Ezekieli 44 - LAWA A BOO SONBORE

Siin mɛnɛn bɛ́ toɛ min nə boo la a wɔ Lawa a kion

¹ Giĩ lɛ wusoo á n bɔyaa ka ma nɛ, á daa Lawa kion a kiɛnlɛ kɛ lɛ-a, ǹ mɛn lɛ yɔrɔ bɛ́ dia-n lɛ̀giala gɔn la. Wɔ́ woo yaa tiɛ̃ nɛ.

² Dɛnaa Lawa tɔ́n pɛ ma-n kɛnɛn: «Bɛa kiɛnlɛ lɛ n die goɛ̃ tiɛ̃-n kɛnɛn, min doamaa bie a bũ wa. Min kɔsɔ doamaa bie a wɔ ka bɛa kiɛnlɛ lɛ-n wa, a giala, Dɛnaa Lawa, Izirayeli minin Lawa lɛ na á wɔ nɛ. A doamaa nɛ a goã tiɛ̃-n.

³ Sɛnɛ, goledɛnaa lɛ sɛ, a goledɛnaabaa taman yii, bɛ á re giɛ̃ tán walan, a màn bii tán masɛ Dɛnaa Lawa yɔrɔ-a. A n die we ka dàã li a kiɛnlɛ kɛ nɛ, a wusoo a soo ka bɛ lɛ nɛ.»

⁴ Bɛ kio, giĩ lɛ ma kũ á bɔ ka gɔsɛ a lɛ̀gɔn la a kiɛnlɛ kɛ nɛ, á wɔ ka ma nɛ, yǎa Lawa a kion kɛ yɔrɔ-a. Ma bɛ́ giɛ, bɛ̀ Dɛnaa Lawa a gugurubaa á ke, a gialaa kion lɛ piɛ̃. Má tɔ́n bɔ má mɛnaa tán ma lɛ la.

⁵ Dɛnaa Lawa tɔ́n nə n toa ma ganaa kɛnɛn: – Minbuiin a nɛ, n yii dɔraa taãn-taãnɛ. Ma bɛ́ re landan mɛnɛn tumaa pii n ni Dɛnaa Lawa a kion lɛ wɔ paǹ li, ka a dí nya ǹ gɔn tumaa nɛ, n yii bũ doɛ̃, n too kɔ doɛ̃. Ma bɛ́ re boo mɛn tumaa pii n ni Lawa a kion lɛ a wɔ ǹ kiɛnlɛn laanka a soo ǹ kiɛnlɛn wɔ paǹ li, n doa n nə n yiri kɔ bɛn li a tɔ-a.

Tiin doamaa bɛ́ nɛ ǹ sii mɛn zɛnaa

⁶ N die n pɛ Izirayeli tɔrɔn piã-wɔlen lɛn manɛ, mà masɛ Dɛnaa Lawa n ke pii: «Izirayeli tɔrɔn lɛn, kaa sii bɔbɔnɛɛ zɛnaa lɛ la yii-n kəni.

⁷ Ka bɛ́ ka goã *wúlu màn kɛ koe ma la ǹ mɛn waáraa, màn nyɔɔ laanka màn mà kɛ nɛ, tɔrɔ kɔsɔn kɛn soroman lɛa ma bɔlɔ tii, ka n ka goã nɛn bɛ̀ ka bɛn kũ ka wɔ ǹ nɛ maa kion sonbore lɛ nɛ, ka *gɔ̀ da a ganaa. Kaa sii bɔbɔnɛɛn lɛn man nə́ toa, lɛ kɔ kɔn la mɛn bɛ́ ma laanka ka bii, bɛ́ ziziɛ̃.

⁸ Ka doamaa bɛ́ nɛ ka dí mɛn nya maa màn sonboren kɛn wɔ lɛa, ka bɛ nya wa. Sɛnɛ, ka ǹ ká tɔrɔ kɔsɔn bɔ, ká ǹ kaa bɛa dí lɛ a nyɛɛ ganaa ka bǎã nɛ.»

⁹ Bɛ lɛ taman yii, Dɛnaa Lawa n kɛ pii: «Tɔrɔ kɔsɔn lɛn soroman lɛa, ǹ mɛnɛn lɛn bɛ́ ǹ nə́ ma bɔlɔ tii, bɛ kɔn ba re we masɛ a kion sonbore kɛ-n doo wa, haalɛ ta ǹ dɛnaa n giã nɛ Izirayeli minin kɛn bii.

Levii tɔrɔn doamaa bɛ́ nɛ ǹ siin mɛnɛn zɛnaa

¹⁰ «Sɛnɛ *Levii tɔrɔn kɛn ǹ nə́ ma toa walan, ǹ nə́ wusoo ǹ nə́ n bɔ ma kio, ǹ nə́ kɔ ǹ dìn kɛn kio lɛ ka Izirayeli tɔrɔ gialakunun kɛn bɛ́ lɔn, ǹ tá re n toɛ̃ ka ǹ sii baraa a guĩ ni.

¹¹ Ǹ tá re goɛ̃ maa kion kɛa dí-nyalin lɛa, bɛ̀ ǹ na a kiɛnlɛn lɛduə̃. Ǹ dinin man die wúlu màn tiɛ̃n kɛn tɔɔn laanka wúlu màn kɔsɔn kɛn tɔɔn dii, zaman lɛ wɔ lɛa. Ǹ dinin man die golee, bɛ̀ ǹ dí nya zaman lɛ nɛ.

¹² A giala, ǹ nə́ wúlu bɔ dìn ganaa zaman lɛ a lɛa, ǹ nə́ Izirayeli minin lɛn nyanaa, ǹ nə́ ǹ kaa sii baraa nɛ. Bɛ lɛ na á toa masɛ Dɛnaa Lawa a da ǹ boo á ke: Ǹ tá re n toɛ̃ ka ǹ sii baraa a guĩ ni.

¹³ Ǹ doamaa bie ǹ nə n mɔrɔ ma ganaa doo, mà maǹ Lawa a wúlu bɔle baa ǹ dí nyɛɛ wa. Mànan mɛnɛn bɛ́ ǹ nə́ ǹ koa ma nɛ, bɛn nɛ ka bǎã sonbore sonbore kɛ nɛ, ǹ doamaa bie ǹ nə n mɔrɔ bɛn ganaa wa. Ǹ sìi da ǹ siin laanka sii bɔbɔnɛɛn mɛnɛn zɛnaa, ǹ tá re n toɛ̃ ka a guĩ ni.

¹⁴ Man die ǹ koɛ kion lɛ a dí-nyalin lɛa, sii mɛn tumaa bɛ́ n zɛnɛɛ a nɛ, ǹ bɛ yɔrɔ bɔ.

Lawa a wúlu-bɔlen doamaa bɛ́ ǹ siin mɛnɛn zɛnaa

¹⁵ «Lawa a wúlu-bɔle Levii tɔrɔn kɛn sɛn Sadɔki tɔrɔn lɛa, a laanɛ Izirayeli minin gialakunun kɛn nə́ wusoo ǹ nə́ n bɔ ma kio, bɛn nə́ maa kion lɛ a dí nya sɔnbɔraanɛ. Bɛn dininsɔɔ̃nɔn man die boe la ǹ nə n mɔrɔ ma ganaa, ǹ dí nya ma nɛ, ǹ wúlu mànan kɛn nyɔɔ laanka ǹ mà kɔ ma la. Ma din Dɛnaa Lawa a da ǹ boo ne.

¹⁶ Ǹ dininsɔɔ̃nɔn man die we maa kion lɛ nɛ. Ǹ dininsɔɔ̃nɔn man die n mɔrɛ maa goo kɛ ganaa, ǹ dí nya ma nɛ, ma màn mɛn dɔ pɛ a dí lɛ wɔ paǹ li, ǹ bɛ tamaa.

¹⁷ Ǹ mɔnaa guguru sonboren kɛn wɔ, ǹ tɔn wɔ ka sumu gɔ́ɔ̃ a kiɛnlɛn kɛn nɛ. Bɛ̀ ǹ tá re dí nyɛɛ sumu gɔ́ɔ̃ a kiɛnlɛn lɛn lɛ-a ka kion lɛ gɔ́ɔ̃ nɛ, ǹ baran sère ka mɔnaan kɛn wɔ wa.

¹⁸ Ǹ mɔnaa guguru sonbore gɔnɔn yii ǹ mìi ganaa, ǹ mɔnaa guguru bɛ̀rɛ̀n dɔn wɔ ǹ bɔsɔ̃-n. Sɛ̀fuu lɛ taman yii, ǹ baran maabɛlɛ yii ǹ bɔsɔ̃-n wa.

¹⁹ Bɛ̀ ǹ nə́ nya ǹ nə́ soe die zaman lɛ li sɔmɔ gɔ́ɔ̃ nɛ, ǹ dí nya ka mɔnaan mɛnɛn lɛn nɛ, ǹ bɛn waa ǹ nə ǹ kaa tán kion nɛn lɛn gɔ́ɔ̃ nɛ, ǹ dɔnkɛn kɔsɔn goa, ǹ nə ǹ wɔ. Ǹ zɛnaa miɛ̃ màn mɛn bɛ́ toɛ ǹ baran sii saa ǹ zaman lɛ gɔ nɛ, ka ǹ wɔ ǹ mɔnaan kɛn nɛ wa.

²⁰ Wúlu-bɔlen lɛn baran n mìi kɔɔ̃ wa. Ǹ nyan toa ǹ mìi ka sɔsɔrɔ kɔ a la yii-n wa, sɛnɛ, ǹ kuru a zɛnɛ wɔlɔ lɛ.

²¹ Bɛ̀ wúlu-bɔle mɛn tá re we Lawa a kion lɛ a sumu gɔ́ɔ̃ kɛ nɛ, a nyan toa a duvɛ̃ wɔ a lɛ-n wa.

²² Lɔ mɛn bɛ́ lɔ giɔɔrɔ lɛa, hinlaa ǹ mɛn zuũ bɛ́ á loo, ǹ nyan toa ǹ bɛ wɔ lɔ lɛa wa. Yǎa nɛniɛ mɛn bɛ́ a giĩ doɛ̃ wa, Izirayeli tɔrɔ lɛa. Wúlu-bɔle mɛn bɛ́ á gã, ǹ tá boe la dɔn ǹ bɛa lɔ saa.

²³ Màn mɛn bɛ́ Lawa wɔ lɛa, màn mɛn bɛ́ a ba a wɔ lɛa wa, màn *yoreen laanka màn gɔgɔrɛ nɛ, ǹ tá re maa zaman lɛ darɛɛ bɛn bɔkɔnlɛ ganaa.

²⁴ Bɛ̀ sii tá minin bii, ǹ dinin lɛn doamaa nɛ, ǹ na a yɔrɔ bɔ. Ǹ doamaa nɛ ǹ na a yɔrɔ bɔ a kɔnpɛ ka maa sii yɔrɔ bɔ ǹ gɔn nɛ. Ma dí-pɛn laanka landa boon mɛnɛn kɔ ǹ la, ǹ maa zɔ́nɔn kɛn tumaa zɛnaa a kɔnpɛ ka bɛn nɛ, ǹ maa susu ǹ piin kɛn tamaa masɛ wɔn lɛa.

²⁵ «Lawa a wúlu-bɔle baran wo gere la wa, a kiɛ̃ a gɔ̀ da a din ganaa. Yǎa ǹ di gere, hinlaa ǹ dan wɔ, hinlaa a nɛgiĩ wɔ, hinlaa a nɛlɔ wɔ, ǹ dɔɔ̃n hinlaa ǹ miãnɛn wɔ, ǹ mɛn bɛ́ a tɔn wɔ giĩ li wa.

²⁶ Bɛ̀ ǹ mɛn gɔ̀ da a din ganaa miɛ̃, bɛ̀ á gɔ̀ bɔ a din ganaa ǹ mɛn pinaa, a n yii da yǎa lɛawaa sɔbaa a tɔn dí nya.

²⁷ A bɛ́ re we Lawa a kion lɛ a sumu gɔ́ɔ̃ kɛ nɛ ǹ mɛn pinaa mà a n dí nyɛɛ a nɛ, a màn dɛ sii baraa sawaa ǹ wúlu màn lɛa. Ma din Dɛnaa Lawa a da ǹ boo ne.

²⁸ Wúlu-bɔlen lɛn wɔ gii-n ka maa dí-nyalibaa kɛ nɛ. Bɛ lɛ nɛ, ǹ baran bǎã kɔ ǹ la Izirayeli gána kɛ-n wa. Ma dinmaa Lawa nə ǹ wɔ gii lɛa.

²⁹ Ǹ dinin man die Lawa gɔ ǹ mànan kɛn bii, ǹ sii baraa sawaa ǹ wúlu mànan kɛn siĩ sɔ̃. Bɛ̀ ǹ nə́ màn mɛn koa maa wɔ lɛa yǎa duduu, bɛ á re ǹ wɔ biɛ.

³⁰ Màn tumaa a lɛ bibinaa sonbore ne, màn mɛn tumaa a sonbore bɛ́ n boe ka gɔn mànan tumaa nɛ Lawa wɔ lɛa, bɛn man doe wúlu-bɔlen lɛn ganaa. Ka die ka kaa *wùsu sonbore kɔ wúlu-bɔlen lɛn la, màn mɛn bɛ́ toɛ ma barka da kaa kion ganaa.

³¹ Bɛ̀ màn mɛn gã, hinlaa ta mànan man nə́ kũ, ta bàan nɛ hinlaa ta don màn nɛ, Lawa a wúlu-bɔle doamaa bie a bɛ sɔ̃ wa.