Yiriwoorobaa 48 - LAWA A BOO SONBORE

Yilii

¹ Lawa a boo gii-dali Yilii yoo ka tɛ bɛ́ lɔn, a boo na á goã kuĩ ka bólon bɛ́ lɔn.

² A din na á bòo da ǹ ganaa a là kaa sii-a gɔ́ɔ̃ nɛ, á ǹ dɛ.

³ Ka Dɛnaa a boo ne, á lon lɛ tã, a gunyin sɔɔ tɛ gisĩ tán, boe lon.

⁴ N tɔ golebaa yɛ Yilii, n sii dadara zɛnaan gɔ́ɔ̃ nɛ, die-n boe la a din-koa gɔ́ɔ̃ nɛ, a n zɔɔ̃ n ganaa?

⁵ Nsɛ mɛn bɛ́ n min gɔsɛ gɛ̀ gɔn ka tɛ gole ne, ka Lon sɔsɔɔ a boo ne.

⁶ Nsɛ mɛn bɛ́ n kiin kaa papaã li, n tɔ golebaa wolen gisĩ n nə́ ǹ bɔ ǹ pàã la.

⁷ Á sɛ̀ pɛ ma-a ma Sinayii kele la, Orɛbu kele la, gɔn-waa ǹ boo ka gɛ̀ dòo-bɔ nɛ,

⁸ á nyɔɔ sonbore lɔ kiin ganaa, gɛ̀ dòo-bɔlen lɛa, Lawa a boo gii-dalin mɛnɛn bɛ́ die n bǎã siɛ,

⁹ n woo kurun kurun tɛ bii ka ziabaa ǹ wotoro ne, a sùin nə́ tɛ lɛa.

¹⁰ Nsɛ Yilii mɛn bɛ́ Lawa nə́ n nyaa biɛ̃ ǹ sii a daa lɛa, mà n Lawa a foo-yoo waa, a ná a tɔn baraa kɔ wa, n díin foo-kũ da n nɛ, nɛnyaanan li, n wusoo n Zakɔba a tanlɛ koa.

¹¹ Min mɛnɛn bɛ́ re n yii, gɛrɛsiɛdɛnan man ka bɛn nɛ, ka min mɛnɛn bɛ́ ǹ nə́ nyuù wɔ Lawa a kɔn-narɛɛ gɔ́ɔ̃ nɛ, a giala, yiitákoobaa n die goɛ̃ wɔ dɔn gɔn.

Yilize

¹² Yilii lɛ n ka kɛ nɛ ǹ nə́ kurun kurun pɛnɛ a ganaa, Yilize pã ka a yiri ni, a yiitákoobaa waáraa, kii kɔ́n boo la á bìn da a ganaa wa, min kɔ́n boo la á da a pàã giulun wa.

¹³ Sii kɔ́n ba kaka a ganaa wa, haalɛ a gɛ̀ gɔ́ɔ̃ nɛ, a gere Lawa a boo gii da.

¹⁴ A yiitákoobaa waáraa, á sii dadaran zɛnaa, a gɛ̀ gɔ́ɔ̃ nɛ, a sii-zɛnaan nə́ goã kaãbaa diɛ.

Bɔlɔgoondɛnaabaa baã ka dɔlɔ

¹⁵ Bɛ din tumaa kio, zaman lɛ nə n gɔ́ɔ̃ binyəə wa, a wusoo a sii baraan kio wa, yǎa ǹ nə́ daa ǹ goa ǹ nə́ woo ǹ ne sɔsɔɔ ǹ gána ganaa, ǹ nə́ ǹ sasawaa tán tumaa la,

¹⁶ zaman boɛɛn dinsɔɔ̃ na á goã, ǹ ba tɛ wa, ka kiã nɛ, boe Davida a kion. Ǹ bii, ǹ tɛnɛn nə́ bǐɛ̃ zɛnaa, ǹ lɛkunun dɔn nə́ màn da ǹ siɛ̃n li.

Ezekiasi

¹⁷ Ezekiasi kungɔn dɔ á ná a kiwi lɛnpɛnɛ nɛ, á mu baã á daa nɛ a sumu-n, á gɛ̀fu fɔ̃ ka fɔlɔ nɛ, á mu dɔǹɔn dɔ.

¹⁸ A biikoo li, Senankeribu yoo á zia biɛ, á Rabsakɛsi dia á woo, á n gɔn saa lon Siɔn li, a din-koa babaraa lɛ gɔ́ɔ̃ nɛ.

¹⁹ Ǹ foo ka ǹ gɔ̀nɔn nə́ bìn da, ǹ là daa paparɛ ka lɔ nɔɔrɔ-kɔle bɛ́ lɔn.

²⁰ Ǹ nə́ n lɛ dɛ Dɛnaa makara-dɔ̃li ganaa, ǹ gɔnɔn nə́ dia-n la. Dɛnaa sonbore nə́ n toa lon, á n nanaa, á n too kɔ ǹ lon, á ǹ kirisibaa ka Izayii gɔn nɛ.

²¹ Á Asiirii minin giã ǹ bǎã lɛ yu, a lon a dia dí-a wole nə́ ǹ lɛ naa.

Izayii

²² A giala, sii mɛn bɛ́ kɔɔ̃n Dɛnaa ganaa, Ezekiasi bɛ zɛnaa. Á n din nyaa kaka, á kɔ ǹ di Davida lɛ ka Lawa a boo gii-dali Izayii bɛ́ á pɛ lɔn, min gole bɔlɔgoondɛnaa lɛa, sii-nyaan gɔ́ɔ̃ nɛ.

²³ A biikoo li, wasa wusoo a kio ne, á màn da kii a nyin sasabaa li.

²⁴ A ná a biikoo giala-nyɔmɔɔn yɛ ka yiri fu pàã nɛ. Á Siɔn a foo-ziziɛ̃ wɔlen foo waa,

²⁵ á biɛ̃ ǹ siin nyaa gigiã, dan ná a ba la wa, á sii-duriin nyaa bɛ̀ ǹ biikoo ná a tɔn dɔ wa.