Sii-nyaan 14 - LAWA A BOO SONBORE

Minbuiin duu damata loe mɛn lɔ

¹ Ma bɛ́ giɛ, má Sère Nɛ lɛ yɛ golee-n *Siɔn kele la, Zeruzalɛmu kiwi gɔ́ɔ̃ nɛ. Má minbuiin duu paabiɛ ka pusiwensii (144 000) kɛ dɔ yɛ kun ni, a din tɔ laanka ǹ Di Lawa tɔ n kiɛ̃ nɛ, didie tumaa nyanlɛ ganaa.

² Má lɛn goon ma boe lon die, a wuu n boe ka mu gole a kiɛ̃ wuu bɛ́ lɔn, ka la a paraa gole wuu bɛ́ lɔn. Lɛn wuun lɛn kaa kun nə ka n pɛ mà tùtu-dɛlen man loe loe ka tùtu ni.

³ Bɛa minbuiin duu damata kɛ lɛ na á golee Lawa a kii dankan yɔrɔ-a, ka màn yiikoonaa pàãdɛnaa sii kɛ nɛ, ka min golen kɛn nɛ, ǹ nə́ loe soree loe. Min kɔ́n ba boe la, a n daraa bɛa loe kɛ lɛ ganaa wa, yǎa min duu paabiɛ ka pusiwensii mɛn bɛ́, ǹ nə́ kirisibaa tán la.

⁴ Ǹsɛn nə n dinin lɔlɔ *gɔ̀-n ka lɔn nɛ wa, ǹ nə́ goã yoreen ne. Ǹ nə́ goã koe Sère Nɛ kɛ kialan lɛ, ǹ nə́ woe bǎã din tumaa nɛ. Ǹ dinin man nə́ kirisibaa yɛ tán minbuiin tumaa bii, ǹ nə́ die màn tɔrɔ bibinaa biɛ, ǹ nə ǹ kɔ Lawa la ka Sère Nɛ kɛ nɛ.

⁵ Min kɔ́n nə ǹ yɛ soɛ boe haalɛ pinin goon wa, sɔ̀n baraa kɔ́n goã ǹ ganaa wa.

Lon a dia dí-a wole màn sɔɔ boo

⁶ Bɛ kio, má lon a dia dí-a wole goon kɔsɔ yɛ piɛ̃ lon sɔsɔɔ. Boo Tii Kɔɔ̃n mɛn bɛ́ a kɔɔ̃nbaa a nyɛɛ wa, bɛ na a gɔn, a n die pii tán minin manɛ, ǹ nə́ tɔrɔ tumaa lɛa, gána tumaa nɛ, bɔlɔ tɔrɔ totoro pɛlen lɛa, ka zaman tumaa nɛ.

⁷ Á goã pii ka a lɛn gole-n kɛnɛn: «Ka nyɛ́ɛ baa Lawa nɛ, ka a guguru kɔ! A giala, a kiri wɔ minbuiinin ganaa biikoo dɔ. Lawa mɛn lon zɛnaa, ka tán nɛ, ka yìsi mu gole ne, ka mu yalan nɛ, ka bɛ guguru kɔ.»

⁸ Lon a dia dí-a wole paabaa ǹ wɔ kɔ bibinaa lɛ kio lɛ, a n pii: «*Baabilonii lɛ mɛnaa! Baabilonii kiwi gole lɛ mɛnaa ka bolobolo! Asɛ mɛn bɛ́ á tɔrɔn tumaa a minin bebere, a ǹ baa naarɛbaali taãn-taãnan lɛa.»

⁹ Lon a dia dí-a wole sɔɔbaa ǹ wɔ daa kɛn lɛn kio, a n pii ka lɛn gole ne: «Min mɛn tumaa bɛ́ Tɔɔ kɛ lɛ guguru koe, ka a nyín kɛ nɛ, a n lɛ koe ǹ na a nyaǹ kɛ kiɛ̃ a nyanlɛ-a, hinlaa a gɔn ganaa,

¹⁰ bɛa dɛnaa á re Lawa a foo yoo ǹ duvɛ̃ mii, ǹ mɛn lɛ bɛ́ Lawa a foo yoo gole paan kɛ nɛ, á re fuu yii kiribi tɛ kɛ nɛ, lon a dia dí-a wole sonboren kɛn laanka Sère Nɛ kɛ yɔrɔ-a.

¹¹ Ǹsɛn mɛnɛn bɛ́ Tɔɔ kɛ laanka a nyín guguru koe, a tɔ n kiɛ̃ nɛ ǹ ganaa, tèlò-n ka baayɛlɛ nɛ, ǹ ba re susui yii wa. Tɛ mɛn bɛ́ re ǹ kuĩ, a tɛmaa á re yui yǎa duduu.»

¹² Bɛ lɛ a lɛa nɛ, kasɛn mɛnɛn bɛ́ Lawa a minin lɛa, kasɛn mɛnɛn bɛ́ Lawa a dí-pɛn lɛ sii, ka n golee-n Yezu li, ka doamaa nɛ ka n foo kũ, ka sii si ka ganaa.

¹³ Má tɔ́n lɛn goon ma boe lon pii ma nɛ: «Kɛ kiɛ̃: A saa sisia ganaa, min mɛnɛn bɛ́ giɛ̃ Dɛnaa a dí-nyɛɛ gɔ́ɔ̃ nɛ, bɛn foo á re kɔɔ̃n koe!» Lawa a Yiri Fu tɔ́n pɛ: «Hiĩ, taãnɛ. Ǹ tá re n susui ǹ dí kaka nyɛɛ kɛ a lɛa, a giala ǹ sii mɛn tumaa zɛnaa, á kɔ ǹ lɛ.»

Dɔlɔ a kɔnboe nyaa màn-kurii wɔ gɔn la

¹⁴ Ma bɛ́ giɛ doo, má minbuiin a kɔnboe yɛ, a n giã-n labara fu lalan. Sana kii bafolo na a mìi-a, sɛ̌n gɔya lɛbɔle-a ná a gɔn.

¹⁵ Lon a dia dí-a wole goon kɔsɔ soo Lawa a Kion, á n lɛ dɛ kaka, a n pii giã labara lalan wole lɛ nɛ: «N sɛ̌n gɔya lɛ kanaa, n màn kuru, a giala màn kurii biikoo dɔ. Tán mànan lɛn nə́ ma, ǹ nə́ kɔnbɔ ka kurii ni!»

¹⁶ Bɛ lɛ ganaa, min mɛn bɛ́ á goã giã-n labara lalan, bɛ ná a sɛ̌n gɔya saa, á tán màn tumaa kuru á nya.

¹⁷ Lon a dia dí-a wole goon kɔsɔ soo lon a Lawa a Kion. Sɛ̌n gɔya lɛbɔle-a ná a dɔ gɔn.

¹⁸ Lon a dia dí-a wole kɔsɔ dɔ-n doo, tɛ da ǹ pàã ná a lon, á bɔ *wúlu bɔ ǹ bǎã paǹ li á daa. Sɛ̌n gɔya lɛbɔle-a bɛ́ ǹ miã mɛn gɔn, á paraa bɛ li: «N sɛ̌n gɔya lɛ kanaa, n tán a rezɛ̃ nɛ kɔ ǹ gɔnɔn kɛn tumaa kuru ni, a giala, rezɛ̃ nɛ lɛ ma.»

¹⁹ Lon a dia dí-a wole lɛ ná a sɛ̌n gɔya lɛ saa, á lɔɔraa tán ganaa, á rezɛ̃ a nɛ kɔ ǹ gɔnɔn lɛn tumaa kuru, á kaa rezɛ̃ mu bɔ ǹ yala gole kɛ nɛ, bɛ n Lawa a dɔlɔ bɔ ǹ bǎã kɛ giala pii.

²⁰ Bɛa yala lɛ n kiwi lɛkoro-a, ǹ nə́ rezɛ̃ lɛ yɔyɔrɛ a nɛ. Mà na á soo yala lɛ nɛ ka mu tii bɛ́ lɔn, yǎa kilo biɛsɔɔ (300), a zuzulubaa dɔ mɛtərə goon ka talɛɛ.