Sii-nyaan 15 - LAWA A BOO SONBORE

Koe giala-nyɔmɔɔ sɔbaa boo

¹ Má wusoo má sii kɔsɔ yɛ á n din nyaa lon doo, a n foo biɛ na ǹ sii gole lɛa: Lon a dia dí-a wole sɔbaa nɛ, ǹ nə́ koe sɔbaa kũ ǹ gunun. Koen lɛn, a giala-nyɔmɔɔn man bɛn nɛ, a giala mà ǹ dinin man die Lawa foo yoo ǹ siin lɛn giala nyɔmiɛ.

² Má tɔ́n bǎã goon yɛ ka yìsi mu gole bɛ́ lɔn, ǹ nə́ damalon kɔ lɛ, tɛ n lɔloɛ nɛ a ganaa. Min mɛnɛn nə gɔ̀lɔ̀baa si Tɔɔ lɛ la, má wusoo má bɛn yɛ, ǹsɛn lɛn man nə́ n piã ka a nyín guguru kɔ nɛ, ǹ nə́ n piã ka a tɔ kɛ dɔ nɛ, ǹ nə́ kiɛ̃ minin ganaa màn nimii lɛ lɛa. Ǹ nə́ goã golee-n mu kɛ lɛ genli, ka Lawa a tùtun nə́ ǹ gɔn.

³ Maǹ nə́ goã Lawa a dí-nyali Muizu a biikoo loe loe, ka Sère Nɛ kɛ a loe ne, ǹ nə́ pii: «Dɛnaa Lawa Pàãyiidɛnaa, n nya ǹ dín tá dadara, ǹ gamaa ba min boe wa. Tɔrɔ din tumaa a kii, n sii yɔrɔ bɔ n pepere, a n taãn dɔ lɛa.

⁴ Dɛnaa, die na a re nyɛ́ɛ biɛ n nɛ wa? Die na a re n guguru koe wa? A giala mà n dinsɔɔ̃ n sonbore. Tɔrɔ din tumaa á re die n yɔrɔ-a, ǹ tumaa á re n guguru koe. A giala mà n peperebaa nə́ n din nyaa foaã sisia.»

⁵ Bɛ kio, Lawa a mɔnaa zìã mɛn bɛ́ lon, má yɛ bɛ nə́ n lɛ bũ.

⁶ Lon a dia dí-a wole sɔbaa mɛn bɛ́, ka koe bɔ ǹ màn sɔbaa nə́ ǹ gɔn, bɛn nə́ soo Lawa a Kion kɛ nɛ. Dɔnkɛ fufu tɛ-pɛlen manə ǹ ganaa, ka sana maabɛlɛ-n yii ni ǹ binbin ni.

⁷ Tɔɔ yiikoonaa pàãdɛnaa sii kɛ goon sana kaaran yii sɔbaa kɔ lon a dia dí-a wole sɔbaa kɛ la, kaaranan lɛn piɛ̃maa nɛ, ka Lawa a foo-yoo ne, asɛ mɛn bɛ́ a yii n koo baraabaraa yǎa duduu.

⁸ Bɛ ganaa, Lawa a Kion lɛ pã ka tɛmaa nɛ, Lawa a gugurubaa laanka a pàãyiidɛnaabaa a lɛa. Min kɔ́n boo la, á wɔ Lawa a kion lɛ-n wa, yǎa lon a dia dí-a wole sɔbaan kɛn, ǹ nə́ woo ǹ koe sɔbaa kɛ bɔ ǹ nə́ nya.