Zɔbu 28 - LAWA A BOO SONBORE

Fɔlɔ sonbore n boe tán

¹ Taãn nɛ, ǹ bɛ́ wɔrɔ we kɛ boe bǎã mɛn nɛ, ǹ bɛ́ sana a yisi boe li bǎã mɛn nɛ, bɛ wɛɛ̃ bie wa.

² Fɔlɔ ke, maǹ a dɔ boe tán, maǹ kɔlɔ yoe, ǹ zan bɔ a nɛ.

³ Minbuiin nɛ n tɛ lɛ siɛ̃, a tán guguru yǎa a woe doe kɔlɔ durii kɛ-a wɔlɔ tì li yala-n.

⁴ A n yala foɛ̃, a wɔlɔ n sɔsɔɔ minbuiinin giã ǹ bǎã ganaa. Walan, min gòã ba doe wa. Maǹ nə n loonlaanboe biɛ ganaa ǹ dí nya, ǹ wɔlɔ n sɔsɔɔ minbuiinin ganaa.

⁵ Tán kɛ lɛ, màn-bii n boe a nɛ, a gɔ́ɔ̃ lɔlɔkɔnmaa n ka tɛ nɛ.

⁶ Kɔlɔ bɔlɔndɛnaa giɔ̀mɔ kakan man boe walan. Sana wùsu dɔ n boe bɛ lɛ nɛ.

⁷ Zankoo ba a zii doɛ̃ wa, zèwo yii bin yɛ wa.

⁸ Don màn babaraan bin nə bɔ walan wa, don a yàra bin kiɛ̃ walan wa.

⁹ Minbuiin nɛ n boe a mɛ gɛ̀fu la a kuru, a n kele wɔrɛɛ a giala-a tán.

¹⁰ A n kɔlɔ yui a zii bɔ a nɛ, màn mɛn tumaa á màn sonbore lɛa, a yii n bɛ tumaa yii.

¹¹ A n belen doe, a mu kɔɔ̃ a kaa a kio, màn mɛn bɛ́ durii ni, a bɛ bɔ a da fúlu-a.

Sii-doɛ̃ á soɛ fɔlɔ sonbore yɛ nɛ

¹² Sɛnɛ, sii-doɛ̃ ke, min nə bɛ yii maa? Yiridɛnaabaa ke, bɛ n yii bǎã mɛn nɛ?

¹³ Minbuiinin ba a giɔ̀mɔ doɛ̃ wa, a ba yii yiikoonaan kanaa kɛ-n wa.

¹⁴ Ta ma n nɔ̀n diɛ mu nyankɔrɔ zuzulu kɛ la, a n pii mà a ba asɛ-n wa. Ta ma n nɔ̀n diɛ kɔ̀ mu dɔ la, a dɔ n pii mà a yii asɛ li wa.

¹⁵ A ba n lonkoe ka sana kuturu-n wa, a ba n pii ka wɔrɔ-n wa.

¹⁶ Sana sonbore a doe li wa, kɔlɔ tɔrɔ giɔ̀mɔ kaka-a kɛ kɔn ba doe li wa.

¹⁷ Sana laanka kɔlɔ tɛ-pele ba n zoɛ̃ a ganaa wa. Min ba yii sana sonbore donkolon yii goon ganaa wa.

¹⁸ Kɔlɔ tɔrɔ sonbore kɛ kɔn boo ba n diɛ a li wa. Bɛ̀ min ga sii-doɛ̃ li, bɛ á soɛ bɔlɔ-a ǹ gii giɔ̀mɔ kaka-a nɛ.

¹⁹ Kɔlɔ sonbore kùsidɛnaa ke tɛ pii, bɛ dɔ giɔ̀mɔ a doe a ganaa wa. A ba n zoɛ̃ kɔn ka sana sonbore-n wa.

Lawa dinsɔɔ̃ n sii-doɛ̃ bǎã doɛ̃

²⁰ A bɛ́ miɛ̃, sii-doɛ̃ lɛ din nə boe maa? Yiridɛnaabaa ke, bɛ n yii bǎã mɛn nɛ?

²¹ A n durii-n kanaa a màn yiikoonaa tumaa ganaa, a n durii-n lon a bàanan dɔn dinin ganaa.

²² Geren piɛ n pii: «Wɔ too ná a boo ma.»

²³ Sɛnɛ, Lawa dinsɔɔ̃ na a kiɛ̃ ǹ zii doɛ̃, a dinsɔɔ̃ na a giã ǹ bǎã doɛ̃.

²⁴ A giala, a yii n wɔlɔ yii yǎa kanaa lɛ doa ǹ bǎã ganaa. Màn mɛn tumaa bɛ́ lon kɛ giulun, a na a tumaa yii.

²⁵ A bɛ́ pàã yɔrɔ boe koe piɛ̃ la ǹ mɛn waáraa, á n mu a mɔnaa lɛ dan zoɛ̃ koɛ,

²⁶ a bɛ́ á landa koa tà mu la ǹ mɛn pinaa, á kiɛ̃ ǹ zii kɔ la a tɛ-pɛ laanka la a paraa la,

²⁷ bɛa biikoo li, Lawa sii-doɛ̃ yɛ, á ga a ganaa, á ná a sii din gɔsɛ a yii bɔ, á ná a laakalaa.

²⁸ Bɛ kio á tɔ́n pɛ minbuiin nɛ nɛ: «N nyɛ́ɛ baa Dɛnaa Lawa nɛ, bɛ lɛ n sii-doɛ̃ lɛa, n nə n nyɛnaa sii baraa nɛ, bɛ n yiridɛnaabaa lɛa.»