Sii-nyaan 6 - LAWA A BOO SONBORE

Sɛ́wɔ lɛ tã ǹ bǎã sɔrɔ kɛ a lɛ bũ ǹ gɔn

¹ Bɛ kio, má yɛ Sère Nɛ lɛ sɛ́wɔ lɛ tã ǹ bǎã sɔbaa lɛ a bibinaa kɛ bũ, má màn yiikoonaa pàãdɛnaa sii lɛ a bibinaa lɛ ma á n lɛ dɛ, a lɛn bɔ ka la a paraa bɛ́ lɔn, á pɛ: «Daa!»

² Má tɔ́n sùi fu yɛ. Min mɛn bɛ́ á dii la, sa n lɔɔ nɛ a ganaa, ǹ nə́ tɔ́n gɔ̀lɔ̀baa ǹ kii bafolo kɔ la. Á woo ka gɔ̀lɔ̀baa nɛ, á wusoo a gɔ̀lɔ̀baa yɛ doo.

³ Sère Nɛ lɛ bɛ́ á sɛ́wɔ lɛ tã ǹ bǎã lɛ a paabaa ǹ wɔ bũ, má màn yiikoonaa lɛ a paabaa ǹ wɔ lɛn ma pii: «Daa!»

⁴ Sùi kɔsɔ soo gɔrɔ, a gɔ̀nɔn nə́ tã ka bonbon. Min mɛn bɛ́ á dii la, ǹ nə́ gɔya sa gole kɔ la, mà a boo la a wo zia pɛsɛ̃ tán la, ń giɛ minbuiinin tá kɔn dii ǹ gã.

⁵ Sère Nɛ lɛ bɛ́ á sɛ́wɔ lɛ tã ǹ bǎã lɛ a sɔɔbaa ǹ wɔ bũ, má màn yiikoonaa kɛ a sɔɔbaa ǹ wɔ lɛn ma pii: «Daa!» Ma bɛ́ giɛ, má tɔ́n sùi tì yɛ. Min mɛn bɛ́ á dii la, màn zɔɔ̃ ǹ kilo na a gɔn.

⁶ Má lɛn goon ma boe màn yiikoonaa pàãdɛnaa sii kɛ bii, a n pii: «*Belee kilo goon kɔ pinin goon dí nyɛɛ tumaa a saraa lɛa, n *ɔrzi kilo sɔɔ kɔ pinin goon dí nyɛɛ tumaa saraa lɛa. Sɛnɛ, n nyan nyɔɔ laanka duvɛ̃ giɔ̀mɔ bɔyaa wa.»

⁷ Sère Nɛ lɛ bɛ́ á sɛ́wɔ lɛ tã ǹ bǎã lɛ a siibaa ǹ wɔ bũ, má màn yiikoonaa lɛ a siibaa ǹ wɔ lɛn ma pii: «Daa!»

⁸ Ma bɛ́ giɛ, má sùi fu kəwuu yɛ. Min mɛn bɛ́ á dii la, maǹ bíi "Gɛ̀", min mɛn bɛ́ a kio, bɛ tɔ n "Geren PIƐ". Ǹ nə́ pàã kɔ ǹ la mà ǹ wo tán talakɔn siibaa ǹ wɔ a minbuiinin dɛ ka gɔya sa nɛ, ka bòo ne, ka busu ni ka don siĩ baraan mɛnɛn bɛ́ tán la.

⁹ Sère Nɛ lɛ bɛ́ á sɛ́wɔ lɛ tã ǹ bǎã lɛ a soorobaa ǹ wɔ bũ, min mɛnɛn bɛ́ ǹ nə́ ǹ dɛ, ǹ Lawa a boo diɛ a lɛa, ka ǹ siérebaa ka peperebaa-n a lɛa nɛ, má ǹ telenboenən yɛ Lawa a *wúlu bɔ ǹ bǎã giulun.

¹⁰ Ǹ nə́ n lɛ dii ka ǹ lɛn gole ne, ǹ nə́ pii: «Nsɛ mɛn bɛ́ Dɛnaa sonbore lɛa, ka taãn nɛ, ma nə n yii diɛ biĩ n tɔn kiri wɔ tán a minbuiinin lɛn ganaa, n wɔsɛn gɛ̀ dòo bɔ ǹ ganaa? A giala ǹ dinin man nə́ wɔsɛn dɛ wɔ́ gã.»

¹¹ Ǹ nə́ tɔ́n dɔnkɛ fu kɔ ǹ gogoonmaa la, ǹ nə́ pɛ ǹ nɛ: «Ka golee ka n yii da boɛɛn bɔrɔ. Ǹ doamaa bɛ́ nɛ ǹ ka dɔɔ̃n dí nya kun wolen mɛnɛn dɛ ǹ gã ka ka dɔn wɔ bɛ́ lɔn, yǎa bɛn lɛ piɛ̃.»

¹² Má yɛ, a bɛ́ á sɛ́wɔ lɛ tã ǹ bǎã lɛ a sɔrɔbaa ǹ wɔ bũ, tán bìn da gole gole. Wasa nə́ n bɔyaa á tì kɔ ka mɔnaa tì bɛ́ lɔn, mui tumumaa tã kɔ ka mà bɛ́ lɔn.

¹³ Leeren nə́ bɔ lon ǹ nə́ kaa, ka piɛ̃ gole bɛ́ gɔ́rɔ nɛ burun kiɛ lɔn.

¹⁴ Lon nə́ n munu kɔn, ka ǹ bɛ́ sɛ́wɔ muni kɔn lɔn. Kelen ne, ka tentenen mɛnɛn bɛ́ mu bii, ǹ tumaa papaã ǹ nə́ n bɔ ǹ bǎã nɛ.

¹⁵ Min mɛn tumaa bɛ́ tán la, ǹ nə́ n duru nyankɔrɔn nɛ, ka kelen gɛ̀fun biin ni: gánadɛnan nɛ ka nyɛɛnaandɛnan nɛ, sɔraasin goledɛnan nɛ, pàãman nɛ ka pàãdɛnan nɛ, bɛ̀rɛn nɛ ka tá ma din gɔn wìi a lɛa wolen tumaa nɛ.

¹⁶ Maǹ nə́ goã pii kelen lɛn manɛ ka gɛ̀fun lɛn nɛ: «Ka bɔ ka kaa wɔsɛn la, ka wɔsɛn duru, ń giɛ min mɛn bɛ́ giã-n kii dankan nɛ, bɛ yii baran wɔ yɛ wa, Sère Nɛ kɛ dɔ a foo-yoo baran dɔ wɔ ganaa wa.

¹⁷ A giala, ǹ minbuiinin zɛnaa ǹ sii yɔrɔ bɔ ǹ lɛawaa gole kɛ na á dɔ. Die n boe la a golee ǹ nyɛɛnɛ?»