Samayeli1 15 - LAWA A BOO SONBORE

Sayulu a sã paabaa ǹ wɔ

¹ Samayeli pɛ Sayulu ni: – Dɛnaa Lawa na á goã á masɛ din dia, má nyɔɔ lɔ n ganaa, ń kii baa Lawa a zaman Izirayeli minin lɛn mìi la. Bɛ lɛ n ke sisia, Dɛnaa Lawa bɛ́ re boo mɛn diɛ, n too kɔ bɛ ganaa.

² Dɛnaa Lawa Pàãyiidɛnaa n boo diɛ kɛnɛn: «Amalɛki tɔrɔn nə màn mɛn zɛnaa Izirayeli minin man ke, ma ba re ǹ toɛ ka bɛ-n wa. A giala Izirayeli minin bɛ́ ǹ nə́ soo Ezipti gána nɛ, ǹ nə́ zii saa, Amalɛki tɔrɔn lɛn man nə́ yoo ǹ nə́ n kerekaã ǹ zii la.

³ Sisia kəni, wo Amalɛki tɔrɔn gialaa, n nə ǹ dɛ n nə ǹ gɔn màn tumaa ziziɛ̃ lenlen. N baran n tɛn toa ǹ nɛ wa. Giĩn laanka lɔn nɛ, nɛnyaanan laanka nɛ tiɛɛ̃nɛn nɛ, diin laanka sèren ne, nyɔɔmaan laanka dundunun ni, ǹ tumaa dɛ.»

⁴ Sayulu zaman lɛ paã á ǹ nimi Telayimu. Min mɛnɛn nə goã woe zia la ka ǹ gòã nɛ, bɛn man nə́ goã giĩ duu biɛpaa (200 000). Zudaa wɔn man nə́ kɔnpɛ ka min duu fù ni (10 000).

⁵ Bɛ kio, Sayulu laanka a minin nə́ woo yǎa Amalɛki kiwi, ǹ nə́ goã kuu koe pɛrɛ tasa nɛ.

⁶ Sayulu pɛ Kenii tɔrɔn manɛ: «Ka n na, ka woo, ka n bɔ Amalɛki tɔrɔn lɛn bii, bɛ̀ bie wa, ma tɔn kiɛ̃ ma ka dɔn naa Amalɛki tɔrɔn lɛn ganaa kooro, a da yaa Izirayeli minin lɛn bɛ́ boe Ezipti gána nɛ ǹ mɛn waáraa, Kenii tɔrɔn lɛn nə́ ǹ tumaa kũ doɛ̃.» A bɛ́ miɛ̃, Kenii tɔrɔn lɛn nə́ n na Amalɛki tɔrɔn lɛn ganaa.

⁷ A saa Awiilaa kiwi ganaa, a wo kaa Suurun lalaa lɛ-a lɛ, Ezipti gána a lɛ̀giala gɔn la, Sayulu Amalɛki tɔrɔn dɛ á boo ǹ la.

⁸ Á Amalɛki tɔrɔn kii Agaagi kũ a yii n koo, á zaman lɛ tumaa dɛ lenlen.

⁹ Sɛnɛ, Sayulu laanka zaman lɛ Agaagi toa walan. Tɔɔ sonboren mɛnɛn bɛ́ tɔɔ bisinin laanka tɔɔ dadaran bii, tɔɔn mɛnɛn bɛ́ ǹ nə́ kasã, ǹ nə́ bɛn toa walan. Sère tenən ne, ka màn mɛn din tumaa goã siĩni, ǹ lɛ kɔ, ǹ nə́ bɛn bɔ̀n baa wa. Sɛnɛ, ǹ mɛnɛn tumaa goã pɛrɛɛ nɛ, ǹ nə́ ǹ ba giɔ̀mɔ boe wa, ǹ nə́ bɛn tumaa bɔ̀n baa lenlen.

¹⁰ Dɛnaa Lawa pɛ Sayulu nɛ:

¹¹ «Ma nə n gɔ́ɔ̃ bii, ka wàa nɛ ma Sayulu koa kii lɛa, a giala, a na á ma toa walan, a ba maa boo sii wa.» Samayeli foo yoo, á Dɛnaa Lawa nyankɔ tèlò-n á lɛ̀ waa nɛ.

¹² Samayeli yoo baayɛlɛ yiisoone mà a n woe kɔn yii ka Sayulu ni. Ǹ nə́ daa pɛ Samayeli-n kɛnɛn: «Sayulu bɛ́ á dɔ Karmɛli kiwi gɔrɔ, a na á tíĩ doa á n tɔ da la. Bɛ kio, á tɔ́n woo nyɛɛnɛ, á dɔ Gilgaali.»

¹³ Samayeli woo Sayulu li, Sayulu pɛ nɛ: «Dɛnaa Lawa die a barka da n ganaa. Dɛnaa Lawa màn mɛn pɛ, ma bɛ zɛnaa.»

¹⁴ Samayeli tɔ́n pɛ: «Sɛnɛ tɔɔ bisinin laanka tɔɔ dadaran bɛ́ lɛ mɛn biɛ má n miɛ, wàa dɔ wɔ n ka bɛ nɛ?»

¹⁵ Sayulu pɛ: «Maǹ nə́ bɔ ǹ nɛ Amalɛki tɔrɔn li. A giala, zaman lɛ na á tɔɔ bisinin lɛn laanka tɔɔ dadaran lɛn sonboren toa walan mà maǹ die wúlu boe ǹ ne Dɛnaa Lawa nɛ, n din a Lawa lɛ. A gialakun ke, wɔ bɛ yii bɔ̀n baa lenlen.»

¹⁶ Samayeli pɛ Sayulu ni: «Kɛ á boe! Dɛnaa Lawa màn mɛn pɛ ma-n tèlò-n, man die bɛ lɛ pii n ni.» Sayulu nə́ n toa a ganaa mà a pɛ.

¹⁷ Yǎa Samayeli tɔn nə n toa: – A laanɛ n mìi goã kiɛɛrɛ n din yii li, n bie ke Izirayeli tɔrɔn lɛn mìi la wa? Dɛnaa Lawa na á n bɔ á n koa Izirayeli a kii lɛa.

¹⁸ Dɛnaa Lawa bɛ́ n diɛ woe, a na á pɛ n nɛ: «Woo, n zia da bɛa Amalɛki tɔrɔ sii baraa-zɛnaalin kɛn ganaa, yǎa n nə ǹ tumaa dii lenlen ǹ nyɛɛ.»

¹⁹ Wàa na á baa, n Dɛnaa Lawa bɔlɔ si wa? N mànan mɛnɛn si kaa zɔ́ɔn la, wàa na á baa, ń ka dɔdɔ bɔ, n bɛn goɛ? Sii mɛn bɛ́ a siĩn Dɛnaa Lawa yii li wa, wàa na á baa, ń bɛ zɛnaa?

²⁰ Sayulu pɛ Samayeli ni: «Má Dɛnaa Lawa bɔlɔ si. Dɛnaa Lawa goã á ma dia maa, má woo walan. Ma daa ka Amalɛki tɔrɔn kii Agaagi ni, má Amalɛki kiwi lɛ dinmaa tumaa lɛ naa bolobolo.

²¹ Sɛnɛ zaman lɛ tɔɔ dadaran laanka tɔɔ bisinin mɛnɛn si, a laanɛ ǹ tumaa doamaa nɛ ka dɛ nɛ, zaman lɛ nə́ ǹ sonboren toa walan. Maǹ die wúlu boe ka bɛn nɛ Gilgaali kiwi, Dɛnaa Lawa nɛ, n Lawa lɛ.»

²² Samayeli pɛ: «Dɛnaa Lawa bɔlɔ si bɛ́ kɔɔ̃nɛ Dɛnaa Lawa ganaa lɔn, *wúlu màn tiɛ̃n laanka wúlu mànan tá kɔɔ̃nɛ a ganaa miɛ̃ ya? Haayii dɛ! Á ke, bɔlɔ si á soɛ wúlu màn nɛ, doree si á soɛ sère pian nyɔɔ nɛ.

²³ Piã lɛ n sii baraa lɛa, ka wɔ-kũ bɛ́ a lɛa lɔn, too kakabaa dɔ na a lɛa ka kɔnkoãbaa laanka dì guguru kɔ bɛ́ a lɛa lɔn. N bɛ́ ń Dɛnaa Lawa bɔlɔ tii, Dɛnaa Lawa nə n dɔ tii, n ba kii lɛa doo wa.»

²⁴ Sayulu pɛ Samayeli ni: «Má sii baraa zɛnaa. Ma Dɛnaa Lawa a dí-pɛ tamaa wa. N boo mɛn pɛ, ma bɛ si wa. A giala, man má nyɛ́ɛ baa zaman lɛ nɛ, má ǹ bɔlɔ si.

²⁵ Sisia ma nə n nyankoe, máa n maa sã toa ma nɛ, n wusoo n da n ti kun ka masɛ nɛ, ma Dɛnaa Lawa guguru kɔ.»

²⁶ Samayeli pɛ Sayulu ni: «Ma a die wusii man ti kunun n ni doo wa, a giala, ń Dɛnaa Lawa bɔlɔ tii. Dɛnaa Lawa nə́ n dɔ tii, n ba kii lɛa Izirayeli gána-n doo wa.»

²⁷ Samayeli bɛ́ á n bɔyaa mà a n woe, Sayulu ná a dɔnkɛ lɛkoro kũ, á woɛ̃ a gɔn.

²⁸ Samayeli pɛ nɛ: «Dɛnaa Lawa Izirayeli a kiibaa lɛ kũ á si n la pelo, á kɔ min kɔsɔ la, min mɛn nə́ ke soɛ n nɛ.

²⁹ A din mɛn lɛ á ke Izirayeli pàã lɛa, a soɛ boe wa. Dɔ̃ miɛ̃ ba asɛ a sii-n wa, a giala, a ba minbuiin nɛ lɛa sɛnɛ mà a tá n gɔ́ɔ̃ dɔn bii wa.»

³⁰ Sayulu wusoo á pɛ: «Má sii baraa zɛnaa. Sisia, ma nə n nyankoe, n zín wɔ masɛ nɛ, maa zaman lɛ a min golen laanka Izirayeli minin yɔrɔ-a. Samayeli wusoo n da ti kun ka ma nɛ, ma á re Dɛnaa Lawa guguru koe, n Lawa lɛ.»

³¹ Samayeli wusoo á daa Sayulu li, Sayulu tɔ́n Dɛnaa Lawa guguru kɔ.

³² Samayeli pɛ: «Ka da ka Agaagi ni masɛ li, Amalɛki tɔrɔn kii lɛ.» Agaagi daa Samayeli li. A yɔrɔ goã kɔsiɛ-n wa, a giala, a na á goã taasɛ mà asɛ kanbaa gɛ̀ kɔɔsɛ ganaa.

³³ Samayeli pɛ: «A saa lɔn, n dɔ minin nɛnyaanan nyin bɔ ka gɔya nɛ, ǹ daanan gɔn kooro goã, n dɔ dan gɔn kooro á re goɛ̃ pelo, lɔn bii.» Bɛ kio, Samayeli tɔ́n Agaagi dɛ á pɔpɔsɛ Dɛnaa Lawa yɔrɔ-a Gilgaali.

³⁴ Samayeli kiɛ̃ á woo Ramaa, Sayulu woo piɛ a din a kiwi Gibeya.

³⁵ Samayeli na á woo gã miɛ̃, a yii na á Sayulu yɛ doo wa, Sɛnɛ, Samayeli na á goã wuu pii Sayulu a lɛa ka a na á gã, a da yaa Dɛnaa Lawa nə́ n gɔ́ɔ̃ bii ka wàa nɛ asɛ toa, Sayulu giã Izirayeli minin mìi la.