Makaabee2 13 - LAWA A BOO SONBORE

Antiokuusu Epaatɔɔrɔ n Menelaasi dii á giɛ̃

¹ Lɛ̀ paabiɛ ka pusiwenmanangɔrɔ (149), Zudaasi laanka a minin nə́ ma, mà Antiokuusu Epaatɔɔrɔ n woe zia biɛ Zudee ganaa, kun ka zia-baali kuru gigiã nɛ.

² Liziasi n kii lɛ diɛ zii, a na a gána a dí-nyalin mìilandɛnaa lɛa, asɛ mɛn bɛ́ á goã doroo koe la. Ǹ gogoonmaa n grɛkin zia-baali kuru goon mìi la, ǹ nə́ doe sɔraasi duu paabiɛ ka fù (110 000) ǹ gòã nɛ, sùi da-baali duu sooro ka biɛsɔɔ (5 300) nɛ, ziabaa ǹ don-a díi fuəwenpaa nɛ, (22) ziabaa ǹ wotoro biɛsɔɔ (300) nɛ ka gɔyaa sa lɛ-bɔlen ne a nɛ.

³ Menelaasi n woe kunun ǹ ni ka yii kakabaa nɛ, a n kii lɛ foo taɛ̃ mà a wo nyɛɛnɛ, a n zoɛ̃ li mà a sã. A bie bɛ zɛnɛɛ a ná a gána kirisibiɛ wa, sɛnɛ, a giala mà a n taasɛ mà á tɔn a wúlu-bɔlen goledɛnaabaa ǹ dí kɛ yii.

⁴ Sɛnɛ, Dɛnaa, KIIN Kii, á màn da Antiokuusu a foo-yoo li, kɔn ka Menelaasi ni. Liziasi nyaa kii lɛ nɛ, mà koen kɛn lɛn kɛbiɛ kɛnɛn kɛnɛn, mà bɛa gɛ̀-dɛle kɛ lɛ nɛ a mìi lɛa. Bɛ ganaa, kii lɛ kɔ mà ǹ Menelaasi da zii Beere, mà ǹ dɛ bɛa bǎã kɛ lɛ a landa yii li.

⁵ Bɛa kiwi kɛ lɛ nɛ, wɔlɔ-lɛduə̃ ǹ bǎã goon tan, a wo lon tá doe mɛtərə fuə n sooro (25), a piɛ̃maa-n ka ton ne. Wɔlɔ-lɛduə̃ ǹ bǎã lɛ mìi ni, màn goon tan n bibiĩ, á n minin wɔrɛɛ paǹ din tumaa li ǹ kiɛ ton lɛ li.

⁶ Min mɛnɛn nə Lawa a kion mànan koã hinlaa ǹ nə́ gɛ̀-dɛ baraa zɛnaa, maǹ dii ka bɛn nɛ lon, bɛa bǎã kɛ lɛ nɛ. Bɛ kio, ma nə ǹ noɛ̃ ǹ kiɛ bɛa ton lɛ li mà ǹ gã.

⁷ A na á n baa miɛ̃, bɛa giĩ baraa Menelaasi kɛ lɛ tɔ́n gã. Ǹ da yala-n dinin wa,

⁸ á kɔnbɔ nɛ sɔnbɔraanɛ. Ka bɛ nɛ, á sii baraa gigiã zɛnaa Dɛnaa a wúlu-bɔ ǹ bǎã kɛ nɛ, tɛ kɛ nɛ ka ton sonbore kɛ nɛ. Haya, a din ton lɛ dɔ nɛ Menelaasi gã li.

Zudaasi gɔ̀lɔ̀baa yɛ Antiokuusu Epaatɔɔrɔ la Modini

⁹ Kii Antiokuusu n woe nyɛɛnɛ kəni, a yiri n piɛ̃ nɛ ka taasiɛ baraa nɛ. A n li a fuu kakan kaa Zuifun mìi ni, ǹ nə ǹ gũ ka ǹ di nə ǹ mɛnɛn zɛnaa.

¹⁰ Zudaasi bɛ́ á bɛa boo kɛ ma, a n nɔ̀n diɛ a tɔrɔ la, mà ǹ Dɛnaa nyankɔ penleen ka tèlò ne, á n pii: «Dɛnaa, da n dɔ wɔ lɛ, da n dɔ wɔ lɛ doo, wɔsɛn mɛnɛn bɛ́ n din a zaman lɛa, wɔ n die goɛ̃ wɔ gɔrɔn, wɔa gána a landa nɛ ka Lawa a kion sonbore kɛ nɛ!

¹¹ Wɔsɛn, n zaman lɛa, wɔ na a giala koe wɔ n piɛ̃ sii wɔ dinin gɔn wìi a lɛa. Dɛnaa, n nyan toa wɔ bɔ wɔ mɛnaa tɔrɔ bɔnɛɛ kɔsɔn kɛn giulun wa!»

¹² Zuifun lɛn tumaa lɛ kɔ bɛa dí kɛ lɛ ganaa kuni. Lɛawaa sɔɔ gɔ́ɔ̃ nɛ, ǹ nə́ goã ǹ musin la ǹ nə́ n yɔrɔ kɔ tán lɛ. Maǹ wuu pii ǹ nə́ n lɛ soɛ, ǹ nə́ Lawa sonbore kɛ nyankoe. Bɛ kio, Zudaasi nə́ ǹ foo taã, á laa ǹ ganaa mà ǹ nə n yɔrɔ bɔ, ǹ nə n yii dɔraa.

¹³ A n boo diɛ a dinsɔɔ̃ kun ka min golen ne. Bɛ kio, á yoo á mɛ zii la, a n sii lɛ yɔrɔ boe ka Dɛnaa a dɔmalɛ pàã nɛ. A re n yii diɛ mà kii a zia-baalin kɛn nə n kɔ Zudee lɛ ǹ Zeruzalɛmu si wa.

¹⁴ Zudaasi ziabaa lɛ a sii a binyəə kɛ doa kanaa-Zɛnaali ganaa. Bɛ kio, a na a minin foo taɛ̃, mà ǹ zia baa ka foo kakaan bɛ́ lɔn, yǎa gɛ̀ ganaa, ǹ landan lɛa nɛ, ǹ lɛ kaa kun dín ni, Zeruzalɛmu a lɛa nɛ, Lawa a kion a lɛa ka gána din kuturu wɔ nɛ. Zudaasi laanka a zia-baalin nə́ ǹ bǎã doa kunu Modini kiwi ganaa.

¹⁵ Á lɛ kaa kun boo da a sɔraasin manɛ: «Lawa á re gɔ̀lɔ̀baa yii!» Á foo taãnaan bɔ a min tenən bii. Tèlò basa li, á zia baa kunun ǹ ni, ǹ giã ǹ bǎã lɛ a paǹ mɛn bɛ́ kii a ziã n doa nɛ a nɛ, ǹ nə́ yoo bɛ gialaa. Á min duu paa (2 000) kɛ miã dɛ walan. Ka bɛ-n doo, a sɔraasin nə́ don-a díin lɛn goledɛnaa dɛ ka a dii mala wole ne.

¹⁶ Nyɔɔbaa nɛ, ǹ nə́ nyɛ́ɛ ka sii lɔlɔkɔn da ǹ ganaa ǹ giã ǹ bǎã lɛ din tumaa nɛ.

¹⁷ Bɛ̀ lɛ̀ bɛ́ á waa ǹ gɔ̀lɔ̀baa yɛ kio, Zudaasi laanka a minin nə́ woo. Ma nə bɛa sii kɛ yɔrɔ bɔ Dɛnaa pàã ganaa, asɛ mɛn nə n dɔ ǹ lɛ á ǹ tamaa.

Antiokuusu Epaatɔɔrɔ n là nyantoro sii yɔrɔ boe kun ka Zuifun ni

¹⁸ Kii Antiokuusu bɔ a siére-a mà Zuifun lɛn foo á tã. A n giɛ li a zia baa ǹ bǎãn lɛn ganaa ka yiri ni.

¹⁹ A n tɔ we kɔn-a ka Bɛti-Suuru ni, a n Zuifun duru ǹ bǎã kaka goon lɛa, a n tamaa nɛ sɔnbɔraanɛ, sɛnɛ, Zuifun nə́ a lɛ goa. Á wusoo á daa zia baa, ǹ nə́ boo la.

²⁰ Màn mɛn là bɛ́ Bɛti-Suuru minin ganaa, Zudaasi bɛ kɔ ǹ la.

²¹ Sɛnɛ, Zuifun lɛn sɔraasi goon ne, a tɔ n Rodokusu, á sɔraasin lɛn boo-duriin pɛ zɔ́ɔn lɛn manɛ. Maǹ giɛ li, ǹ nə́ kũ ǹ nə́ dɛ á gã.

²² Kii lɛ kɔn yɛ ka Bɛti-Suuru minin ni, ka a paabaa ǹ wɔ nɛ. A n li a là nyantoro sii yɔrɔ bɔ kunun ǹ ni. Ǹsɛn nə́ lɛ kɔ, Antiokuusu ná a zia-baalin si.

²³ Bɛ kio, á zia baa Zudaasi laanka a sɔraasin ganaa, sɛnɛ, ǹ nə́ boo la. Kii lɛ Filipi toa Antiɔsi. A na á da a kiibaa ǹ bǎã a mànan sii yɔrɔ bɔ mìi la. A da yaa, Filipi yoo kɔn nɛ. Antiokuusu a sii nə́ n lɔlɔkɔn. A n kɔn yii ka Zuifun lɛn nɛ, a n sùn biɛ kunun ǹ ni, a n lɛ koe ǹ la ka ǹ bɛ́ nɔ̀n diɛ ka màn mɛn nɛ. A nə n liɛ mà a tá ǹ siin lɛ sii, a là nyantoro sii yɔrɔ bɔ kunun ǹ ni. Bɛ kio, á wúlu goon bɔ, a n Lawa a kion guguru koe, a n bǐɛ̃ gole

²⁴ biɛ nɛ, á Zudaasi Makaabee kũ doɛ̃ sɔnbɔraanɛ. Bɛ kio, kii lɛ Ezemonidi koa bɛa bǎã kɛa gánadɛnaa lɛa, a gɔn lɛ pəməbaa nə n toɛ Tolemayisi yǎa Geraa.

²⁵ A n woe Tolemayisi, sɛnɛ, bɛa kiwi kɛa minin foo a kɔɔ̃nɛ ka lɛ-kɔ kɛ nɛ á zɛnaa kun ka Zuifun ni wa. Ǹ foo n ziziɛ̃ nɛ, maǹ li ǹ bɛa lɛ-kɔ kɛ lɛ sàabaa.

²⁶ Bɛ ganaa, Liziasi boo saa á da min tumaa yɔrɔ-a. A n yɔ boe lɛ-kɔ lɛ ganaa ka a pàã tumaa nɛ. Á boo la á minin lɛn kurəə ǹ nə́ giã kiĩn ni. Á wusoo á ǹ kaa giã ǹ gɔn sonbore la. Bɛ kio, á woo Antiɔsi. Sii mɛn zɛnaa kii Antiokuusu a ziabaa ma-a biikoo li, a n din dɔ si ka yɔrɔ mɛn nɛ, bɛ n ka kɛ nɛ.