Yiriwoorobaa 49 - LAWA A BOO SONBORE

Zoziasi

¹ Yiri gisĩ Zoziasi tɔ nɛ, a n goon ka màn gìĩ kɔɔ̃n gigiã nɛ, màn gìĩ kɔɔ̃n zɛnaali lɔlɔkɔn á zɛnaa ka a parsii ni, a n ka zoo nyɔɔ bɛ́ lɔn kɔɔ̃n lɛ gɔ́ɔ̃ tumaa nɛ, ka sàn-kɔ ǹ mànan wuu bɛ́ lɔn, zɔ́n màn-bii ǹ bǎã nɛ.

² A dinmaa zii sonbore saa, zaman diɛ gɔ́ɔ̃-binyəə ganaa, á lawadoɛ̃baã bɔnɛɛ kɛ loo.

³ Á n foo dia Dɛnaa la, lawadoɛ̃baã lɛawaan li, á pàã kɔ Lawa-narɛɛ la.

KIIN ka Lawa a boo gii-dali giala-nyɔmɔɔ

⁴ Bɛ̀ á n bɔ Davida nɛ, Ezekiasi ni ka Zoziasi ni, ǹ tumaa màn da Dɛnaa lɛ-tii li, ǹ nə́ n dɔ̀ɔ̃ wɔ Lon sɔsɔɔ a dí-pɛn nɛ. Zudaa, n kiin nə́ papaã.

⁵ A giala, ǹ nə́ ǹ kakabaa kɔ min kɔsɔn la ǹ tɔ golebaa gána tii wɔ baa.

⁶ Kiwi sonbore kie ǹ nə́ n koa, zɔ́ɔn nə́ tɛ da bɛ ganaa, ǹ ná a ziin baa foaã nɛ,

⁷ ka Zeremii a boo pɛ lɔn. A giala mà ǹ nə́ fuu nyaa nɛ, asɛ mɛn bɛ́, ǹ nə́ bɔ ǹ nə́ koa Lawa a boo gii-dali lɛa, bɛ̀ á tɔn nə ǹ dan gɔ́ɔ̃ nɛ, mà a woɛ̃, a wuru, mà a baa kɛbɔlɔ lɛa sɛnɛ, mà a dɔ, a zumu.

Ezekieli

⁸ Ezekieli ná a tɔ golebaa ǹ sii-nyaa yɛ, Lawa nyaa nɛ lon màn yiikoonaan wotoro la,

⁹ a yiri gisĩ zɔ́ɔn kɛn nɛ la gòã li, min mɛnɛn bɛ́ koe zii pepere lɛ, á bǐɛ̃ zɛnaa bɛn manɛ.

¹⁰ Lawa a boo gii-dali fulupaan kɛn sɛn, ǹ wen nə́ die buu koe yala-n, a giala mà ǹ nə́ Zakɔba foo waa ǹ nə́ wusoo ǹ nə́ pii doo, goleemali ka yii-diɛ gɔ́ɔ̃ nɛ.

Zorobabeli ka Zozoe

¹¹ Zorobabeli a don nə n pii lɔn? A n ka gɔn bǎã da sɛ́wɔ la ǹ màn bɛ́ lɔn gusin ni.

¹² A din yii goon ne ka Yosedɛki a nɛgiĩ Zozoe ne, ǹsɛn mɛnɛn bɛ́, ǹ biikoo li, ǹ nə́ Lawa a kion kɛ dɔ, ǹ nə́ toa zaman sonbore tɔ wɔ Dɛnaa ganaa, tɔ golebaa nə ǹ wɔ lɛa miɛ̃ yǎa duduu.

Nehemii

¹³ Nehemii a yiri gisĩ ma nɛ ǹ sii á gole, asɛ mɛn kungɔn kaa wolen goa á ǹ kaa lon, á kiɛnlɛn wɔ lɛ goo nɛn nə́ ǹ ganaa, á waa ǹ kionən kaa lon.

Yɔrɔ pɛ gogoon

¹⁴ Min ba tán la ǹ nə́ zɛnaa á zɛnɛkɔnlɛ ka Enɔɔki-n wa, Lawa ná a din saa tán la á woo-n lon.

¹⁵ Min kɔ́n tɔn yɛ kanaa, á yɛ ka Zozɛfu bɛ́ lɔn wa, ǹ dɔɔ̃nɔn kiã lɛa, a zaman a dɔmalɛ-wɔle lɛa, ǹ ná a wen waa.

¹⁶ Sɛmu ka Sɛɛti tɔ golebaa yɛ minbuiinin bii, sɛnɛ, màn yiikoonaa mɛn tumaa nə n zɛnaa, Aadã la ǹ tumaa nɛ.