Yiriwoorobaa 46 - LAWA A BOO SONBORE

Zozoe

¹ Nunu a nɛgiĩ Zozoe, kaka zia la. Muizu a bǎã-saali ni, Lawa a boo gii dalibaa ǹ dí paǹ li, asɛ mɛn bɛ́ á kɔnbɔ ka a tɔ nɛ á n din nyaa ka golebaa nɛ, mà a Dɛnaa a bɔ a koa-wɔlen nyin si a dɔlɔ bɔ zɔ́ɔ gòãn dii wolen ganaa, a Izirayeli koa a gána nɛ.

² Á goã tɔ goledɛnaa lɛa bɛ̀ a bɛ́ n nyàan goɛ lon, a n gɔyaa sa pepere kiwin li!

³ A nyɛɛnɛ, giĩ mɛn nɛ á n parsii bɔ ka a bɛ́ lɔn? A dinmaa na á Dɛnaa a ziabaan nyɛɛnaan bɔ.

⁴ A din a boo-diɛ bie á wasa kũ á golee ne, lɛawaa goon toto nə́ n bɔyaa á n baa paa wa?

⁵ Á Lon sɔsɔɔ nyankɔ, pàãyiidɛnaa, bɛ á koe bɛ̀ zɔ́ɔn lɛn ma na a gialaa paǹ yii li, Dɛnaa gole ná a nyankɔ si á la giin zũ tán, pàã gole nə́ ǹ lon.

⁶ Á n mìi fɔ̃ zɔ́ɔn gána lɛ ganaa á na a zɔ́ɔn lɛn nɛsɛ̃ tenten baã zuməə ǹ bǎã nɛ, á na a ziabaa ǹ mànan pàã nyaa tɔrɔn manɛ, mà a n zia biɛ Dɛnaa yɔrɔ-a.

Kalɛbu

⁷ Á n din doa kɔn ka pàãyiidɛnaa nɛ Muizu a biikoo li, á na a min peperebaa nyaa kɔnlɛ ka Yefunee a nɛgiĩ Kalɛbu ni, ǹ nə́ n piã zaman a boo ne, n giɛ ǹ nyan nə n dɔ sii baraa-n wa, ǹ nə́ zùzùũ si baraan kɛn kurəə.

⁸ Ǹ dinin min paa dinsɔɔ̃ na á kirisibaa min duu biɛsɔrɔ bii, (600 000) zia biɛ ka ǹ gòã nɛ, á wɔ ǹ nɛ kíɛ̃ lɛ nɛ, bɔ̀nyaa ka zoo nyɔɔ bɛ́ baa sii tán mɛn lɛ la.

⁹ Pàã mɛn bɛ́ tɔn Kalɛbu nɛ, Dɛnaa bɛ kɔ la yǎa a zizi-kɔ waáraa, á da dii gána lɛ a kelen mìi-n ganaa, ǹ mɛnɛn lɛn bɛ́ re goɛ̃ ǹ gɔn kíɛ̃ lɛa.

¹⁰ Màn mɛn bɛ́ toɛ Izirayeli tumaa yɛ ǹ dɔ̃ mà kɔ Dɛnaa lɛ á kɔɔ̃nɛ.

Kiri-wɔlen

¹¹ Min mɛn tumaa bɛ́ ǹ foo ná a bɔlɔ paa pii wa, ǹ nə́ ǹ nə n dɔ̀ɔ̃ wɔ Dɛnaa-n wa, ǹ yiri gisĩ ǹ sii kie, barka goã a nɛ!

¹² Ǹ wen nə buu kɔ yala-n ǹ wusoo ǹ nə ǹ tɔ kɔ doo, a min dadaran kɛn nɛnyaanan si.

Samayeli

¹³ Samayeli na á goã, Dɛnaa a narɛɛ-wɔle taãn lɛa Dɛnaa a boo gii-dali, á kiibaa koa, á nyɔɔ lɔ a zaman a kiãn ganaa, á ǹ koa.

¹⁴ Dɛnaa a dí-pɛn wɔ gɔn la, á kiri wɔ zaman ganaa Dɛnaa nə́ n dɔ Zakɔba lɛ.

¹⁵ Á bɔlɔgoondɛnaa baa, á toa ǹ nə́ dɔ̃ Lawa a boo gii-dali lɛa, a boo-diɛ gɔ́ɔ̃ nɛ, á n din nyaa yii wɔlɔ yɛli taãn pɛle lɛa.

¹⁶ Á Dɛnaa pàãyiidɛnaa bii wɔ bɛ̀ zɔ́ɔn bɛ́ ǹ nə́ gɛwaa paǹ yii li, sère nɛ mɛn bɛ́ tɔn nyɔ mii, á kɔ wúlu màn lɛa.

¹⁷ Dɛnaa nə́ n toa lon á la da paraa ganaa, bìn-diɛ gole gɔ́ɔ̃ nɛ, á toa ǹ ná a lɛn ma.

¹⁸ Á zɔ́ɔn kiãn dɛ ka Filisiti minin kii nɛn nɛ.

¹⁹ A nyuù wɔ duduu biikoo laan bɛ̀ a n doe, á siérebaa pɛ Dɛnaa yɔrɔ-a ka a nyɔɔ lɔ ma-a wole ne: «Ma gɔn mànan gɔsɛ min kɔ́n gɔn ma haalɛ a kɔsɔn dinin.» Min kɔ́n zɛ̀rɛ koa-a wa.

²⁰ A nyuù wɔ kio, á Lawa a boo gii dalibaa ǹ dí nya doo, á kii a gɛ̀ boo da nɛ, tán giulun, á n lɛn saa lon, á Lawa a boo gii dalibaa ǹ dí nya, á zaman a kɔkɔrɔbaa tuturu ni.