Zɔbu 4 - LAWA A BOO SONBORE

Elifaazi mà Zɔbu nə n foo doa Lawa ganaa

¹ Elifaazi mɛn bɛ́ boe Teman, bɛ́ tɔ́n nə n lɛ da boo lɛ nɛ, á pɛ kɛnɛn:

² «Maa boo-diɛ baran n nɔmaa wa, sɛnɛ, man ma a boe la, man lɛ tã wa. A si n ganaa n nə n too kɔ ma lon. A ke:

³ Táa ń min gigiã daraa lɛlɛ, ń nə́ n dɔ nɔmaa-wɔlen lɛ,

⁴ ń boo da ń mɛnaa wolen goa ń nə́ ǹ kaa lon, ń boo da, ń nə́ ǹ foo taã nɛ.

⁵ A bɛ́ nə n din mìi-n kanna, á ke, n ba sii n ganaa wa. Sii bɛ́ nə n din mìi-n kanna, n foo á ke á ziziɛ̃.

⁶ N bɛ́ mà nsɛ n nyɛ́ɛ biɛ Lawa nɛ, Lawa a re n doe n lɛ wa? N bɛ́ mà nsɛ n min pepere lɛa, wàa nə n foo biɛ niɛ᷉?

Elifaazi mà Lawa a fuu nyɛɛ min pepere-n wa

⁷ N yiri loo n kũ. N bin ma, mà sii pepere-zɛnaali bɔ̀n baa?

⁸ Masɛ màn mɛn yɛ, bɛ n ka kɛ nɛ: didie a zɛnaa ǹ sii n koe lɛ. Bɛ̀ ń zɛnaa baraa, baraa nə n yii.

⁹ Bɛ̀ min sii zɛnaa á Lawa foo yoo, bɛ n bɔ̀n biɛ. A foo-yoo lɛ n bɛ dii.

¹⁰ Min baraan lɛn man ka yàran bɛ́ lɔn wɔɔsaa we, sɛnɛ, Lawa nə́ ǹ wɔɔsaa-wɔ nya, á yàra nɛn sɔn yiyiɛ.

¹¹ Maǹ ka yàran bɛ́ lɔn, siĩ banban ǹ tá soɛ̃ wa. Bòo nə́ ǹ dɛ, ǹ nɛnyaanan nə́ sasawaa.

Elifaazi yɛ sii-nyaa nɛ

¹² Boo kɔn dɔ ma li ka durii ni, ma too bɛa lɛn lɔɔn ma.

¹³ Tèlò a sii-nyaan bɛ́ gɔ́ɔ̃-bii diɛ ma ganaa ǹ mɛn waáraa, minbuiinin bɛ́ ǹ nə́ nyuù wɔ ǹ nə́ kã ǹ mɛn waáraa,

¹⁴ nyɛ́ɛ laanka gɔ̀nɔn bìn diɛ na á daa ma kũ, ma gù tumaa ná a bìn da.

¹⁵ Piɛ̃ kɔn daa kiɛ̃ ma yɔrɔ-a, ma gɔ̀nɔn ka tumaa yoo á golee lon gurusuu.

¹⁶ Màn goon na á goã golee-n walan, sɛnɛ, màn mɛn bɛ́ nɛ, ma a doɛ̃ wa, màn nyín na á goã ma yɔrɔ-a. Má tɔ́n lɛn goon ma boo diɛ zuũzuũ kɛnɛn:

¹⁷ Minbuiin nɛ á boe la a goã pepere Lawa yɔrɔ-a? Minbuiin nɛ á boe la a goã *yoreene a zɛnaali yɔrɔ-a?

¹⁸ Bɛ̀ Lawa ba waa nɛ a dí-nyalin lɛn dinin la wa, bɛ̀ a tá lon a dia dí-a wolen sãn yii,

¹⁹ sanparɛ ka min mɛnɛn bɛ́ giã-n tii kionən kɛn nɛ, ǹsɛn mɛnɛn bɛ́ boe tii li, bɛ̀ ǹ nə ǹ puru ka nyuun bɛ́ lɔn.

²⁰ Wasa zii goon gɔ́ɔ̃ nɛ, maǹ bɔ̀n biɛ. Maǹ papaɛ̃ ǹ nə n bɔ bii-a duduu, a ba min din yii li ǹ sii lɛa wa.

²¹ Ǹ nyin biɛ na á na. Maǹ giɛ̃, sii-doɛ̃ ná a ba ǹ lon wa.