Yiriwoorobaa 47 - LAWA A BOO SONBORE

Natan

¹ Asɛ kio na á n baa Natan a yoo lɛa, á Lawa a boo gii dalibaa ǹ dí nya Davida a biikoo li.

Davida

² Ka ǹ bɛ́ tɔɔ nyɔɔ boe lɔn, din kaa kun ka Lawa nɛ ǹ wúlu a lɛa, Davida na á n bɔ Izirayeli minin bii miɛ̃.

³ Á sàn kɔ ka yàra nɛ, ka bòe nɛ wɔ bɛ́ lɔn, ka don màn baraa nɛ, ka sère nɛ wɔ bɛ́ lɔn.

⁴ A tenmaa waáraa, á min gegere dɛ, á zaman a sìi toɛ̃ nɛ, a kɔlɔ da a baragii ni á zũ ni, á Goliati a din-narɛ papaã nɛ wa?

⁵ A giala, á Dɛnaa Lon sɔsɔɔ bii wɔ, á pàã wɔ a gusin ni mà a zia-baali kaka dɛ a gã, a na a zaman a kakabaa mìi saa lon.

⁶ Bɛ lɛ nɛ, ǹ ná a tɔ bɔ ka duu fù (10.000) ni, ǹ ná a tɔ laakalɛɛ. Dɛnaa a barka gɔ́ɔ̃ nɛ, ǹ nə́ tɔ golebaa koe la kii bafolo lɛa.

⁷ Zɔ́ɔn mɛnɛn bɛ́ ǹ lɛnpɛnɛ, á bɛn bɔ̀n baa, á ná a zia baa kɔn wolen Filisiti minin kɛn yɔyɔrɛ, duduu wɔ lɛa, á ǹ kakabaa yɔyɔrɛ.

⁸ A sii-zɛnaa din tumaa nɛ, a n Lon sɔsɔɔ sonbore guguru koe ka tɔ gole kɔ ǹ boo ne, a n loe loe ka a foo tumaa nɛ, a ná a kɔn-narɛɛ nyɛɛ a Zɛnaali wole ne.

⁹ Wúlu bɔ ǹ bǎã yɔrɔ-a, á loe-lɔlen koa, mà ǹ boo la ǹ loe kɔɔ̃n kɔɔ̃n lɔ.

¹⁰ Á siĩnbaa kɔ zɔ́nɔn la, á toa zɔ́nɔn tá yɔrɔ yii taãn-taãnɛ, a nə ǹ kiɛ Dɛnaa tɔ sonbore kɛ guguru koe ganaa, a n toɛ sàn kɔ ǹ mànan wuu á boe Lawa a kion baayɛlɛ yiisoo.

¹¹ Dɛnaa ná a sãn tuturu, a na a pàã gole koe biikoo yii li, á kiibaa ǹ lɛ kɔ kɔn la wɔ nɛ, tɔ golebaa ǹ kii dankan nə Izirayeli.

Salomɔn

¹² Nɛgiĩ doɛ̃-wɔle á re n bǎã siɛ n din pàã ganaa, á re goɛ̃ ka foo kɔɔ̃n nɛ.

¹³ Salomɔn ná a kiibaa zɛnaa là nyantoro biikoo ne, á susui kɔ la, á ná a lɛnpɛnɛ nɛ, n giɛ á kion doe asɛ tɔ wɔ lɛa, a Lawa a kion yɔrɔ bɔ duduu wɔ lɛa.

¹⁴ N bɛ́ n goã sii doɛ̃ n tenmaa waáraa, piɛ̃nɛ ka yiri ni ka kɔ̀ wɔ bɛ́ lɔn.

¹⁵ N yiri nə́ n kɔ tán lɛ, n pã ka giməə ne ka suusu ni.

¹⁶ N tɔ bɔ á woo dɔ tánan kɛn nɛ sɔɔsɔɔsɔɔ mu bii, ǹ nə́ n narɛ n là nyantoro gɔ́ɔ̃ nɛ.

¹⁷ N loen ne, n suusun ni, n kiri-kuriin ni, ka n boo lɛ siin ni, ǹ nə́ kaa min tumaa foo la kanaa gɔ́ɔ̃ nɛ.

¹⁸ Ka Dɛnaa Lawa tɔ nɛ, ǹ bɛ́ ǹ mɛn lɛ bíi Izirayeli a Lawa, n sana sɔkɔn ka letɛ̃ bɛ́ lɔn, n wɔrɔ sɔkɔn ka pɔlɔn bɛ́ lɔn.

¹⁹ N nə́ n gɔ̀nɔn kɔ lɔn la, n nə́ n foo siin bɛ̀rɛ baa.

²⁰ N gɔ̀ da n tɔ golebaa kɛ ganaa, n nə́ n tɔrɔ zaãbaa, ka n daa n Lawa a foo-yoo bíi, n kɔ n nɛnyaanan la, ka foo-busii gole ne, n gàãn kɛa lɛa.

²¹ Kiibaa lɛ nə́ n talakɔn wɔlɔ paa, gána gòãn dii wole bɔ Efrayimu ni.

²² Sɛnɛ, Dɛnaa ba wusii a makara-doɛ̃ kɛ kio wa, a ba a boo kɔ́n sàabiɛ wa, a na a bɔ a koa wolen nu ka kiodɛnan nɛ wa, a ba a narɛɛ-wolen kiodɛnan papaɛ̃ wa, bɛ lɛ nɛ, á gialakun kɔ Zakɔba la, á goon kɔ Davida la, boe a din ni.

Roboamu

²³ Salomɔn nə́ n susu kun ka ǹ din ni, á min toa a kio a din tɔrɔ lɛa, zaman tumaa a gàãnaa, yiri ba a lon wa. Roboamu na á zaman lɛ da gòãn-dii ganaa.

Zeroboamu

²⁴ Nebati a nɛgiĩ Zeroboamu sɛ, a din na á Izirayeli da sii baraa nɛ, á Efrayimu daraa baraa zɛnaa ǹ zii ganaa, a kũ bɛ ganaa, ǹ sii baraan nə́ mɔnaa á la yii ni, á woo ǹ ne bǎã kɔsɔ nɛ, sɔsɔɔ ǹ gána ganaa.

²⁵ Á tɔ́n nə n baa ǹ dɔlɔ bɔ ma-a lɛa.