Ezekieli 20 - LAWA A BOO SONBORE

Izirayeli minin n bɔlɔgoonbaãdɛnaabaa

¹ Ǹ nə́ Izirayeli minin goa, ǹ nə́ woo ǹ ne bǎã kɔsɔ nɛ. Ǹ goa lɛ a lɛ̀ sɔbaabaa ǹ wɔ, a mui soorobaa ǹ wɔ a lɛawaa fùbaa ǹ wɔ pinaa, Izirayeli min golen sii yɔrɔ-bɔlen kɔnɔn nə́ daa giã tán ma yɔrɔ-a, ǹ nə́ nɔ̀n da ka Dɛnaa Lawa foo sii ni.

² Dɛnaa Lawa tɔ́n boo kɛ da ma nɛ á pɛ:

³ – Minbuiin a nɛ, boo da ka Izirayeli min golen sii yɔrɔ-bɔlen lɛn nɛ, n pɛ ǹ nɛ: Á ke, masɛ Dɛnaa Lawa n kɛ pii: «Ka n ka daa nɔ̀n da masɛ la? A ma toa ma yii n koo, ma a re toɛ kasɛn kɛn nə nɔ̀n da ma la wa!» Ma din Dɛnaa Lawa a da ǹ boo ne.

⁴ Minbuiin a nɛ, n doamaa bie n kɛn toa walan wa. Ǹ zɛ̀rɛ baa. Ǹ digolon nə sii bɔbɔnɛɛn mɛnɛn zɛnaa, bɛn pɛ ǹ nɛ.

⁵ A pɛ ǹ nɛ mà masɛ Dɛnaa Lawa n kɛ pii: «Ma bɛ́ má Izirayeli tɔrɔn lɛn yii gɔgɔɔ̃ ǹ mɛn pinaa, má n liɛ Zakɔba tɔrɔn lɛn nɛ. Má n din nyaa ǹ nɛ Ezipti gána nɛ, má n liɛ má pɛ: Ma din Dɛnaa Lawa n kaa Lawa lɛa.

⁶ Bɛa pinaa kɛ lɛ nɛ, má n liɛ má pɛ, máa ma á re ka wɛɛ ma ka bɔ Ezipti gána nɛ, ma gána mɛn yɔrɔ bɔ ma koa ka nɛ, ma wo ka-n walan. Bɛa gána lɛ á siĩni, á la gánan tumaa nɛ. Bɔ̀nyaa laanka zoo nyɔɔ bɛ́ baa sii gána mɛn nɛ.

⁷ Má pɛ ǹ nɛ kɛnɛn: Màn bɔbɔnɛɛn kɛn ka yɔrɔ-a, didie na a wɔn goa, a ǹ zũ. Ka baran n dinin gɔgɔrɛ kɔ ka Ezipti minin dìn kɛn nɛ wa, masɛ din Dɛnaa Lawa n kaa Lawa lɛa.

⁸ «Sɛnɛ, ǹ nə́ n gòãn dii ma ganaa, ǹ lɛ kɔ ǹ nə́ n too kɔ ma lon wa. Màn bɔbɔnɛɛn mɛnɛn bɛ́ ǹ yɔrɔ-a, min kɔn na a wɔn kaa wa, ǹ Ezipti minin dìn kɛn toa walan wa. Má tɔ́n pɛ ma din gɔ́ɔ̃ nɛ, máa ma foo mɛn yoo ǹ li ke, máa yǎa ma dɔlɔ diɛ ǹ mìi ni, yǎa man foo nyɛɛ ǹ la Ezipti gána lɛ din gɔ́ɔ̃ nɛ.

⁹ Sɛnɛ, ma din tɔ taman yii, ma sii kɔn zɛnaa ǹ nɛ wa, màn mɛn bɛ́ toɛ, ka digolon bɛ́ giã-n tɔrɔn mɛnɛn bii, bɛn baran ma tɔ ziziɛ̃ wa. A giala, ma lɛ kɔ mɛn wɔ ǹ nɛ máa ma á re ǹ wɛɛ ma ǹ bɔ Ezipti gána nɛ, bɛa tɔrɔn kɛn lɛn tá a siére-a.

¹⁰ Má ǹ waa má ǹ bɔ Ezipti gána-n sonbore, ma woo ǹ ne diə gole kɛ gɔ́ɔ̃ nɛ.

¹¹ Má maa landa boon kɛn kɔ ǹ la, má ǹ daraa maa sii yɔrɔ bɔ ǹ boon kɛn ganaa. Bɛ̀ minbuiin nɛ mɛn tá koe bɛn lɛ, ǹ dɛnaa yii á re goɛ̃ koo.

¹² Man má *susu ǹ pii dɔ koa sii a kɔnboe lɛa ǹ bii, màn mɛn bɛ́ toɛ ǹ dɔ̃, mà ma din Dɛnaa Lawa n má ǹ bɔ ma din wɔn lɛa.

¹³ Sɛnɛ, Izirayeli minin nə́ n gòãn dii ma ganaa diə gole lɛ nɛ. Ǹ kɔ maa landa boon kɛn lɛ wa, ǹ nə́ maa sii yɔrɔ bɔ ǹ boon lɛn tii, ǹ mɛnɛn lɛn kɔmalɛ bɛ́ toɛ min yii goã koo. Ǹ nə́ maa susu ǹ piin kɛn ziziɛ̃ á la yii ni. Ma tɔ́n pɛ máa ma foo mɛn yoo ke, man die dɔlɔ diɛ ǹ mìi ni diə gole lɛ nɛ, ǹ nə ǹ dɛ lenlen.

¹⁴ Sɛnɛ, man má sii lɛ zɛnaa ma din taman yii, màn mɛn bɛ́ toɛ, ma ǹ waa tɔrɔn mɛnɛn yii ni má ǹ bɔ Ezipti gána nɛ, bɛn baran ma tɔ ziziɛ̃ wa.

¹⁵ Má wusoo má n liɛ ǹ nɛ diə gole lɛ-n doo má pɛ ǹ nɛ máa ma goã má gána mɛn lɛ kɔ ǹ la, bɔ̀nyaa laanka zoo nyɔɔ bɛ́ baa sii gána mɛn nɛ, siĩni á la gánan tumaa nɛ, máa ma a re we ǹ ne walan doo wa.

¹⁶ A giala, ǹ nə́ maa sii yɔrɔ bɔ ǹ boon kɛn puusə kɔ, ǹ tɔ wɔ á kɔnpɛ ka maa landa boon kɛn nɛ wa, ǹ nə́ maa susu ǹ piin kɛn ziziɛ̃. A giala, ǹ taasiɛ na á goã doa nɛ ǹ dìn lɛn ganaa.

¹⁷ Sɛnɛ, má makara bɔ ǹ ganaa, má ǹ dɛ lenlen má ǹ nya diə gole lɛ-n wa.»

Izirayeli minin Lawa bɔlɔ tii

¹⁸ Má kɛ pɛ ǹ nɛnyaanan manɛ don lɛ nɛ: «Ka baran kɔ ka digolen landa siin kɛn lɛ wa, ka baran ǹ sii zɛnaa ǹ gɔn saa wa, ka baran ǹ dìn kɛn guguru kɔ, ka *gɔ̀ da ka dinin ganaa wa.

¹⁹ Ma din Dɛnaa Lawa n kaa Lawa lɛa. Ka tɔ wɔ a kɔnpɛ maa landa boon kɛn nɛ, ka maa sii yɔrɔ bɔ ǹ boon kɛn tamaa, ka kɔ ǹ lɛ.

²⁰ Ka maa susu ǹ piin lɛn koa maa wɔ lɛa. Bɛ n sii a kɔnboe lɛa, á n toɛ minin nə dɔ̃ mà masɛ Dɛnaa Lawa n kaa Lawa lɛa.

²¹ Sɛnɛ, ǹ nɛnyaanan lɛn dɔn nə́ n gòãn dii ma ganaa. Ǹ tɔ wɔ á kɔnpɛ ka maa landa boon kɛn nɛ wa, ǹ nə́ maa sii yɔrɔ bɔ ǹ boon kɛn tamaa, ǹ nə́ kɔ ǹ lɛ wa. Bɛn lɛn kɔmalɛ dɔ n toɛ min yii goã koo. Ǹ nə́ maa susu ǹ piin kɛn dɔn ziziɛ̃. Bɛ lɛ na á toa má tɔ́n pɛ máa ma foo mɛn yoo ke, man die dɔlɔ diɛ ǹ mìi ni, yǎa man foo nyɛɛ ǹ la diə gole kɛ lɛ nɛ.

²² Sɛnɛ, má wusoo ka ma gɔn nɛ, ma din tɔ taman yii ma sii lɛ zɛnaa wa, màn mɛn bɛ́ toɛ, ma ǹ waa tɔrɔn mɛnɛn yii ni má ǹ bɔ Ezipti gána nɛ, ma tɔ nyan toa a ziziɛ̃ bɛn bii wa.

²³ Má wusoo má n liɛ ǹ nɛ don lɛ nɛ má pɛ máa ma á re ǹ sasawɛɛ ma ǹ kaa tɔrɔ kɔsɔn bii, ma ǹ pɛpɛsɛ̃, ma ǹ kaa gána kɔsɔn nɛ.

²⁴ A giala, ǹ goã koe maa sii yɔrɔ bɔ ǹ boon kɛn lɛ wa, ǹ nə́ n piã ka maa landa boon kɛn nɛ, ǹ nə́ maa susu ǹ piin kɛn ziziɛ̃, ǹ nə́ n yiin doa ǹ digolon dìn kɛn la.

²⁵ Landa siin mɛnɛn bɛ́ ǹ ba re kuu biɛ ǹ nɛ wa, ka sii yɔrɔ bɔ ǹ boon mɛnɛn dɔn bɛ́ ǹ ba re toɛ ǹ yii goã koo wa, ma bɛn kɔ ǹ la.

²⁶ Má toa ǹ nə́ gɔ̀ da ǹ dinin ganaa ka ǹ wúlu mànan kɛn nɛ, ǹ nə́ wúlu bɔ ka ǹ nɛgiĩ bibinaa tumaa nɛ. Man má toa ǹ nə́ bɛa sii bɔbɔnɛɛ kɛ lɛ zɛnaa ǹ dinin manɛ, màn mɛn bɛ́ toɛ ǹ dɔ̃, mà ma din nə Dɛnaa Lawa lɛa.»

Lawa n die Izirayeli minin dì guguru kɔ dan biɛ

²⁷ Bɛ lɛ taman yii, minbuiin a nɛ, boo da Izirayeli tɔrɔn lɛn manɛ n kɛ pɛ ǹ nɛ: «Masɛ Dɛnaa Lawa gole n kɛ pii: Ka digolon lɛn man nə́ goã bɔlɔ tii ǹ sii zɛnɛɛ, ǹ nə́ we ma lon miɛ̃ duduu.

²⁸ Ma goã má n liɛ ǹ nɛ máa ma á re gána mɛn koe ǹ la, má bɛ kɔ ǹ la. Sɛnɛ, ǹ bɛ́ walan, bɛ̀ ǹ nə́ tenten yɛ sasa lon, hinlaa ta da nɛ á luu pã ka kɛkɛ, maǹ nə́ goã wúlu boe walan. Wúlu mànan mɛnɛn bɛ́ ma foo yui, ǹ nə́ bɛn kɔ walan, ǹ nə́ goã woe ka foo basã ǹ nyɔɔ gìĩ kɔɔ̃n kɛ-n walan, ǹ nə́ goã duvɛ̃ zumii walan.

²⁹ Ma tɔ́n pɛ ǹ nɛ: Ka n ka woo wàa zɛnaa tenten sasan kɛn la? Maǹ tɔn bɛa bǎã lɛ bíi "Bama" bɛ giala mà "tenten sasa", a da kaa pelo lɛ.»

³⁰ Bɛ lɛ taman yii, kɛ pɛ Izirayeli tɔrɔn lɛn manɛ: «Masɛ Dɛnaa Lawa gole n kɛ pii: Haya! Ka bɛ́ ká ka digolon giã ǹ gɔn saa, ká kɔrɔbaa zɛnaa kun ka ǹ dì bɔbɔnɛɛn kɛn nɛ, ka n ká *gɔ̀ da ka dinin ganaa.

³¹ A da kaa pelo lɛ, ka n ká gɔ̀ da ka dinin ganaa ka kaa dìn kɛn lɛn tumaa nɛ. Ka nə ǹ goe ka mànan nɛ, ka n kaa nɛnyaanan tiɛ̃ *wúlu màn lɛa. Izirayeli tɔrɔn lɛn, man ka toɛ bɛ lɛ zɛnɛɛ kəni, ma wusoo ma lɛ kɔ ka nɔ̀n da ma la ka sii ni? Bɛ̀ ma toa ka nɔ̀n da ma la ka sii ni, ma din Lawa yiikoonaa kɛ bie wa. Ma din Dɛnaa Lawa a da ǹ boo ne.

³² Ka na a gialaa pii mà kasɛn man zoɛ̃ li ka n baa ka tɔrɔ kɔsɔn kɛn bɛ́ lɔn, ká gána kɔsɔn kɛn tanlɛ minin bɛ́ lɔn, ka dìn guguru kɔ, dìn mɛnɛn bɛ́ gɔn lɛa hinlaa kɔlɔ lɛa. Bɛa taasiɛ kɛ lɛ á wɔ ka yiri ni, a zɛnaa ba giala yii wa.

³³ A ma toa ma yii n koo, man die giɛ̃ ka mìi la, ma maa foo-yoo kɛ nyaa ka nɛ. Man die pàã zɛnɛɛ ka nɛ, ma maa boo sii la nyaa. Ma din Dɛnaa Lawa a da ǹ boo ne.

³⁴ Ma goã má ka pɛsɛ̃ gánan mɛnɛn nɛ, tɔrɔn mɛnɛn bii, ma á re maa foo-yoo kɛ nyɛɛ ka nɛ, ma tɔn ka waa bɛn bii ka pàã laanka boo sii la nɛ, ma ka sɔkɔn.

³⁵ Ma á re woe ka-n diə gole ne, ma ka na ma ka bɔ tɔrɔ kɔsɔn-a, ka á re golee ma yɔrɔ-a walan ma kiri kuru ka la.

³⁶ Ma goã má kiri kuru ka digolon la lɔn Ezipti diə gole kɛ nɛ, man die kuri ka dɔn la miɛ̃. Ma din Dɛnaa Lawa a da ǹ boo ne.

³⁷ Man die ka gɔgoɛ̃ ka tɔɔ-lɛduə̃li bɛ́ a tɔɔn gɔgoɛ̃ lɔn, ma tɔn ka kaa maa lɛ kɔ kɔn la kɛ nɛ.

³⁸ Min mɛnɛn nə n piã ka ma nɛ, ǹ nə́ ma bɔlɔ tii, má á re bɛn wɛɛ ma ǹ bɔ kun ka nɛ. Ǹ bɛ́ ǹ nə́ woo giã gána kɔsɔ mɛn nɛ, ma á re ǹ wɛɛ ma ǹ bɔ walan, sɛnɛ, ǹ gòã na a re miɛ̃ Izirayeli gána-n wa. Ka á re doɛ̃ ka bɛ-n kəni, mà ma din nə Dɛnaa Lawa lɛa.»

³⁹ Izirayeli minin lɛn, sisia kəni, man kɛ pii ka nɛ: «Ka wo kaa dìn lɛn guguru kɔ! Bɛ̀ ka a re n too koe ma lon wa, ma á re giɛ a ganaa. Ma tɔ sonbore kɛ sɛ, ma a re lɛ koe, ka wúlu mànan kɔ kaa dìn la ka bɛ ziziɛ̃-n wa.

⁴⁰ A giala, ka Izirayeli tɔrɔn lɛn tumaa, ka mɛnɛn tumaa bɛ́ re giɛ̃ gána lɛ nɛ, ka n die ma guguru koe maa kele kɛ la, Izirayeli a kele sasa kɛ la. Man die n diɛ ka lɛ walan sɔnbɔraanɛ. Ka bɛ́ re mànan mɛnɛn tumaa boe, wúlu màn sonboren lɛa ka kɔ ma la, ma á re lɛ koe bɛn ganaa walan. Ma din Dɛnaa Lawa a da ǹ boo ne.

⁴¹ Ka bɛ́ pɛsiɛ̃-n gánan mɛnɛn nɛ, bɛ̀ má ka waa má ka bɔ tɔrɔ kɔsɔn kɛn bii walan má ka sɔkɔn ǹ mɛn waáraa, ma á re n diɛ ka lɛ sɔnbɔraanɛ, ka nyɔɔ gìĩ kɔɔ̃n kɛ bɛ́ lɔn, a sii n kiɛ ma foo la. Man die bɛ zɛnɛɛ ka nɛ, ma maa Lawa taãnbaa nyaa tɔrɔ kɔsɔn lɛn manɛ.

⁴² Bɛ̀ má daa ka nɛ Izirayeli tán la ǹ mɛn waáraa, gána kɛ nɛ, ma goã má n liɛ má ma á re koe ka digolon la, ka á re doɛ̃ bɛa waáraa, mà ma din nə Dɛnaa Lawa lɛa.

⁴³ Kaa tɔ wɔ ǹ gɔn nɛ, kaa zɛnaa ǹ siin kɛn tumaa nɛ, ka ǹ mɛnɛn lɛn zɛnaa ká ka dinin gɔgɔrɛ kɔ nɛ, ka yiri á die gisĩ ka bɛn nɛ walan. Ka tìĩ á re boe ka dinin nyin ni, kaa sii baraan kɛn taman yii ká ǹ zɛnaa.

⁴⁴ Izirayeli minin lɛn, ma a re ka kuĩ kaa zɛnaa ǹ sii babaraan laanka kaa nya ǹ dí bɔbɔnɛɛn kɛn li wa. Sɛnɛ, ma tɔ kɛ bɛ́ re gugurubaa yii lɔn, man ka kuĩ á kɔnpii ka bɛ nɛ, màn mɛn bɛ́ toɛ ka dɔ̃ mà ma din nə Dɛnaa Lawa lɛa.» Ma din Dɛnaa Lawa a da ǹ boo ne.