Baruku 5 - LAWA A BOO SONBORE

¹ Zeruzalɛmu, n gɛ̀-koa ǹ mɔnaa kɛ bɔ n bɔ n din-a, ka pàãwɛɛnaabaa kɛ nɛ. Lawa a tɔ golebaa ǹ mɔnaa siĩn wɔ n ganaa, yǎa duduu.

² Peperebaa ǹ mɔnaa saa, ǹ mɛn bɛ́ boe Lawa li. Dɛnaa a tɔ golebaa kɛ pɛnɛ n mìi gana, ka lankan bɛ́ lɔn.

³ Hiĩ, Lawa á re n siĩnbaa nyɛɛ tán paǹ tumaa nɛ.

⁴ Lawa bɛ́ re tɔ mɛn koe n ganaa yǎa duduu, á kie: «Là nyantoro kirisibaa a lɛa» ka «bɔlɔgoondɛnaabaa á tɔ golebaa nɛ, Lawa nɛ».

⁵ Yoo lon, Zeruzalɛmu! Dii kele la, n ga wasa a bɔ ǹ bǎã nɛ. Ga n nɛnyaanan ganaa soenkɔn, a saa lɛ̀giala-n, a wo lɛ̀nyɛɛnɛ, Lawa sonbore foo sii li. Ǹ foo n kɔɔ̃nɛ, a giala, Lawa nə́ n yiri koa ǹ li.

⁶ N nə́ ǹ yɛ woe ǹ gòã nɛ, zɔ́ɔn nə́ woo ǹ ne. Sɛnɛ, Lawa n wusii die ǹ ne n li, ǹ nə́ ǹ guĩ ǹ gɔn lon, ka man kii dankan la.

⁷ Ka bɛ nɛ, Lawa dí kɛ kɔ: «Ka kele sɔsɔrɔn gisĩ ka tenten zizin ni. Ka nyankɔrɔn tã ka tii ni. Tán tá re n biɛ panparaa nɛ, Izirayeli minin tá re boe la, ǹ tɔ wɔ ka yii-nyɛɛ nɛ, Lawa a tɔ golebaa nə́ ǹ diɛ zii.»

⁸ Lawa a dí-kɔ gɔ́ɔ̃ nɛ, daãn laanka da gìĩ kɔɔ̃naan tá re wúlu koe Izirayeli minin la.

⁹ Hiĩ, Lawa á re wusii a da ǹ nɛ foo kɔɔ̃n gɔ́ɔ̃ nɛ. Á re a tɔ golebaa ǹ tɛ fúlu kiɛ ǹ ganaa, á re ǹ diɛ zii ka a kirisibaa nɛ, ka a bɔnaanbaa nɛ.