Makaabee2 15 - LAWA A BOO SONBORE

Nikanɔɔrɔ nə n piɛ̃ mà a susu ǹ pii guguru koe wa

¹ Nikanɔɔrɔ ma mà Zudaasi laanka a minin tá Samarii gána nɛ. Á n yɔrɔ bɔ mà a n woe zia biɛ ǹ ganaa, susu ǹ pii pinaa, a giala, sii kɔ́n ba yii bɛa pinaa kɛ lɛ-n wa.

² Zuifun mɛnɛn doamaa bɛ́ nɛ, ǹ zia baa kun ka Nikanɔɔrɔ a zia-baalin ni, bɛn nə́ pɛ nɛ: «N nyan toa n wo ǹ dɛ ka yɔrɔ babaraa kɔ́n tɔrɔ-n wa! Lawa lɛawaa mɛn bɔ á koa a gɔrɔn, bɛ guguru kɔ bibinaa nɛ. A na á zɛnaa lɛawaa sonbore lɛa min tumaa a lɛa. Lawa yii tá sii tumaa ganaa, n yiri nyan toa a bɔ-n wa!»

³ Sɛnɛ, bɛa min kie gɛ̀-dɛle lɛa yǎa gunyin sɔɔ, á nɔ̀n da: «Mìinaa kɔ́n tá lon á laa, mà ǹ susu ǹ pii koa?»

⁴ Zuifun nə́ a lɛ si: «Hiĩ, Dɛnaa dinmaa yii n koo, Mìinaa mɛn bɛ́ kie lon, á laa mà ǹ pii zii a lɛawaa sɔbaabaa ǹ wɔ guguru kɔ.»

⁵ Nikanɔɔrɔ nə́ ǹ lɛ si: «Haya, masɛ, man mìinaa lɛa tán la. Ka kaa ziabaa ǹ mànan goa, ka dí nya kii ni!» A da yaa, a boe la a tá a babaraabaa ǹ dí kɛ yɔrɔ boe wa.

Zudaasi na a minin foo taɛ̃

⁶ Nikanɔɔrɔ na á pã ka din gole kɔ nɛ. A nə n din kalɛɛ gɔrɔ, mà a n die gɔ̀lɔ̀baa ǹ màn diɛ bii-a, kun ka ziabaa ǹ mànan mɛnɛn bɛ́, á re ǹ sii Zudaasi laanka a minin la.

⁷ Sɛnɛ, Zudaasi Makaabee ná a foo doama-a tamaa kaka. Á labaa la mà Dɛnaa á re die ǹsɛn gú ganaa.

⁸ Bɛ lɛ a lɛa nɛ, min mɛnɛn bɛ́ kun ni, a tá ǹ foo taɛ̃. A n pii ǹ ni: «Ka nyan nyɛ́ɛ baa tɔrɔ kɔsɔn kɛn manɛ die zia biɛ ka ganaa wa. Lawa da wɔa gú ganaa biikoon mɛnɛn tumaa li lɛlɛ, ka n yiri gisĩ a nɛ. Ka labaa la kanna doo, mà Pàãyiidɛnaa á re gɔ̀lɔ̀baa koe wɔ la.»

⁹ Zudaasi nə ǹ foo taɛ̃, bɛ̀ á Muizu a landa sɛ́wɔ paǹ tɛn boo diɛ ǹ nɛ, ka Lawa a boo gii-dalin ni. Ǹ gɔ̀lɔ̀baan mɛnɛn dɔn yɛ lɛlɛ, á ǹ yiri da bɛn dɔn nɛ. A bɛ́ màn diɛ ǹ foo tãbaa li ka yɔrɔ mɛn nɛ á kie:

¹⁰ A bɛ́ á ǹ kakabaa boo da ǹ nɛ, á boo la á ǹ mìi basã, á tɔrɔ kɔsɔn kɛn kɔkɔrɔbaa kɛ nyaa ǹ nɛ ka ǹ lɛ-kɔ mɛn bɛ́, ǹ boo la ǹ nə́ tamaa wa.

¹¹ Zudaasi na á ziabaa ǹ màn kɔ a min lɛ gogoonmaa la, ka bɛa yɔrɔ kɛ lɛ nɛ. A ba ǹ tamaa ǹ goóro ka sɛmiɛn boo diɛ ǹ nɛ wa, sɛnɛ, a nə ǹ yiri wɛɛ ka boo kaka kɔɔ̃n nɛ. Nyɔɔbaa nɛ, á narɛɛ goon wɔ, á bɛ laakalaa ǹ nɛ. Bɛa narɛɛ kɛ kɔnbɔ ka foo doama-a nɛ, a nə́ ǹ tumaa foo kɔɔ̃n koe.

¹² Zudaasi sii mɛn yɛ a narɛɛ lɛ gɔ́ɔ̃ nɛ, á kie: A na á n yiri koa Lawa a wúlu-bɔlen goledɛnaa zizi Oniasi li bɔrɔ. A na á goã min sonbore lɛa, a n nanaa sɔnbɔraanɛ. Á goã boo bǐɛ̃ diɛ, a tenmaa waáraa, á goã á n daraa giã ǹ gɔn sonbore ganaa. Bɛ ganaa, Oniasi gɔnɔn ma nə goã dia-n lon, á goã Lawa nyankoe, Zuifu tɔrɔ tumaa a lɛa.

¹³ Bɛ kio, Zudaasi màn yɛ á n din nyaa ka a din yɔrɔ goon lɛ nɛ, giĩ goon ne, a mìi ka n fu, a guguru kɔ ǹ gɔn na á goã kɔnboe, ka yiri koa ma li ni.

¹⁴ Oniasi goã pii: «Zeremii á kie, Lawa a boo gii-dali ni. Wɔsɛn mɛnɛn bɛ́ ǹ dɔɔ̃nɔn lɛa, á wɔ narɛ, a n Lawa nyankoe parsiini, wɔ tɔrɔ a lɛa ka Zeruzalɛmu kiwi sonbore kɛ nɛ.»

¹⁵ Bɛ kio, Zeremii sana gɔyaa goon dia Zudaasi la ka a gusin a gɔn nɛ. A bɛ́ bɛa gɔyaa kɛ koe la, á pɛ nɛ:

¹⁶ «Bɛa gɔyaa sonbore kɛ si, Lawa n koe n la. N tá re n zɔ́ɔn yɔyɔrɛ nɛ.»

Ǹ nə́ boo Nikanɔɔrɔ la a n giɛ̃

¹⁷ Zudaasi a narɛɛ lɛ á kɔɔ̃nɛ, á boe la á foo doama-a koe sɔraasin lɛn la. Á pàã kɔ ǹ foo tãbaa la, á pàã kɔ ǹ nɛ tenən la, mà ǹ nə n wen waa ka giĩn wɔ bɛ́ lɔn. Zeruzalɛmu, Lawa a zii ni ka Lawa a kion ne, maǹ koe ne. Zuifun nə́ n yɔrɔ bɔ, mà ǹ ba re zia biɛ sɔraasin giã ǹ bǎã wúlu li wa, sɛnɛ, maǹ die kɔn kuĩ ka foo tãbaa nɛ, ǹ yɔ bɔ kɔn-a ka ǹ pàã tumaa nɛ, ǹ boo la ǹ gɔ̀lɔ̀baa yɛ.

¹⁸ Bɛa ziabaa kɛ gɔ́ɔ̃ nɛ, ǹ nə́ n gɔ́ɔ̃ bii bɔrɔ, sanparɛ Lawa a kion sonbore kɛ a lɛa, ka bɛ-n doo, ǹ lɔn lɛa, ǹ nɛnyaanan nɛ, ǹ dɔɔ̃nɔn lɛa ka ǹ minin ni.

¹⁹ Min mɛnɛn dɔn bɛ́ ǹ nə́ goã Zeruzalɛmu, ǹ dɔn foo n ziziɛ̃ nɛ parsiini nyɛ́ɛ nə́ ǹ ganaa, ǹ nə́ taasiɛ we ziabaa kɛ ganaa, a n die n biɛ lalaa lɛ-a.

²⁰ Zɔ́ɔn lɛn nə́ n sɔkɔn, ǹ nə́ n yɔrɔ bɔ ziabaa lɛ a lɛa. Ǹ nə́ daa ka don-a díin ni, ǹ nə́ woo ǹ koa bǎã sonbore ne, sùin man wàãn paanan li. Ziabaa mɛn bɛ́ á dirii, min tumaa nə n yii diɛ bɛa nya ǹ gɔn la.

²¹ Zudaasi Makaabee nə n yiri koɛ bɛa zia-baali damatan kɛn li, ka ǹ ziabaa ǹ mànan kɛn nɛ, totoro ǹ wɔn ganaa, ka ǹ ziabaa ǹ don-a díin kɛn nɛ wɔlɔ yii ni. Ka bɛ nɛ, á n gɔnɔn goa lon, á n Dɛnaa nyankoe, asɛ mɛn bɛ́ boe la á n sii dadaran zɛnɛɛ. Á doɛ̃, gɔ̀lɔ̀baa yɛ bie boe ziabaa ǹ mànan li wa. Dɛnaa na a yɔrɔ boe, a n gɔ̀lɔ̀baa koe min mɛnɛn bɛ́ ǹ nə́ kɔnbɔ nɛ.

²² A Lawa nyankɔ ǹ boon nə́ kie: «Dɛnaa, Ezekiasi bɛ́ á goã Zudaa a kii lɛa, n nə́ n lon a dia dí-a wole dia, á Sanankeribu a sɔraasi duu paabiɛ pɔkiwisiwensooro (185.000) dɛ.

²³ Ma nə n nyankoe, nsɛ mɛn bɛ́ Dɛnaa lɛa lon, lon a dia dí-a wole sonbore goon dia wɔ nyɛɛnɛ pelo doo, a boo la a nyɛ́ɛ kaka da wɔa zɔ́ɔn kɛn bii.

²⁴ Tɔrɔ mɛn bɛ́ n din wɔ lɛa, min mɛnɛn nə da zia baa a ganaa, ǹ nə́ sɔ kɔ n ganaa, sii zɛnaa ǹ nɛ ka pàã kaka nɛ, n nə ǹ tumaa dɛ.» Zudaasi ná a Lawa nyankɔ giala nyɔmɔɔ ka bɛa yɔrɔ kɛ nɛ.

²⁵ Nikanɔɔrɔ a zia-baalin man nə n zoɛ̃ die, bɛnɛn wuu li ka ziabaa ǹ loen ne.

²⁶ Ǹ wɔ paǹ li, Zudaasi laanka a minin nə́ kaa ǹ zɔ́ɔn la, ǹ nə́ Dɛnaa bíi ǹ nə́ a nyankoe.

²⁷ Ǹ bɛ́ zia biɛ ka ǹ gɔnɔn nɛ, ǹ bɛ́ Lawa nyankoe ǹ dinin gɔ́ɔ̃ nɛ, ǹ nə́ min duu pɔsɔɔ ka sooro (35 000) dɛ. Bɛa Lawa a sii-zɛnaa ka pàã kaka nɛ kɛ nə́ ǹ gɔ́ɔ̃ pã, ka foo kɔɔ̃n gole ne.

²⁸ Ziabaa lɛ bɛ́ á nya, Zuifun lɛn nə́ n bɔyaa ǹ foo tumaa n kɔɔ̃nɛ. A da yaa, ǹ nə́ n mìi na Nikanɔɔrɔ gere ganaa, a ziabaa ǹ mànan tumaa n koe-n lɛ tán.

²⁹ Ǹ nə́ n lɛ dɛ ka lɛn gole ne sii lɔlɔkɔn bii. Ǹ nə́ yoo ǹ nə́ barka diɛ màn tumaa a Dɛnaa nɛ, ka ǹ dinin yɛ ǹ bɔlɔ nɛ.

³⁰ Zudaasi na á goã min bibinaa lɛa duduu, á ziabaa ka a pàã tumaa nɛ a tɔrɔ minin lɛa. A saa a tenmaa waáraa ganaa, á ná a tɔrɔ narɛ duduu. A din nə laɛ, mà ǹ Nikanɔɔrɔ mìi kuru ka a gusin a nyàa nɛ, ǹ wo ǹ ne Zeruzalɛmu.

³¹ A dinmaa lɛ woo, á zaman sɔkɔn, á Lawa a wúlu-bɔlen koa bii-a wúlu-bɔ ǹ bǎã yɔrɔ-a. Bɛ kio á minin dia woe giɛ duru ǹ bǎã kaka a minin li.

³² Á Nikanɔɔrɔ babaraa lɛ mìi nyaa ǹ nɛ. Á bɛa gɛ̀-dɛle kɛ nyàa dɔ nyaa ǹ nɛ, á goã á saa lon ka din gole kɔ kɔ́n tɔrɔ nɛ, kɔn ka pàãyiidɛnaa a Lawa a kion sonbore kɛ nɛ.

³³ Bɛ kio, á bɛa min babaraa kɛ lɛwɔn kukuru bisin, á ǹ zũ bàanan la. Á Nikanɔɔrɔ nyàa lɔɔ lon Lawa a kion lɛ yɔrɔ-a, bɛ n nyɛɛ, a gàãnaabaa lɛ là yɛ a ganaa ka yɔrɔ mɛn nɛ.

³⁴ Ka bɛ nɛ, ǹ tumaa tɔ-bɔ ǹ loe lɔ Dɛnaa a tɔ golebaa nɛ lon. Maǹ pii: «Min mɛn bɛ́ á minin kurəə, mà a Lawa a kion nyan toa a goã gɔgɔrɛ wa, tɔ-bɔ n bɛ wɔ lɛa!»

³⁵ Zudaasi Nikanɔɔrɔ mìi lɛ yii duru ǹ bǎã kaka lɛ a kungɔn ganaa. A n sii lɛa a n yii foaã nɛ min tumaa yɔrɔ-a, mà Dɛnaa na á daa a tɔrɔ a gú ganaa.

³⁶ Zaman lɛ tumaa ná a yɔrɔ bɔ, mà ǹ baa wote bɔ lɛa, mà bɛa lɛawaa kɛ doamaa bie, yiri bɔ nɛ duduu wa. A die a n zɛnaa lɛ̀ gogoonmaa li, bɛ̀ Mardosee a lɛawaa n ka biɛ̃ nɛ. Mui a fulupaabaa (12) ǹ wɔ nɛ, ǹ nə́ bíi Adaara ka Aramu bɔlɔ nɛ, mui a lɛawaa fulusɔɔ (13).

Sɛ́wɔ kɛa kiɛ̃li a taasiɛn

³⁷ Sii mɛn bɛ́ á Nikanɔɔrɔ yɛ, a din ni kie. A saa bɛa biikoo kɛ ganaa lɔn, Zeruzalɛmu a kiwi na á goã Zuifu tɔrɔ a pàã la. Bɛ lɛ a lɛa nɛ, man golee ka maa boo sɛ́wɔ-n yɛlaa.

³⁸ Bɛ̀ a zɛnaa ǹ gɔn bǐɛ̃ kɔ, a n kɔɔ̃nɛ, má dɔ maa wɔ lɛ ganaa. Bɛ siɛ̃ paǹan tá a nɛ, là n nyaabaa nɛ a ganaa, ma bɛ́ má boo sii mɛn la, man má bɛ zɛnaa.

³⁹ A siĩni n duvɛ̃ yoreen mi hinlaa mu dinsɔɔ̃ wa. Sɛnɛ, bɛ̀ mu laanka duvɛ̃ nə́ n lɔlɔkɔn, a n mi ǹ màn sonbore lɛa, a n kɔɔ̃n lɛ-n. A din goon ne, sii gigiã a kaa kun nə toɛ ǹ nə́ boe la, ǹ nə́ lɛlɛ siin sɛ́wɔ kiɛ̃, min mɛnɛn bɛ́ a sɛ́wɔ pii, a n kɔɔ̃nɛ ǹ ganaa. Maa golee ǹ bǎã n kie.