Tobiti 1 - LAWA A BOO SONBORE

Tobiti a nyaa ǹ boo

¹ Tobiti a lɛlɛ siin nə́ kie, Tobiyeli a nɛgiĩ ni. A na á goã Anayeli a nɔ̀ɔn lɛa. Anayeli na á goã Aduweeli a nɛgiĩ lɛa, a n Gabayeli a nɔ̀ɔn lɛa. Ǹ tumaa na á goã Aziyeli a tanlɛ minin lɛa, Nɛftalii tɔrɔn lɛa.

² Tobiti na á goã Nɛftalii, Galilee gole gána nɛ, Tisibe kiwi, a n Kadɛsi biin ni a gɔsɛ a lɛ̀gɔn la, Asɔɔrɔ n lɛ̀nyɛɛnɛ, Fogɔɔrɔ n gusin a lɛ̀gɔn la. Maǹ nə́ ǹ goa walan ǹ nə́ woo ǹ ne Asiirii gána nɛ, bɛ̀ Salmanazaara n bɛa gána kɛa kii lɛa.

Tobiti nə n yiri gisĩ a lɛlɛ ǹ nɛ

³ Masɛ Tobiti, maa tá kanaa tumaa nɛ, má goã taãn-pɛ gɔ́ɔ̃ nɛ, má sii bǐɛ̃ dɔ zɛnaa. Má goã wɔrɔ koe ma dɔɔ̃n Zuifun la parsiini, bɛ̀ ǹ bɛ́ ǹ nə́ ǹ goa ǹ nə́ woo ǹ ne kun masɛ nɛ Ninivu, Asiirii gána nɛ.

⁴ Ma bɛ́ má goã nɛ ten lɛa, má goã tɔn maa gána nɛ, Izirayeli, Nɛftalii tɔrɔ tumaa ma digolo kie, bɛ nə́ n nakɔn ka kii Davida a sumu minin ni, kɔnlɛ ka Zeruzalɛmu ni. A da yaa, bɛa kiwi kɛ lɛ dinsɔɔ̃ nɛ Lawa bɔ Izirayeli gána nɛ, mà tɔrɔn tumaa da ǹ wúlu mànan kɔ la. Lawa a kion lɛ na á goã á n dɔ Zeruzalɛmu, ǹ nə́ barka da a ganaa, ǹ nə́ koa ǹ tɔrɔ basa tumaa wɔ lɛa, ǹ mɛnɛn bɛ́ re die ǹ kio.

⁵ Galilee a kelen tumaa la, maa sumu minin ni ka Nɛftalii tɔrɔ minin ni, ma digolo lɛ, bɛn man nə́ goã wúlu mànan koe sana diin nɛ nyín kɛ la, Izirayeli a kii Zeroboamu zɛnaa ka sana nɛ, á koa Dan kiwi a wúlu-bɔ ǹ bǎã nɛ.

⁶ Masɛ dinsɔɔ̃ n má goã woe Zeruzalɛmu zɔ́nɔn biikoo li parsiini, ka Muizu a landa bɛ́ á laa Izirayeli zaman-a lɔn duduu. Má goã die maa wuru mànan lɛ bibinaa nɛ Lawa a kion, tɔɔn nɛ bibinaa nɛ, tɔɔn fùbaa ǹ wɔ nɛ, ka maa sèren ka bibinaa n kurii ni.

⁷ Man má goã bɛ din tumaa koe Lawa a wúlu-bɔlen la, Aarɔn a nɛn kɛn, wúlu-bɔn lɛa. Levii tɔrɔn mɛnɛn bɛ́ dí nyɛɛ Zeruzalɛmu, má goã belee a fùbaa ǹ wɔ koe, duvɛ̃ nɛ, Olivə ni, grənaadi ni, gɔ́rɔ nɛ nɛ, ka da nɛ tɔrɔ kɔsɔn nɛ. Má goã ma gɔn màn a fùbaa ǹ wɔ kɔsɔ dɔ siɛ̃, wɔ doamaa bɛ nɛ wɔ màn mɛn kɔ lɛ̀ sɔrɔ gunyin sɔbaa. Má goã bɛa wɔrɔ kɛ lɛ a paǹ goon boe lɛ̀ li lɛ̀ li Zeruzalɛmu.

⁸ Bɛ kio, má goã ma gɔn màn a fùbaa ǹ wɔ a talɛɛ sɔɔ koe nɛtoenən la, lɔ giɔɔrɔn nɛ ka tiin mɛnɛn bɛ́ giã-n Izirayeli minin bii. Man má goã bɛa dɔmalɛn kɛn tumaa zɛnɛɛ lɛ̀ sɔɔ sɔɔ tumaa li, wɔ boo la wɔ màn bii kun ni, ka Muizu a landa bɛ́ á laa lɔn, ka maa díi a náa Deboraa ma daraa-a lɔn. Ka bɛ nɛ, man má goã nɛtoen lɛa, a giala maa díi Ananiyeli goã á gã.

⁹ Ma bɛ́ má gole kɔ, má ma din tɔrɔ wɔ lɔ lɛa. Á nɛgiĩ goon yɛ, má n bíi Tobiasi.

¹⁰ Nyɔɔbaa nɛ bɛ kio, ǹ nə́ woo ka ma nɛ Asiirii gána nɛ, má woo giã Ninivu. Bɛa kiwi kɛ nɛ, má maa kion minin tumaa yɛ ka ma tɔrɔ minin ni, màn tɔrɔ goon bii kun ka tɔrɔ kɔsɔn nɛ.

¹¹ Sɛnɛ, masɛ nə́ n piã máa ma a màn kɛ bii ka ǹ bɛ́ lɔn ma.

¹² Má n din baa bɔlɔgoondɛnaa lɛa maa Lawa yɔrɔ-a ka ma foo tumaa nɛ.

¹³ Bɛ lɛ nɛ maa Dɛnaa nə́ n dɔ ma lɛ: Má n baa kii Salmanazaara a giaára lɛa, ma ná a siin yɔrɔ-bɔle dɔ lɛa.

¹⁴ Á goã ma diɛ Medii, bɛ̀ màn mɛn tá kɔɔ̃nɛ a ganaa, bɛ̀ ma wo bɛ pii. Bɛ lɛ na á toa, bɛa gána kɛ lɛ nɛ, Ragɛsi kiwi, má wɔrɔ we kilo biɛsɔɔ (300) kaa boroon ne má koa Gabayeli li, Gabri ǹ dɔɔ̃n lɛa.

¹⁵ Kii Salmanazaara bɛ́ á gã, a nɛ Sanankeribu na á kii baa a kio. Medii gána a ziin man nə́ goã ǹ nə́ n bɔyaa ǹ nə́ baraa kɔ, man bɔyaa má woo bɛa gána kɛ-n doo wa.

¹⁶ Kii Salmanazaara a biikoo li gɔrɔ, má goã wɔrɔ koe ma dɔɔ̃n Zuifun la parsiini.

¹⁷ Má goã maa màn-bii gii kɔn ka min mɛnɛn bɛ́ bòo goã ǹ ganaa, má goã mɔnaan koe mɔnaa wɛɛnaan la. Bɛ̀ má ma dɔɔ̃n Zuifu mɛn gere yɛ, ǹ nə́ zũ Ninivu a kungɔn kio, má goã siɛ ma bĩ.

¹⁸ Sanankeribu dɔ nə ǹ mɛnɛn dɛ, má goã ǹ dɔn biĩ. Zudee gána nɛ, bɛa min kɛ lɛ goã á sɔ kɔ Lawa Kii gole kɛ-a lon. Lawa bɛ́ re dɔlɔ mɛn boe a ganaa, á loo á bɔ gána kɛ nɛ. Sanankeribu bɛ́ á n bɔyaa á daa Ninivu, a foo na á goã yoo ne, á Izirayeli min gigiã dɛ. Sɛnɛ, masɛ n má goã woe ka geren lɛn nɛ durii ni, má goã ǹ biĩ. Sanankeribu goã ǹ kiɛ geren lɛn gamali ganaa, sɛnɛ, a goã ǹ yii doo wa.

¹⁹ Ninivu giĩ goon na á pɛ kii lɛ nɛ: «Tobiti n geren lɛn biĩ.» Má tɔ́n nə n duru. Sii mɛn tumaa goã n zɛnɛɛ, kii lɛ bɔ a siére-a, á ga ma li mà a n ma dii. Má nyɛ́ɛ baa má baa si.

²⁰ Ǹ nə́ ma gɔn màn tumaa si ǹ nə́ kɔ kii la, á kaa a gɔn màn li. Màn kɔ́n goã ma gɔn doo wa, bɛ̀ á n bɔ maa lɔ Anna nɛ ka maa nɛgiĩ Tobiasi ni.

²¹ Lɛawaa pusi (40) bɛ kio, kii lɛ a nɛgiĩ min paa kii lɛ dɛ á gã. Ǹ nə́ baa si ǹ nə́ woo Araraa kele la. A nɛ lɛ a kɔsɔ dɔ nɛ, a tɔ n Azaaradɔn, bɛ na á kii baa a bǎã nɛ. Azaaradɔn ma dɔɔ̃n Anayeli a nɛ Ayikara bɔ, á koa a wɔrɔ sii yɔrɔ-bɔle lɛa ka a gána a dín tumaa mìilandɛnaabaa nɛ.

²² Ayikara ma boo da kii Azaaradɔn nɛ, má boo la má wusoo má daa Ninivu. Sanankeribu bɛ́ á goã kii lɛa, Ayikara na á goã kii lɛ a kion mìilandɛnaa lɛa, a n kiri-kuruli lɛa, wɔrɔ siin yɔrɔ-bɔle lɛa, a n Asiirii gána nyɛɛnaandɛnaa lɛa. Azaaradɔn na á wusoo doo, á bɛa mìilandɛnaabaa ǹ dín kɛn lɛn kɔ la. Ka bɛ-n doo, Ayikara na á goã maa kion min lɛa, a na á goã maa niə lɛa.