Sii-nyaan 12 - LAWA A BOO SONBORE

Lɔ laanka tɔɔ babaraa piɛ̃ wole

¹ Kaãbaa ǹ sii gole nə́ n din nyaa lon: lɔ nɛ, á wasa wɔ a din ganaa dɔnkɛ lɛa, mui ná a gòãn giulun, leere fulupaa n pɛnɛɛ nɛ a mìi ganaa kii bafolo lɛa.

² A na á goã nɔ̀ nɛ, a nə n lɛ dii a nɔɔ̀rɔ kɔ ǹ là-paparɛ gunun.

³ Kaãbaa ǹ sii gole kɔsɔ dɔ nə́ n din nyaa lon doo: Tɔɔ babaraa piɛ̃ wole tã ganganbiɛ goon ne. A mìi n sɔbaa, a bɛn nə fù. Kiibaa ǹ bafolo n we-n a mìi sɔbaa lɛ gogoonmaa ganaa.

⁴ Á leere talakɔn sɔɔbaa ǹ wɔ nɔɔ ka a mui ni, á kaa tán. Á daa golee lɔ nɛ-yɛle lɛ yɔrɔ-a, bɛ̀ a ná a nɛ lɛ yɛ lɔn gɔrɔ, a kũ a sɔ̃.

⁵ Lɔ lɛ ná a nɛ lɛ yɛ, nɛgiĩ lɛa, bɛa nɛgiĩ kɛ lɛ n die tɔrɔ din tumaa lɛduĩ ka fɔlɔ bàlà ná a gɔn. Ǹ nə́ nɛ lɛ saa ǹ nə́ woo koa Lawa li a kii dankan nɛ.

⁶ Lɔ lɛ baa si á woo don gɔ́ɔ̃ nɛ, Lawa din na á bɛa bǎã lɛ yɔrɔ bɔ á koa nɛ, mà ǹ die ǹ too walan, yǎa lɛawaa duu goon biɛpaa ka pɔsɔrɔ (1 260).

⁷ Bɛ na á n baa lon mànan kɔn-dɛ á yoo lɛa. Lon a dia dí-a wolen goledɛnaa Miseli, bɛ laanka lon a dia dí-a wole gialakunun kɛn nə́ zia baa tɔɔ babaraa piɛ̃ wole lɛ ganaa. Tɔɔ babaraa piɛ̃ wole lɛ dɔ laanka a dia dí-a wolen nə́ zia baa ǹ ganaa,

⁸ sɛnɛ, ǹ boo ǹ la wa. Ǹ giã ǹ bǎã dɔ yɛ lon doo wa.

⁹ Ǹ nə́ tɔɔ babaraa piɛ̃ wole gangabiɛ lɛ kũ ǹ nə́ zũ kanaa. A din ni lɛlɛ a miɛ̃ kɛ lɛ lɛa, ǹ nə́ bíi: «Nɔ̀ɔn Babaraa,» hinlaa *Sɛtaan, a n kanaa min tumaa yiri siɛ̃. Ǹ nə́ zũ tán la kun ka a dia dí-a wolen tumaa nɛ.

¹⁰ Má lɛn gole goon ma, boe lon, a n pii: «Sisia wɔa Lawa na á gɔ̀lɔ̀baa yɛ! A ná a din pàã nyaa, a ná a kiibaa saa. Sisia, a bɛ́ á min mɛn bɔ á baa kii lɛa, pàã n bɛ gɔn! A giala wɔ dɔɔ̃nɔn biɛ-kɔle na á fɔ̃, asɛ mɛn bɛ́ á goã ǹ biɛ koe tèlò-n ka baayɛlɛ nɛ, wɔa Lawa yɔrɔ-a, ǹ nə́ bɔ lon ǹ nə́ zũ tán.

¹¹ Wɔ dɔɔ̃nɔn nə́ gɔ̀lɔ̀baa yɛ ka Sère Nɛ mà kɛ pàã nɛ, ka ǹ siérebaa ǹ boo pàã nɛ. Haalɛ ta maǹ giɛ̃ bɛa lɛa, ǹ tá lɛ koe bɛ ganaa á la ǹ yiikoonaabaa nɛ.

¹² Bɛ lɛ a lɛa, kasɛn mɛnɛn bɛ́ lon, kaa bǎã ná a nɛ, ka n nyɛnyaa! Sɛnɛ, tán nɛ ka yìsi mu gole ne, bɔ̀n kasɛn yɛ! A giala Sɛtaan gisĩ ka li. A n doɛ̃ mà biikoo bǐɛ̃ ba a gɔn doo wa, a foo n yoo-n parsiini.»

¹³ Tɔɔ babaraa piɛ̃ wole lɛ bɛ́ á dɔ̃ mà maǹ ná asɛ zũ tán, a na á kiɛ̃ gɔrɔ, a n lɔ nɛgiĩ-yɛle kɛ kialan lui.

¹⁴ Sɛnɛ, ǹ nə́ giogialatã-a gole kɛ nyàan kɔ lɔ lɛ la, mà a yoo a wo a giã ǹ bǎã lɛ-n don gɔ́ɔ̃ nɛ, maǹ die toe walan, yǎa lɛ̀ sɔɔ ka talɛɛ, a wɔlɔ á re sɔsɔɔ koe miɛ̃ kɛ ganaa.

¹⁵ Bɛ lɛ ganaa, miɛ̃ lɛ pisəə ka mu ni, bɛ n baa sii tán ka tà mu bɛ́ lɔn, mà a boo la a lɔ lɛ saa a kiɛ̃ nɛ.

¹⁶ Sɛnɛ, tán daa lɔ lɛ a gu ganaa, á n lɛ bũ á tɔɔ babaraa piɛ̃ wole kɛ a tà mu kɛ piɛ̃ ka daɛn nɛ.

¹⁷ Bɛ lɛ ganaa, tɔɔ babaraa piɛ̃ wole lɛ foo yoo lɔ lɛ li parsiini, á kiɛ̃ á woo a nɛnyaan gialakunun gialaa, ǹsɛn mɛnɛn bɛ́ Lawa a dí-pɛn lɛ sii, ǹ nə́ n foo doɛ Yezu a boo ganaa.

¹⁸ Tɔɔ babaraa piɛ̃ wole lɛ tɔ́n giã mu gole lɛkoro lɛ-a.