Ezekieli 13 - LAWA A BOO SONBORE

Soɛ-bɔlen mɛnɛn bɛ́ Lawa a boo gii diɛ

¹ Dɛnaa Lawa boo da ma nɛ á pɛ:

² – Nsɛ minbuiin a nɛ, min mɛnɛn bɛ́ n dinin biɛ Lawa a boo gii-dalin lɛa Izirayeli gána nɛ, ǹ nə́ boo diɛ ǹ dinin gɔn wìi a lɛa, sɛ̀ pɛ ǹ ganaa. A pɛ ǹ nɛ, maǹ nə n too kɔ masɛ Dɛnaa Lawa a da ǹ boo li.

³ Masɛ Dɛnaa Lawa n kɛ pii: Lawa a boo gii-dalin kɛn baãnaan lɛa, koe ǹ dinin taasiɛn lɛ, a da yaa ǹ yii sii kɔn yɛ wa, bɔ̀n na á bɛn yɛ.

⁴ Izirayeli minin lɛn, kaa Lawa a boo gii-dalin lɛn man ka tolokan bɛ́ lɔn, n bibiĩ kɛbɔlɔn la.

⁵ Kungɔn lɛ a yalan mɛnɛn bɛ́ ǹ tan, ǹ bɛn tã wa, ǹ kungɔn dɔ ǹ nə́ Izirayeli tɔrɔn lɛn lɛnpɛnɛ nɛ wa, màn mɛn bɛ́ toɛ, ka n gòãn doa Dɛnaa Lawa a foo-yoo pinaa kɛ-n wa.

⁶ Sii-nyaa kooron manɛ ǹ tá yii, maǹ nə n gɔn noɛ̃: «Dɛnaa Lawa a da ǹ boo ne.» A da yaa, masɛ Dɛnaa Lawa nə ǹ dia wa. Maǹ nə n yii diɛ kəni, mà masɛ sii lɛ zɛnaa a kɔnpɛ ka ǹ da ǹ boo ne.

⁷ Man pii ǹ ni: «Ka n sii-nyaa kooron yii, ka nə n gɔn noɛ̃, ka n pii mà masɛ Dɛnaa Lawa a da ǹ boo ne, a da yaa ma boo da ka-n wa.»

⁸ Bɛ lɛ na á toa masɛ Dɛnaa Lawa á kɛ pii: «Ka sii-nyaa kooron mɛnɛn pɛsɛ̃, ka soɛn mɛnɛn bɔbɔ, bɛn lɛn taman yii, ma á re die ka gialaa.» Ma din Dɛnaa Lawa a da ǹ boo ne.

⁹ Lawa a boo gii-dalin mɛnɛn bɛ́ sii-nyaa kooron yii, ǹ nə́ soɛ boon didiɛ, masɛ á re goɛ̃ kɔn ka bɛn nɛ. Ǹ ba re goɛ̃ kun ka maa zaman nɛ doo wa. Izirayeli tɔrɔn tɔ bɛ́ kiɛ̃-n sɛ́wɔ mɛn nɛ, ǹ tɔ dɔ a re n kiɛ̃ walan doo wa, ǹ ba re we Izirayeli gána-n doo wa. Ka á re doɛ̃ ka bɛ lɛ-n kəni, mà masɛ din nə Dɛnaa Lawa lɛa.

¹⁰ Maǹ maa minin lɛn bebele mà «là nyantoro tan», a da yaa là nyantoro din banban. Maa zaman lɛ bɛ́ kungɔn mɛn doe, ǹsɛn man bɛ gialaa tɔrɛ.

¹¹ Min mɛnɛn lɛn bɛ́ a gialaa tɔrɛ, a pɛ ǹ nɛ ma kungɔn lɛ á re kiɛ. A giala, la gole á re die, á re kiɛ ka gii ni, piɛ̃ gole á re boe.

¹² Bɛ̀ kungɔn lɛ kaa ǹ mɛn waáraa, minin tá re pii ka nɛ, mà «a tɔrɛɛ là n ka wàa nɛ?»

¹³ Bɛ lɛ na á toa masɛ Dɛnaa Lawa á kɛ pii: «Maa foo-yoo lɛ gɔ́ɔ̃ nɛ, ma á re piɛ̃ gole diɛ bɔ ganaa, ma la gole da kaa ganaa. Maa foo busii lɛ gɔ́ɔ̃ nɛ, la a gii mɛn nə ke wɔlɔ yui, ma á re bɛ kiɛ ǹ la.

¹⁴ Ka kungɔn mɛn lɛ tɔrɔ, ma á re nyɛnɛɛ ma duwəə tán, a gòã daa ǹ bǎã kɛ yɛ kanaa. Kungɔn lɛ á re kiɛ, ka dinin tá re papaɛ̃ a bii walan. Ka á re doɛ̃ ka bɛ lɛ-n kəni, mà ma din nə Dɛnaa Lawa lɛa.

¹⁵ Yǎa masɛ nə n foo nyɛɛ kungɔn kɛ laanka a tɔrɛɛ wolen la. Ma á re pii ka nɛ: Maa kungɔn lɛ kaa. A tɔrɛɛ wolen lɛn dɔn dinin banban doo wa.

¹⁶ Ǹ dinin Izirayeli gána a Lawa a boo gii-dalin lɛn mɛnɛn dɔn dinin nə goã boo diɛ Zeruzalɛmu wɔ paǹ li ǹ nə́ pii mà là nyantoro tan a da yaa là nyantoro din banban, bɛa boo gii-dalin lɛn dɔn dinin banban doo wa. Masɛ Dɛnaa Lawa a da ǹ boo ne.»

¹⁷ Nsɛ minbuiin a nɛ, n too kɔ: «N tɔrɔn lɔn mɛnɛn bɛ́ n dinin biɛ Lawa a boo gii-dalin lɛa, n yiin waa ǹ li dɛ! Maǹ boo diɛ á kɔnpii ka ǹ dinin taasiɛ nɛ. Maa boo gii kɛ da ǹ nɛ

¹⁸ n pɛ: Masɛ Dɛnaa Lawa n kɛ pii: Bɔ̀n tá re ka yii. A giala, ka n mɔnaa gɔnɔn zɛnɛɛ, ka n kiɛ min tumaa gɔn wìi-a, ka n pataran zɛnɛɛ, mà min tumaa bɛ kɔ a mìi lɛ, màn mɛn bɛ́ toɛ ka gɔn dɔ ǹ telenboenen ganaa. Ka n giɛ li ka maa zaman kɛa minin telenboenen kũ, ka dinin telenboenen kɛn, ka bɛn tamaa. Bɛ giala n ka wàa nɛ?

¹⁹ Ka masɛ yii puusə kɔ, maa zaman lɛ yɔrɔ-a, *ɔrzi gɔn yii goon a lɛa ka buuru lɛkoron ne. Ka doamaa bɛ́ nɛ ka min mɛnɛn yii toa koo, ka n bɛn dii; ka doamaa bɛ́ nɛ ka min mɛnɛn dɛ, ka ǹ bɛn yii toɛ koo. Maa zaman lɛ bɛ́ a ba n mìi bibiĩ doɛ̃ wa, ka nə ǹ yiri siɛ̃ ka bɛa yɔrɔ lɛ nɛ.»

²⁰ Bɛ lɛ na á toa masɛ Dɛnaa Lawa á kɛ pii ka nɛ: «Á ke, ka bɛ́ minin kuĩ ka mɔnaa gɔnɔn mɛnɛn lɛn nɛ, ma á re bɛa zia diɛ ka ganaa. Ma á re mɔnaa gɔnɔn lɛn tɔtoɛ̃ ma ǹ bɔ ǹ gɔn wìin ganaa. Ka min mɛnɛn lɛn kũ, ma á re bɛn sii ma ǹ kaa.

²¹ Ma á re kaa pataran lɛn tɔtoɛ̃, ma maa zaman kɛ kũ ma si ka la, ka gɔn ba re doe ǹ ganaa doo wa. Ka tá re doɛ̃ ka bɛ-n kəni, mà masɛ din nə Dɛnaa Lawa lɛa.

²² A giala ka n min sonbore foo ziziɛ̃ ka kaa soɛ boon kɛn lɛn nɛ. A da yaa, masɛ ba li, ma sii baraa zɛnaa min sonbore-n wa. Ka n min baraa foo taɛ̃, bɛ lɛ nɛ, a ba wusii a sii baraa zɛnaa kio, ń giɛ a yii á goɛ̃ koo wa.

²³ Sisia kəni, ka a re sii-nyaa kooron kɛn yii doo wa, ka a re n gɔn noɛ̃ doo wa. Ma á re maa zaman lɛ kuĩ ma si ka la. Ka á re doɛ̃ kəni, mà masɛ din nə Dɛnaa Lawa lɛa.»