Sii yɔrɔ-bɔlen 19 - LAWA A BOO SONBORE

Levii tɔrɔ goon laanka a lɔ a sii Gibeya kiwi

¹ Kii bɛ́ a goã Izirayeli minin lɛn mìi la ǹ mɛn waáraa wa, Levii tɔrɔ goon na á goã giã-n Efrayimu a kele yii bǎã kɛ kio. Á goã we lɔ goon lɛ Bɛtlehɛmu kiwi, Zudaa gána nɛ.

² Lɔ lɛ kɔrɔbaa zɛnaa nɛ, á soo á n bɔ li, á woo ǹ di kion, Bɛtlehɛmu kiwi, Zudaa gána nɛ. Á giã walan yǎa mui sii.

³ Ǹ zuũ lɛ yoo á woo a kio, a n woe boo diɛ nɛ, màn mɛn bɛ́ toɛ, ǹ kũ ǹ da-n piɛ. A dí-nyali na á goã kun ni, ka dundun màn paa nɛ. Lɔ lɛ kũ á wɔ nɛ ǹ di a kion. Lɔ lɛ di bɛ́ á yɛ, á yoo á n da lɛ ka nyɛnyɛɛ nɛ.

⁴ Ǹ daãgiĩ lɛ, a lɔ lɛ a yɛ ǹ di lɛa, bɛ́ kurəə, á giã a piɛ yǎa lɛawaa sɔɔ. Ǹ nə́ màn bii, ǹ nə́ màn mi bɛ̀ ǹ lɛ̀ waa walan.

⁵ A lɛawaa siibaa ǹ wɔ pinaa, ǹ nə́ yoo baayɛlɛ yiisoone. Levii min lɛ bɛ́ á n yɔrɔ bɔ mà a n die woe, lɔ lɛ a díi pɛ nɛ mà a màn-bii kɔn bii a n gù doa nɛ, bɛ kio, a tɔn woo.

⁶ Ǹ dinin min paa giã tán, ǹ nə́ màn bii, ǹ nə́ màn mi. Lɔ lɛ a díi tɔ́n pɛ giĩ lɛ nɛ: «Masɛ nə n nyankoe, lɛ kɔ n waa kànaa pelo, ń giɛ ma dɔ foo á kɔɔ̃n koe.»

⁷ Giĩ lɛ bɛ́ á goã n yɔrɔ boe mà a n die woe, ǹ daãgiĩ lɛ nə́ n lɛ laa a ganaa. Á nɔmaa á n susu, á tèlò goon lɛ zɛnaa walan doo.

⁸ A lɛawaa soorobaa ǹ wɔ pinaa, á yoo baayɛlɛ yiisoone, mà a n die woe. Sɛnɛ, lɔ lɛ a díi pɛ giĩ lɛ-n doo: «Ma nə n nyankoe n màn bii, n golee yǎa wasa basɛ̃.» Ǹ dinin min paa màn bii kun.

⁹ Giĩ lɛ nə́ n yɔrɔ bɔ mà a n die woe, a laanka a lɔ lɛ nɛ, ka a dí-nyali lɛ nɛ. Sɛnɛ, ǹ daãgiĩ lɛ, lɔ lɛ a yɛ ǹ di lɛa, bɛ́ wusoo á pɛ nɛ: «Wasa á ke miɛ̃, wɔlɔ n giɛ li á tii. Waa kànaa. Wasa á ke miɛ̃, masɛ nə n nyankoe, waa kànaa pelo, ń giɛ n dɔ foo á kɔɔ̃n koe. N tá re yui biɛ̃ baayɛlɛ yiisoone ka zii saa. N tá re doe piɛ.»

¹⁰ Sɛnɛ bɛa pinaa kɛ nɛ, Levii min lɛ lɛ kɔ á waa wa. A yoo á zii saa ka a lɔ nɛ, ka dundun màn paa kɛ dɔ nɛ kɛkɛrɛ nə́ ǹ dɔ̀ɔ̃ nɛ. A woo á dɔ Zebuzu kiwi yɔrɔ-a, bɛ n ka Zeruzalɛmu ni.

¹¹ Ǹ bɛ́ dirii Zebuzu kiwi la, bɛ̀ wasa mɛ taãn-taãnɛ. Dí-nyali lɛ tɔ́n pɛ a dɛnaagiĩ-n kɛnɛn: «Zebuzu minin kiwi á ke. Daa wɔ wo waa walan.»

¹² A dɛnaagiĩ lɛ ná a lɛ si: «Wɔ a re golee tɔrɔ kɔsɔn kiwi kɛ-n kànaa wa, kiwi mɛn nə́ ke, Izirayeli min goon ná a ba a-n wa. Wɔ n die woe yǎa Gibeya kiwi.»

¹³ Levii tɔrɔ lɛ wusoo á pɛ a dí-nyali lɛ nɛ: «Daa wɔ wo bǎãn kɛn goon ne, Gibeya hinlaa Ramaa, wɔ waa walan.»

¹⁴ Ǹ nə́ kiɛ̃ ǹ nə́ woo. Wasa bɛ́ n yii siɛ̃, bɛ̀ maǹ Gibeya lɛkoro-a. Gibeya lɛ n Bɛnzamɛn tɔrɔn kɛn kiwi lɛa.

¹⁵ Ǹ nə́ tele bɛa bǎã lɛ ganaa, mà maǹ woe wɛɛ Gibeya kiwi. Levii tɔrɔ lɛ wɔ kiwi lɛ gɔ́ɔ̃ nɛ, á giã tán kiwi lɛ a zaman paã ǹ bǎã nɛ. Sɛnɛ, min kɔn yɛ, á ǹ kũ, mà ǹ da waa asɛ a piɛ wa.

¹⁶ A din wasamiɛ̃n lɛ nɛ, bɛ̀ giĩ gole goon nə́ ke boe a wuru dí nyaǹ bǎã-n die piɛ. Efrayimu a kele yii bǎãn kɛn min goon ne. Sɛnɛ, a na á goã giã-n Gibeya. A da yaa, bɛa bǎã lɛ a minin man Bɛnzamɛn tɔrɔn lɛa.

¹⁷ Giĩ gole lɛ bɛ́ á n yii saa á ga, á zii tɔ-wɔle lɛ yɛ giã-n tán kiwi lɛ a zaman paã ǹ bǎã nɛ. Giĩ gole lɛ tɔ́n nɔ̀n da la mà a n boe maa? Mà a n woe maa?

¹⁸ Levii tɔrɔ lɛ ná a lɛ si kɛnɛn: «Wɔsɛn man boe Bɛtlehɛmu kiwi, Zudaa gána nɛ. Wɔ n woe Efrayimu gána a kele yii bǎãn kɛn kio. Walan min nə ka masɛ nɛ. Man boe Bɛtlehɛmu kiwi, wusii woe piɛ. Ma min din yɛ má n yu la wa.

¹⁹ A da yaa, làpaa laanka buu tá wɔsɛn lon, wɔa dundunun wɔ lɛa. Màn-bii laanka duvɛ̃ dɔ tá ma lon ma din laanka maa lɔ kɛ wɔ lɛa ka tɔntɔraa kɛ nɛ, ma diɛ zii. Màn kɔn wɛɛ̃ ba wɔ ganaa wa.»

²⁰ Giĩ gole lɛ tɔ́n pɛ nɛ: «Lawa die a là nyantoro kɔ n la! N laadoo bɛ́ màn mɛn tumaa ganaa, masɛ á re bɛ koe n la. Sɛnɛ, n baran waa kanaa zaman paã ǹ bǎã kɛ-n wa.»

²¹ Á ǹ kũ á woo ǹ ne a kion, á buu kɔ dundunun lɛn la. Zii tɔ-wɔlen lɛn nə́ n gòãn pii, ǹ nə́ màn bii, ǹ nə́ màn mi.

²² Ǹ bɛ́ tán màn bii pɔpasɛ pɔpasɛ, bɛ̀ kiwi lɛ a minin nə́ ke die. Min gɛsɛn manɛ. Ǹ nə́ kion lɛ lɛnpɛnɛ, ǹ nə́ kiɛnlɛ dɛdɛ. Giĩ gole mɛn bɛ́ kiondɛnaa lɛa, ǹ nə́ pɛ bɛ-n kɛnɛn: «Giĩ kɛ lɛ á wɔ n kion, a bɔ n soo ne, màn mɛn bɛ́ toɛ, wɔsɛn nə giã kun ni.»

²³ Kion lɛ a dɛnaa soo á pɛ ǹ nɛ: «Ma dɔɔ̃nɔn lɛn, masɛ n ka nyankoe, ka nyan toa ka sii baraa zɛnaa wa. Kanna, giĩ kɛ lɛ bɛ́ masɛ a tii lɛa, ka baran toa ka bɛa sìi da ǹ sii kɛ zɛnaa wa.

²⁴ Maa nɛlɔ á ke, a tɔn giĩ dɔ̃ wa, giĩ lɛ dɔ din a lɔ tan. Ma á re soe ka bɛn nɛ, ma ǹ kɔ ka la. Ka n la nyɛɛ bɛn lɛn ganaa. Bɛ̀ sii mɛn kɔɔ̃n kɔ ka ganaa, ka zɛnaa ǹ nɛ. Sɛnɛ, ka baran toa ka sìi da ǹ sii kɛ miã zɛnaa giĩ kɛ ganaa wa.»

²⁵ Minin lɛn ba lɛ koe ǹ tá n too koe a lon wa. Bɛ lɛ nɛ, Levii tɔrɔ kɛ ná a lɔ lɛ kũ, á woo kɔ ǹ la kanaa. Ǹ nə́ giã kun ni, ǹ nə́ bɔ a yii ni tèlò tumu gɔ́ɔ̃ nɛ, yǎa lɛ̀ woo waa. Wɔlɔ bɛ́ á fulu, ǹ nə́ n gɔn bɔ a ganaa, ǹ nə́ da.

²⁶ Lɛ̀ bɛ́ re wɛɛ, lɔ lɛ zuũ lɛ goã min mɛn a kion, lɔ lɛ daa mɛnaa tán bɛa kiɛnlɛ-a, á goã tán walan yǎa lɛ̀ waa.

²⁷ Ǹ zuũ lɛ yoo baayɛlɛ yiisoone, á kion lɛ a kiɛnlɛ bũ, á soo mà a n die zii siɛ, bɛ̀ a lɔ á ke nyɔmaa-n tán kiɛnlɛ-a, a gɔnɔn nə́ kiɛnlɛ baãbii.

²⁸ Á tɔ́n pɛ nɛ: «Yoo wɔ woo.» Sɛnɛ, lɔ lɛ na a lɛ si wa. Giĩ lɛ tɔ́n saa á da a dundun la, á n bɔyaa á woo piɛ.

²⁹ A bɛ́ á dɔ piɛ, á gɔya saa, á ná a lɔ lɛ gere kukuru, kurii fulupaa, á dia Izirayeli tɔrɔn lɛn tumaa la.

³⁰ Min mɛn tumaa bɛ yɛ, bɛn nə́ goã pii: «A saa Izirayeli minin soo Ezipti biikoo ganaa a da pelo yaa, min bin sii kɛ miã zɛnaa wa, min dɔ bin yɛ wa.» Levii tɔrɔ lɛ min mɛnɛn dia, á pɛ bɛn manɛ mà ǹ pɛ Izirayeli minin lɛn tumaa-n kɛnɛn: «A saa kaa soo Ezipti biikoo ganaa a da pelo yaa, sii kɛ miã bin nə n zɛnaa wa. Bɛ lɛ nɛ, ka n taasɛ a ganaa, ka nɔ̀n dada kɔn la, ka boo da a gɔ́ɔ̃ nɛ.»