Sii yɔrɔ-bɔlen 1 - LAWA A BOO SONBORE

Zia mɛn nə n baa Kanaan gána a gusin a lɛ̀gɔn la

¹ Zozoe a gɛ̀ kio, Izirayeli minin nə́ nɔ̀n da Dɛnaa Lawa la ǹ nə́ pɛ: «Wɔ tɔrɔ kɛ mɛn nə die woe bibinaa nɛ, a zia baa Kanaan gána minin kɛn ganaa?»

² Dɛnaa Lawa nə́ ǹ lɛ si á pɛ: «Zudaa tɔrɔ minin man die woe. Á ke, má gána lɛ wɔ ǹ gɔn.»

³ Zudaa tɔrɔ minin nə́ pɛ ǹ dɔɔ̃n Simiɔn tɔrɔ minin manɛ: «Bǎã mɛn dɔ wɔsɛn ganaa, ka n ta kun ka wɔsɛn nɛ walan, wɔ zia baa Kanaan minin kɛn ganaa. Bɛ kio, bǎã mɛn dɔ ka dɔn ganaa, wɔ dɔn tá re woe kun ka nɛ walan.» Simiɔn tɔrɔ minin nə́ woo kunun ǹ ni.

⁴ Zudaa tɔrɔ minin nə́ woo, Dɛnaa Lawa dɔ Kanaan minin laanka Perɛzi tɔrɔn wɔ ǹ gɔn. Ǹ nə́ ǹ giĩ duu fù (10 000) dɛ Bezɛki gána nɛ.

⁵ Ǹ nə́ Bezɛkin kii yɛ Bezɛki gána nɛ, ǹ nə́ zia baa a ganaa. Ǹ nə́ Kanaan minin laanka Perɛzi minin dɛ.

⁶ Bezɛkin kii baa si. Sɛnɛ, ǹ nə́ loo ǹ nə́ kũ, ǹ ná a gɔn a gòon mìi golen laanka a gòãn wɔn kuru.

⁷ Bezɛkin kii tɔ́n pɛ: «Kii pɔsɔbaa na á goã màn-bii bisin goɛ masɛ a màn bii ǹ goo giulun, ǹ gɔn a gòon mìi golen laanka ǹ gòãn wɔn nə́ kurii ni. Ma sii mɛn zɛnaa, a din lɛ n ke Lawa ma saraa nɛ.» Ǹ nə́ woo ne Zeruzalɛmu, á gã walan.

⁸ Zudaa minin nə́ yoo Zeruzalɛmu gialaa ǹ nə́ kũ. Ǹ nə́ kiwi minin lɛn dɛ ǹ nə́ tɛ da kiwi lɛ ganaa.

⁹ Bɛ kio, Kanaan minin mɛnɛn bɛ́ giã-n kele yii bǎã kɛ nɛ, ǹ mɛnɛn bɛ́ giã-n gusin a lɛ̀gɔn la ka ǹ mɛnɛn dɔn bɛ́ giã-n nyankɔrɔ basa kɛ nɛ, Zudaa minin nə́ woo zia baa bɛn ganaa tán nɛ.

¹⁰ Bɛ kio doo, Kanaan minin mɛnɛn bɛ́ Ebrɔn, Zudaa minin lɛn nə́ woo bɛn gialaa. Lɛlɛ, maǹ nə́ goã Ebrɔn lɛ bíi mà Arabaa a kiwi. Ǹ nə́ Sesayii tanlɛ minin dɛ, ka Ayiman laanka Talmayii wɔn nɛ.

¹¹ Zudaa minin nə́ n toa walan, ǹ nə́ woo Debiiri minin gialaa. Lɛlɛ, maǹ nə́ goã Debiiri kiwi lɛ bíi mà Sefɛɛrɛ kiwi.

¹² Kalɛbu na á goã á pɛ: «Min mɛn bɛ́ re boe la a Sefɛɛrɛ kiwi minin kɛn dɛ, a kiwi lɛ kũ, ma á re maa nɛlɔ Aksaa koe bɛa dɛnaa la lɔ lɛa.»

¹³ Ɔtniyeli mɛn bɛ́ Kalɛbu ǹ diɛ̃ Kenaazi a nɛgiĩ lɛa, bɛ́ kiwi lɛ kũ. Kalɛbu ná a nɛlɔ Aksaa kɔ la lɔ lɛa.

¹⁴ Aksaa bɛ́ á dɔ Ɔtniyeli a kion lɔn, a na á Ɔtniyeli sɔmɔ mà a wuru nyankɔ asɛ a díi la. Aksaa bɛ́ á gisĩ á n bɔ a dundun la, Kalɛbu nɔ̀n da la mà a n lɔn?

¹⁵ Aksaa ná a lɛ si kɛnɛn: «Bǐɛ̃ kɔ masɛ ganaa. N bɛ́ ń tán kɔ ma la gusin a lɛ̀gɔn la, mu bǎãn kɔnɔn dɔn kɔ ma la.» Kalɛbu mu bǎãn kɔnɔn kɔ la lon li, á ǹ kɔnɔn dɔn kɔ la tán li.

¹⁶ Muizu n daãgiĩ Kenii tɔrɔn nə́ yoo sèwo dan kiwi kɛ nɛ kun ka Zudaa minin ni, ǹ nə́ woo Zudaa diə gole ne, Aradi a gusin a lɛ̀gɔn la. Ǹ nə́ daa giã kun ka zaman lɛ nɛ.

¹⁷ Zudaa tɔrɔn nə́ woo kun ka ǹ dɔɔ̃n Simiɔn tɔrɔn nɛ. Kanaan minin mɛnɛn nə goã Sefati, ǹ nə́ bɛn dɛ. Ǹ nə́ Sefati kiwi ziziɛ̃ lenlen. Ǹ nə́ kiwi lɛ bíi bɛ kio mà Hɔrma.

¹⁸ Zudaa minin nə́ Gaazaa laanka a lɛkoro bǎãn kũ, Asikalɔn laanka a lɛkoro bǎãn nɛ, ka Ekrɔn laanka a lɛkoro bǎãn nɛ.

¹⁹ Dɛnaa Lawa goã kun ka Zudaa minin ni, ǹ nə́ kele yii bǎãn lɛn kũ ǹ nə́ baa ǹ wɔ lɛa. Sɛnɛ, ǹ boo la ǹ nə́ nyankɔrɔ basadɛnan kɛn loo wa, a giala, fɔlɔ wotoron man nə́ goã bɛn lon, ǹ nə́ zia biɛ nɛ.

²⁰ Ǹ nə́ Ebrɔn kiwi kɔ Kalɛbu la ka Muizu goã á pɛ lɔn. Kalɛbu Anaaki a nɛgiĩ sɔɔ tɔrɔn kɛn loo, á ǹ bɔ walan.

²¹ Zebuzu tɔrɔn kɛn, ǹ nə́ goã giã-n Zeruzalɛmu, Bɛnzamɛn tɔrɔn lɛn nə bɛn loo wa. Zebuzu tɔrɔn tɛnɛn nə́ giã kun ka Bɛnzamɛn tɔrɔn nɛ Zeruzalɛmu yǎa á daa kaa pelo lɛ.

Betɛli kuĩ

²² Zozɛfu tɔrɔn dɔn nə́ woo Betɛli gialaa. Dɛnaa Lawa goã kunun ǹ ni.

²³ Zozɛfu tɔrɔn nə́ minin dia Betɛli, mà ǹ wo ga a ganaa bɔrɔ ǹ dɔ̃. Lɛlɛ, kiwi lɛ tɔ na á goã Luuzu.

²⁴ Ga bǎã ganaa wolen lɛn nə́ giĩ goon yɛ soe kiwi lɛ gɔ́ɔ̃ nɛ. Ǹ nə́ pɛ nɛ: – Bǐɛ̃ kɔ n kiwi lɛ a wɔ ǹ bǎã nyaa wɔsɛn manɛ, wɔ á re bǐɛ̃ zɛnɛɛ n nɛ.

²⁵ Á kiwi lɛ a wɔ ǹ bǎã nyaa ǹ nɛ. Ǹ nə́ kiwi minin lɛn dɛ, sɛnɛ, ǹ nə́ giĩ kɛ lɛ sɛ toa walan á woo, kun ka a tanlɛ minin tumaa nɛ.

²⁶ Bɛa giĩ lɛ woo Ɛti tɔrɔn gána nɛ, á kiwi goon koa walan, á tɔ kɔ a ganaa mà Luuzu. Bɛ lɛ na a tɔ lɛa, yǎa a da kaa pelo lɛ.

Ǹ bɛ́ ǹ kiwin mɛnɛn minin loo wa

²⁷ Manaasee tɔrɔn nə boo la ǹ nə́ Bɛti-Seyan kiwi minin laanka a kio kiwin kɛn minin loo wa. Tanaki kiwi laanka a kio kiwin ni, Dɔɔrɔ kiwi laanka a kio kiwin ni, Zibleyia kiwi laanka a kio kiwin ni, Megidoo kiwi laanka a kio kiwin ni, ǹ bɛn kɔn a minin loo wa. Kanaan minin nə́ wusoo ǹ nə́ n zɔ̃ ǹ nə́ giã bɛa gána lɛ nɛ.

²⁸ Izirayeli minin bɛ́ ǹ nə́ pàã yɛ, ǹ nə́ dí kaka da Kanaan minin lɛn mìi ni. Sɛnɛ, ǹ nə ǹ loo wa.

²⁹ Kanaan minin mɛnɛn nə goã giã-n Gezɛɛrɛ, Efrayimu tɔrɔn nə bɛn loo wa. Kanaan minin lɛn nə́ nɔmaa ǹ nə́ giã Gɛzɛrɛ, Efrayimu tɔrɔn lɛn bii.

³⁰ Zabulɔn tɔrɔn nə Kitrɔn kiwi minin loo wa. Ǹ boo la ǹ nə́ Naalɔlu dɔ wɔn loo wa. Kanaan minin nə́ giã Zabulɔn tɔrɔn bii, sɛnɛ, Zabulɔn tɔrɔn lɛn nə́ ǹ kaa pàã dí nya ganaa.

³¹ Asɛɛrɛ tɔrɔn nə Akoo kiwi minin loo wa. Ǹ Sidɔn kiwi dɔ wɔn loo wa, Alabu wɔn nɛ, Akziibu wɔn nɛ, Ɛlbaa wɔn nɛ, Afiki laanka Rehɔbu wɔn nɛ.

³² Kanaan minin mɛnɛn nə goã giã-n gána lɛ nɛ Asɛɛrɛ tɔrɔn nə́ giã bɛn bii, a giala, ǹ goã ǹ nə́ ǹ loo wa.

³³ Nɛfutalii tɔrɔn nə Bɛti-Semɛsi minin laanka Bɛti-Anaati minin loo wa. Kanaan minin mɛnɛn nə goã giã-n gána lɛ nɛ, ǹ nə́ giã bɛn bii. Sɛnɛ, maǹ nə́ Bɛti-Semɛsi laanka Bɛti-Anaati minin kaa pàã dí nya ganaa.

³⁴ Amɔɔrɔ tɔrɔn nə́ Dan tɔrɔn loo ǹ nə́ ǹ dia kele yii bǎã kɛ nɛ, ǹ toa ǹ nə́ gisĩ nyankɔrɔ basa kɛ-n wa.

³⁵ Amɔɔrɔ tɔrɔn nə́ wusoo ǹ nə n zɔ̃ ǹ nə́ giã Harɛrɛsi kiwi, Ayalɔn nɛ, ka Salbimu ni. Sɛnɛ, Zozɛfu tɔrɔn lɛn pàã bɛ́ á la ǹ nɛ ǹ mɛn waáraa, ǹ nə́ ǹ kaa pàã dí nya ganaa.

³⁶ Amɔɔrɔ tɔrɔn gána lɛ n siɛ "tonən kele" kɛ ganaa lɛ̀nyɛɛnɛ a wo dɔ Selaa, a kiɛ̃ a wo nyɛɛnɛ.