Loen 96 - LAWA A BOO SONBORE

Lawa lɛ n kii gole lɛa, a n guguru

¹ Ka loe dii lɔ Dɛnaa Lawa nɛ, kanaa min din tumaa loe lɔ Dɛnaa Lawa nɛ.

² Ka loe lɔ Dɛnaa Lawa nɛ, ka a tɔ kɔɔ̃n pɛ. Ka a minin si sii la lɛ laakalaa baraabaraa.

³ Ka a gugurubaa lɛ pɛ gána kɔsɔn minin bii, ka a nya ǹ dí sonboren kɛn dɔn pɛ, tɔrɔn tumaa bii.

⁴ Sonbore, Dɛnaa Lawa lɛ n gole. A din lɛ doamaa-n ka tɔ-bɔ nɛ. Á kakaarɛ á la guguru kɔ ǹ mànan tumaa nɛ.

⁵ Tɔrɔ kɔsɔn bɛ́ mànan mɛnɛn guguru koe, bɛn man màn kooron lɛa. Sɛnɛ, wɔsɛn Dɛnaa Lawa lɛ na á lon zɛnaa.

⁶ Lon màn siĩnin laanka a tɛ-pɛlen man a lɛnpɛnɛ, a kion kɛ piɛ̃maa nɛ, ka a din pàã laanka a zín ni.

⁷ Kanaa a tɔrɔn lɛn, ka da zín kɔ Dɛnaa Lawa la. Ka golee li, mà gugurubaa laanka pàã n Dɛnaa Lawa lɛ wɔ lɛa.

⁸ Ka golee li, mà gugurubaa lɛ na a din tɔ wɔ lɛa. Ka da ka kaa Lawa gɔ ǹ mànan nɛ, ka wɔ a kion lɛ a sumu-n.

⁹ Kanaa minin lɛn, bɛ̀ Dɛnaa Lawa ná a siĩnbaa lɛ nyaa, ka tumaa kaa tán, ka a guguru kɔ. Ka tumaa bìn da a yɔrɔ-a.

¹⁰ Ka pɛ tɔrɔ tumaa nɛ: Dɛnaa Lawa lɛ n kii lɛa, bɛ lɛ nɛ kanaa lɛ á golee ne, a ná a ba talɛɛ wa. Dɛnaa Lawa lɛ n kiri we minin-a, ka peperebaa nɛ, a ba bɔkɔnlɛ we wa.

¹¹ Lon mànan nə n nyɛnyɛɛ, tán wɔn nə bɛ̀ baa ka foo kɔɔ̃n nɛ, yìsi mu dɔ laanka a gɔ́ɔ̃gɔ́ɔ̃ ǹ wɔn nə bìn da.

¹² Don dɔ laanka a mànan tumaa zɔ́n zɛnaa. Dan mɛnɛn dɔn tumaa bɛ́ daãn gɔ́ɔ̃ nɛ, bɛn dɔn nə loe lɔ, ǹ nə n nyɛnyɛɛ.

¹³ Ǹ nə n nyɛnyɛɛ Dɛnaa Lawa lɛ yɔrɔ-a, a giala, mà á die. A n die a kiibaa koɛ kanaa kɛ nɛ. A kiri wɔ kanaa minin ganaa ka peperebaa nɛ. A n zɛnɛɛ a kɔnpɛ ka sonbore ne.