa zii-tɔn kɛn wɔ wa, má ga yiriwoorobaa li foaã nɛ maa Lawa-nyankɔ gɔ́ɔ̃ nɛ.

¹⁴ Lawa a kion a kiɛnlɛ-a goã kɔɔ̃n ma ganaa, a wo kaa maa lɛawaa giala-nyɔmɔɔ lɛ, ma á re a kialan lui.

¹⁵ A tenmaa waáraa, ka rɛzɛ̃ nɛ bɛ́ miɛ̃ lɔn, maa foo kɔɔ̃nbaa n doe a din ganaa, ma gòã tɔ wɔ zii pepere la, a kũ maa tenmaa waáraa ganaa, má ga li.

¹⁶ Man too da boɛɛn nɛ lɔn gɔrɔ, má yiriwoorobaa yɛ, má daraa gigiã yɛ.

¹⁷ A din pàã ganaa, màn mɛ maa wo-nyɛɛn li, min mɛn yiriwoorobaa kɔ ma la, man die a tɔ gole koe.

¹⁸ A giala, má golee li, máa man die dí nyɛɛ nɛ, ma ga bǐɛ̃ li taãn-taãnɛ, sìi a re ma kuĩ wa.

¹⁹ Ma telenboen yɔ bɔ á tɔn yɛ, má goã n yii dɔrɛɛ dí-pɛn lɛ-sii li, má n gɔnɔn nyoã, má ǹ dia lon, maa sii-doɛ̃baã busu ma ganaa.

²⁰ Má ma telenboen yɔrɔ dia n din la, má woo yǎa yoreenbaa gɔ́ɔ̃ nɛ, má yiri yɛ kun asɛ nɛ, a giala-kɔ waáraa, bɛ lɛ nɛ, n ba re ma daɛ ǹ kɔn pinaa wa.

²¹ Ma gɔ́ɔ̃ nə́ n lɔlɔkɔn bɛ̀ ma bɛ́ giɛ li, bɛ lɛ na á toa má màn sonbore yɛ.

²² Dɛnaa lɛwɔn kɔ ma la saraa lɛa, man die a guguru koe ka bɛ lɛ nɛ.

²³ Ka n mɔrɔ masɛ ganaa, doɛ̃baã wolen lɛn, ka kaa kalaasi ni.

²⁴ Wàa na á baa ka á n dinin biɛ màn wɛɛnaan lɛa, bɛ̀ a boro tá ka bɔlɔ yala ganaa parsiini?

²⁵ Má n lɛ bũ ma á boo diɛ, ka pii, ka n kaa wɔrɔ boe wa,

²⁶ ka n wìi da zǔu giulun ka telenboenən nə doɛ̃ wɔ, a tan kunu ka genli.

²⁷ Ka ga-a ka ka yiin ni, ma nɔmaa taãn wɔ wa, má susui gigiã yɛ.

²⁸ Ka doɛ̃ lɛ pii ka wɔrɔ gigiã nɛ, a din pàã ganaa, ka á re sana gigiã yii.

²⁹ Ka telenboen die a na a foo kɔɔ̃n yɛ Dɛnaa a makara-doɛ̃ gɔ́ɔ̃ nɛ, ka nyan sìi kɔ ka a gugurukɔ-n wa.

³⁰ Ka kaa siin zɛnaa bɛ̀ biikoo ná a tɔn dɔ wa, bɛ̀ a lɛawaa dɔ, á re kaa saraa koe ka la. Siraa a nɛgiĩ Yezu a yiriwoorobaa ǹ boo ne.