Yiriwoorobaa ǹ sɛ́wɔ 2 - LAWA A BOO SONBORE

¹ Ǹ boo da ǹ gɔn nə baraa bɛ̀ ǹ tá boo diɛ ǹ dinin biin ni: «Wɔa yiitákoobaa n kunu a n foo ziziɛ̃. Gɛ̀ a dagòã banban. Wɔ a min doɛ̃ á n toa geren piɛ á wusoo á daa kanaa wa.

² Wɔ n yii wɔ dinin mìi gialaa, wɔa yiitákoobaa kio, a n die n biɛ kɛnɛn ka wɔ goã wɔ́ yɛ duduu wa. Piɛ̃ mɛn bɛ́ wɔ nyin ni, a n ka tɛmaa puusə ne. Taasiɛ n ka tɛ nàn bɛ́ lɔn kuĩ wɔ foo a bìn-diɛ li.

³ Bɛ̀ á nimi, gɔ̀nɔn nə n biɛ ton lɛa, yiri n papaɛ̃ ka piɛ̃ bɛ́ lɔn gɔn ná a boe la a kũ wa.

⁴ Biikoo á re doe, minin yiri á re boe ka wɔ tɔ din ni, min kɔ́n ba re n yiri koɛ wɔa zɛnaa ǹ sii li wa. Wɔa yiitákoobaa n die kiɛ̃ kɛnɛn ka la bara bɛ́ lɔn, a gòɛ̃ ná a re yii wa. A n die papaɛ̃ ka furuməə á kie lɔn wasa a biɛn nə́ loo a wɔlɔ-woɛ̃ dɔ boo la.

⁵ Hiĩ, wɔa tá kanaa dɔ n beleboe boɛɛn nɛ ka wúlu bɛ́ lɔn. A nya waáraa n koa nɛ yǎa duduu. Min kɔ́n ba boe la a wusoo a da ka a kio-n wa.

⁶ «Ka daa kəni, màn-bii kɔɔ̃nɔn mɛnɛn bɛ́ yɛlaa ka da ǹ dì da! Màn mɛn tumaa bɛ́ zɛnaa nɛ, wɔ n kũ ǹ ganaa sɔnbɔraanɛ, ka wɔa nɛ tenmaa waáraa bɛ́ lɔn.

⁷ Ka daa wɔ duvɛ̃ giɔ̀mɔ kakan mi sɔnbɔraanɛ, ka daa wɔ màn gìĩ kɔɔ̃n sonboren gìĩ kɔ. Wɔ yiri nyan toa a bɔ ka da buun bibinaa n niɛ-n wa.

⁸ Ka daa wɔ orozə da tã buurii n ni, wɔ ǹ wɔ wɔ mìin ganaa bɛ̀ a ná a tɔn laa wa.

⁹ Min tumaa doamaa nɛ a n gii da wɔa gaãnaabaa ǹ zɔ́nɔn kɛn nɛ, wɔ wɔa foo kɔɔ̃nbaa ǹ gòɛ̃ da bǎã tumaa nɛ. Ka bɛ nɛ, wɔ ǹ wɔ́ kɔnbɔ ka bɛ tumaa nɛ, wɔa wɔ gii ni á n koa wɔ nɛ.

¹⁰ «Min mɛnɛn bɛ́ sii bǐɛ̃ zɛnɛɛ ǹ nə́ doobaan lɛa, ka daa wɔ bɔ ǹ yii ni. Ka nyan toa lɔ giɔɔrɔn makara bɔ wɔ ganaa wa, wɔ nyan min yii fuliən mìi ka fufun guguru kɔ wa.

¹¹ Wɔsɛn wɔ paǹ li, peperebaa n min kaka a landa lɛa, pàãwɛɛnaabaa la kɔ́n banban.

¹² Min mɛn bɛ́ sii bǐɛ̃ zɛnɛɛ, ka daa wɔ kanan kɔ nɛ. A n wɔ lɔlɛkɔn, wɔ bɛ́ sii mɛn zɛnɛɛ a nə n kerekaɛ̃ a nɛ. A n boo zùzùũ diɛ wɔ ganaa wɔa siɛ̃n lɛa kɔn ka landa nɛ. Wɔ daraa mɛn yɛ, a n wɔ zɛ̀rɛ biɛ mà wɔ nyan toa wɔ bɔlɔgoondɛnan baa bɛ gɔ́ɔ̃-n wa.

¹³ Min mɛn bɛ́ sii bǐɛ̃ zɛnɛɛ a nə n din nyɛɛ mà asɛ Lawa dɔ̃, a n pii a din gɔ́ɔ̃ nɛ mà a n Dɛnaa a nɛ lɛa.

¹⁴ Á n baa zùzùũ si ǹ màn yiikoonaa lɛa wɔa taasiɛ wɔ ǹ gɔn ganaa. Wɔ ba li wáa wɔ yɛ ka wɔ yii din ni wa.

¹⁵ Ka bɛ nɛ, a yiitákoobaa ba goon ka ǹ miãn wɔ bɛ́ lɔn wa, a giã ǹ gɔn na a gɔrɔn.

¹⁶ Asɛ wɔ paǹ li, wɔ ǹ kɛnɛn ka wɔrɔ we naarɛn bɛ́ lɔn. A nə n niɛ n boe wɔ ganaa ka yisi da kɔn ǹ bǎã bɛ́ lɔn. A n pii: Min mɛnɛn bɛ́ sii bǐɛ̃ zɛnɛɛ bɛn man giɛ̃ foo kɔɔ̃nbaa la. A nə n din la nyɛɛ mà asɛ Lawa yɛ ǹ di lɛa.

¹⁷ Sɛnɛ, wɔ á re giɛ a ganaa bɛ̀ á taãn pii. Ka daa wɔ zɔɔ̃ a lɛ li, wɔ ga a ganaa a yiitákoobaa bɛ́ re n giala nyɔmɛɛ lɔn.

¹⁸ Ka bɛ nɛ, min mɛn bɛ́ sii bǐɛ̃ zɛnɛɛ, bɛ̀ n yaa á Lawa a nɛ lɛa taãn-taãnɛ, Lawa á re n doe lɛ, á re a kirisibiɛ a zɔ́ɔn ganaa.

¹⁹ Ka daa wɔ ga a ganaa màn mɛn bɛ́ kɔnboe ne, wɔ sɔ kɔ a ganaa, wɔ bɔ a yii ni. Wɔ á re doɛ̃ bɛ̀ a foo nyantoro lɛ á doe bǎã mɛn nɛ, wɔ á re boe la wɔ ga a foo-kũ lɛ ganaa.

²⁰ Ka daa wɔ dɛ a gã wɔ sìi da a ganaa, a giala, bɛ̀ wɔ kũ a da ǹ boon kɛn li, Lawa á re yɔ boe a lɛa.»

²¹ Bɛa minin kɛn lɛn sii-zɛnaa ǹ gɔn nə kɛnɛn. Sɛnɛ, maǹ nə n dinin yiri siɛ̃, a giala, ǹ baraabaa lɛ nə ǹ biɛ yii tere-an lɛa.

²² Ǹ ba Lawa gɔ́ɔ̃ boo-duriin doɛ̃ wa. Yiitákoobaa mɛn bɛ́ kɔɔ̃n Lawa ganaa, ǹ ba n yii diɛ màn kɔ́n la bɛ gɔ́ɔ̃-n wa. Min mɛnɛn bɛ́ n dinin kuĩ sɔnbɔraanɛ, ǹ tá re bɛn guguru koe, sɛnɛ, bɛa minin kɛn ba golee li wa.

²³ A da yaa, Lawa na á minbuiinin zɛnaa maǹ goã yiitákoobaa mɛn bɛ́ a ná a re gɛ̀ doɛ̃ wa. A na á ǹ zɛnaa a dinmaa a kɔnboe lɛa.

²⁴ Gɛ̀ na á daa kanaa gɔ́ɔ̃ nɛ, a giala, yiri baraa foo na á goã wuu pii. Min mɛnɛn bɛ́ bɛa yiri kɛ lɛ wɔn lɛa, ǹ doamaa nɛ ka gɛ̀ nɛ.