Yiriwoorobaa ǹ sɛ́wɔ 1 - LAWA A BOO SONBORE

Yiriwoorobaa ka minbuiinin lɛ-a ǹ pii ( 1—5 ) Màn sonbore narɛ

¹ Kasɛn mɛnɛn bɛ́ kanaa-lɛduə̃lin lɛa, ka sii bǐɛ̃ narɛ. Dɛnaa wɔ paǹ li, ka toa kaa taasiɛn nə goã pepere, ka ga li ka foo nyantoro ne.

² Ka bɛ nɛ, min mɛnɛn bɛ́ ǹ ba zoɛ̃ a lɛ li wa, a n toɛ bɛn tá yii. Min mɛnɛn bɛ́ ǹ ba n piɛ̃ ká a goleemali-n wa, a nə n din nyɛɛ bɛn manɛ.

³ Taasiɛ kɔkɔrɔn man minin wɔlɔ lui Lawa ganaa, bɛ̀ yiriwɛɛnaan nə́ zɔɔ̃ a lɛ li, a pàã n sìi diɛ ǹ ganaa.

⁴ Haayii, foo mɛn nə́ kie taasiɛ baraa we, yiriwoorobaa a we bɛ gɔ́ɔ̃-n wa. Bɛ̀ sii baraa la min mɛn yii ni, a giɛ̃ ǹ dɛnaa a kion wa.

⁵ Ka bɛ nɛ, yiri fu mɛn bɛ́ daraa koe minbuiinin la, a n baa sii soɛ nyɛɛnɛ. A nə n wɔlɔ lui yiriwɛɛnaan ganaa. Sii baraa-zɛnaali tìĩ n boe ne a nyin ni.

⁶ Yiriwoorobaa n yiri lɛa a n minbuiinin narɛ, sɛnɛ, min mɛn bɛ́ sɔ koe Lawa ganaa a boon-diɛ gɔ́ɔ̃ nɛ, a ba bɛa dɔlɔ bɔma-a toɛ wa. Ka bɛ nɛ, Lawa yii n wɔlɔ yii yǎa minbuiin foo a zuzulubaa nɛ, a bɛ́ sii mɛn tumaa taasɛ á doɛ̃ taãn-taãnɛ, a bɛ́ boo mɛn tumaa diɛ a n miɛ̃.

⁷ Hiĩ, Dɛnaa a yiri fu n kanaa gɔ́ɔ̃ tumaa piɛ̃. Màn mɛn tumaa bɛ́ a tan, a na a tumaa kuĩ kun, boo gogoonmaa mɛn bɛ́ n diɛ á miɛ̃.

⁸ Bɛ̀ min boo baraan da, a giala n die yii duduu. Kiri mɛn nə́ kie dɔlɔ boe ka peperebaa nɛ, a re liɛ bɛ la wa.

⁹ Min mɛnɛn bɛ́ Lawa yii puusə koe, á re kuu koe ǹ zɛnaa ǹ siin ganaa. Ǹ bɛ́ boon mɛnɛn diɛ, á re doe yǎa Dɛnaa ganaa, a boo la a dɔlɔ bɔ ǹ gɛ̀-dɛn kɛn ganaa.

¹⁰ Ka bɛ nɛ, a toon mɛnɛn bɛ́ n yii diɛ boo la, ǹ tá n too koe a tumaa ganaa, ǹ tá tɔ-pɛ ǹ boo bɔnboɛɛn din miɛ̃.

¹¹ Ka n nyɛnaa kɔn tɔ-pɛ kooron manɛ, ka goã ka lɛwɔn a dɛnaa lɛa, ká n ka a boo baraa diɛ ka miãn ganaa wa. Boo mɛn bɛ́ n diɛ durii ni a goɛ̃ a binyəə baã wa. Lɛ soɛ-bɔle n soɛ-bɔle diɛ gɛ̀ nɛ.

¹² Ka nyan kaa yiitákoobaa zɛnaa ka yɔrɔ kɔ́n tɔrɔ nɛ ka ga gɛ̀ li wa. Ka nyan toa ka n dinin ziziɛ̃ kaa nya ǹ dín gɔ́ɔ̃-n wa.

¹³ Haayii, Lawa gɛ̀ zɛnaa wa, yiikoonaan papaã ba a foo sii wa.

¹⁴ A na á màn tumaa zɛnaa mà ǹ goã ǹ tan. A bɛ́ á màn mɛn tumaa kaa kanaa gɔ́ɔ̃ nɛ, bɛn man yiitákoobaa koe. A màn mɛn zɛnaa, sèwò ba a nɛ a n gɛ̀ dii wa. Gɛ̀ a wɛɛ kanaa la wa,

¹⁵ a giala, màn mɛn bɛ́ pepere a giɛ̃ wa.

Min mɛnɛn bɛ́ Lawa yii puusə koe ǹ taasiɛ wɔ ǹ gɔn tá baraa

¹⁶ Min mɛnɛn bɛ́ Lawa yii puusə koe, maǹ gɛ̀ bíi ǹ dinin li ka ǹ zɛnaa ǹ siin ni, ka ǹ da ǹ boon ne. A nə ǹ yiri ni mà a nə ǹsɛn giaáraa lɔ lɛa, maǹ diɛ ǹ yiri ni ka pàã nɛ ǹ nə́ lɛ kɔ we kun ni. Hiĩ, ǹ tá kɔnboe ne ǹ goã a wɔn lɛa taãn-taãnɛ.