Sii-nyaan 18 - LAWA A BOO SONBORE

Baabilonii a mɛnaa boo

¹ Bɛ kio, má lon a dia dí-a wole goon yɛ boe lon die tán. Pàã gole goã a gɔn, a siĩnbaa ǹ tɛ folo kaa tán ganaa.

² Á n lɛ dɛ ka lɛn gole ne, á pɛ: «*Baabilonii lɛ mɛnaa! Baabilonii kiwi gole lɛ mɛnaa ka bolobolo! Kanna, a bǎã nə́ n baa nɔ̀ɔn baraan giã ǹ bǎã lɛa, yiri baraan tumaa a duru ǹ bǎã lɛa, bàan gɔ̀dɛnaa gìĩ-bɔle-an tumaa a giã ǹ bǎã lɛa.

³ A giala á tɔrɔn tumaa a minin bebere ka a din kũ doɛ̃baã sii babaraan kɛn nɛ. Kanaa a kiin tumaa nə́ ǹ din kɔ a din kũ doɛ̃baã siin kɛn la kun ni. Kanaa a pii-kɔlen tumaa pàãman baa, ka a gɔn màn damata kɛ nɛ.»

⁴ Má lɛn kɔsɔ ma boe lon pii: – Lawa a minin lɛn, ka soo ka n bɔ kiwi kɛ nɛ, ń giɛ koe mɛn bɛ́ re ǹ yii, ka gii baran yɛ bɛ laanka ǹ sii baraan kɛn nɛ wa.

⁵ A giala a sii baraan lɛn nə́ kaa kɔn la, ǹ nə́ dɔ lon. Lawa yiri a boe ka a sii kɔkɔrɔn kɛn nɛ wa.

⁶ A ka kũ lɔn, a dɔ die a n kũ miɛ̃. A sii mɛn zɛnaa ka nɛ, bɛ miã màn paa die a n zɛnaa a dɔ nɛ. A yɔ kaka mɛn kaa ka lon, bɛ miã nə n kaa a dɔ lon, a n kaka á la a wɔ-n gunyin paa.

⁷ A bɛ́ á n din tɔ gole kɔ a gɔn màn sonboren kɛn lɛa lɔn, fuu laanka koe die ǹ bɔ a dɔ ganaa miɛ̃ bɛ doo. A n pii a din gɔ́ɔ̃ nɛ: «Man kii lɛa tán kànaa, ma bie giɔɔrɔ lɛa wa, ma a re gɛ̀ koɛ doɛ̃ ka duduu wa.»

⁸ Bɛ lɛ a lɛa nɛ, koen mɛnɛn tumaa bɛ́ a wɔ lɛa, ǹ tá re die kiɛ la pinin goon toto: busu ni, gɛ̀-koa nɛ, bòo ne, ka tɛ mɛn bɛ́ re kuĩ. A giala Dɛnaa Lawa mɛn bɛ́ á kiri wɔ a ganaa, Pàãyiidɛnaa nɛ.

⁹ Kanaa a kiin mɛnɛn bɛ́, ǹ nə́ n gii wɔ a naarɛbaa ǹ siin kɛn nɛ, ka a nyaǹ gɛsɛ bɔ ǹ mànan kɛn nɛ, bɛ̀ ǹ nə́ kiwi lɛ a tɛ a kũ ǹ tɛmaa kɛ yɛ boe, ǹ tá re wuu pii ǹ nə n lala da.

¹⁰ Fuu mɛn bɛ́ a mìi ni, ǹ tá re nyɛ́ɛ biɛ bɛ nɛ, ǹ wo giã tiãlɛa, ǹ nə́ pii: «Bɔ̀n woo bɔ̀n! Bɔ̀n gole Baabilonii kiwi gole pàãdɛnaa lɛ yɛ! A dɔlɔ bɔ ma-a ǹ gɔn yii n ke biikoo goon toto dinsɔɔ̃ nɛ!»

¹¹ Kanaa a pii-kɔlen dɔn man wuu pii ǹ nə́ n duwii a lɛa, a giala, mà min kɔ́n ba ǹ pii mànan pii doo wa:

¹² Sana nɛ, wɔrɔgiala nɛ, gɛ̀fu laanka gii tɔrɔ sonboren ne, mɔnaa wùsu nɔnɔɔ nɛ, a tã birəə ne ka a tã bonbon ne, soa mɔnaa nɛ, gɔn mɛn tɔrɔ bɛ́ a yii wa, ka bɛ nɛ, ka mànan mɛnɛn tumaa bɛ́ n zɛnɛɛ ka don a díi sɔ nɛ, ka gɔn sonbore ne, ka zan nɛ, ka fɔlɔ nɛ, ka kɔlɔ zɔzɔnɔn nɛ,

¹³ dù wùsu tɔrɔ gigiã nɛ, nyɔɔ gìĩ kɔɔ̃n tɔrɔ gigiã laanka gón gìĩ kɔɔ̃n nɛ, duvɛ̃ nɛ, nyɔɔ nɛ, wùsu ni, ka *belee ne, diin ni, sèren ne, sùin ni, wotoron ne, ka minbuiinin dinin ni ǹ nə́ ǹ siɛ̃ bɛ̀rɛn lɛa.

¹⁴ Kiwi lɛ a pii-kɔlen man nə́ goã pii ni: «N nə n yiri koa màn mɛn tumaa ganaa, bɛn wɔlɔ lui n ganaa, n ga pàãmabaa ǹ màn sonboren li gole kɛ yii papaã n ganaa, n ba re bɛ kɔ́n yii doo duduu wa.»

¹⁵ Pii-kɔlen mɛnɛn bɛ́ ǹ nə́ pàãman baa kiwi kɛ a pii-kɔ gòã wuu li, fuu mɛn bɛ́ re kiwi kɛ yii, ǹ tá re nyɛ́ɛ biɛ nɛ, ǹ wo giã tiãlɛa, ǹ nə́ wuu pii n duwii,

¹⁶ ǹ nə́ pii: «Bɔ̀n woo bɔ̀n! Asɛ-n bɔ̀n kiwi gole kɛ yɛ! Nsɛ mɛn bɛ́ ń goã dɔnkɛ yii nɔnɔɔ we, a tã birə́ ne, a tã bonbon ne, sana n tɛ pii a paǹ yii ganaa, gɛ̀fu laanka gii tɔrɔ sonboren ne.

¹⁷ A pàãmabaa ǹ màn damata lɛ yii papaã biikoo goon toto dinsɔɔ̃ gɔ́ɔ̃ nɛ!» Yìsi mu la ǹ goo a goledɛnan nɛ, ka ǹ zii tɔ-wɔlen ne, ka goo lɛ a dabaalin ni, ka min mɛnɛn tumaa bɛ́ dí nyɛɛ mu la, bɛn tumaa nə́ n zɔ̃ ǹ nə́ giã tiãlɛa.

¹⁸ Ǹ nə́ n lɛ dii kiwi lɛ a tɛ a kũ ǹ tɛmaa kɛ ganaa, ǹ nə́ pii: «Kiwi mɛn na á goã n zoɛ̃ kɔn ka kiwi gole kɛ nɛ?»

¹⁹ Maǹ nə́ goã gusuũ goɛ kiɛ ǹ mìi ni, ǹ nə́ wuu pii, ǹ nə́ n duwii, ǹ nə́ n lɛ dii: «Bɔ̀n woo bɔ̀n! Asɛ-n bɔ̀n gole kiwi gole lɛ yɛ! A din a pàãmabaa na á yìsi mu la ǹ dí-nyali tumaa baa pàãma lɛa. Sɛnɛ, a màn lɛ tumaa á ke á papaã biikoo goon toto dinsɔɔ̃ gɔ́ɔ̃ nɛ.»

²⁰ Lon mànan lɛn, ka n nyɛnyaa a ziziɛ̃ kɛ a lɛa! Lawa a minin ni, ka a dia dí-a wolen ne, ka a boo gii-dalin ni, ka n nyɛnyaa! A giala a bɛ́ á sii baraa mɛn zɛnaa ka nɛ, Lawa na á bɛ lɛ a kiri kuru la.

²¹ Bɛ ganaa, lon a dia dí-a wole kaka goon tɔ́n kɔlɔ saa, a gugurubaa n ka wii lɔ ǹ gii bɛ́ lɔn, á zũ yìsi mu li, á pɛ: «Kɔlɔ kɛ nə n zũ ka pàã mɛn nɛ, maǹ die Baabilonii kiwi gole kɛ dɔ zuĩ tán miɛ̃, min kɔ́n ná a re yii doo wa.

²² Tùtu-dɛlen ne, sàn kɔ ǹ màn-dɛlen ne, pìi-pɛlen ne, bɛn-pɛlen ne, min ba re bɛn kɔ́n a màn wuu miɛ a-n doo wa. Màn-zɛnaali kɔ́n ba re yii a-n doo wa, wii lɔ ǹ màn kɔ́n wuu a re boe a-n doo wa.

²³ Bólon fúlu a re yii a-n doo wa. Tɔntɔraa kɔn-wɔle laanka a lɔ lɛ a re boe a-n doo wa. A din a pii-kɔlen man nə́ goã pàãdɛnan lɛa kanaa, a din dɔ na á goã tɔrɔn tumaa a minin yiri siɛ̃ ká a gɔ́ɔ̃ tìbaa ǹ dagòãn nɛ.»

²⁴ Dɔlɔ na á n bɔ Baabilonii ganaa, a giala mà ǹ nə́ Lawa a boo gii-dalin laanka a min sonboren dɛ walan. Min mɛnɛn bɛ́ ǹ nə ǹ dɛ tán la, a din kiwi kɛ lɛ a lɛa nɛ.