Baruku 3 - LAWA A BOO SONBORE

¹ «Dɛnaa pàãyiidɛnaa, Izirayeli a Lawa, wɔ nə n lɛ dii n ganaa ka foo-ziziɛ̃ nɛ, ka yiri lɔlɔkɔn nɛ.

² Dɛnaa n too kɔ wɔ lon, makara bɔ wɔ ganaa, a giala mà wɔ́ sii baraa zɛnaa n nɛ.

³ Nsɛ, ma n Kii lɛa yǎa duduu, sɛnɛ wɔsɛn, wɔ n wɔ́ papaã duduu.

⁴ Dɛnaa pàãyiidɛnaa, Izirayeli a Lawa, wɔsɛn mɛnɛn bɛ́ geren lɛa, n too kɔ wɔa lɛ-dia li. Min mɛnɛn bɛ́ ǹ nə́ sii baraa zɛnaa n nɛ, wɔsɛn man bɛn nɛnyaanan lɛa, ǹ nə́ ǹ nə n too kɔ n boo li wa, wɔa Dɛnaa Lawa. Bɛ ganaa, koen nə n gɔn bɔ wɔ ganaa wa.

⁵ N nyan toa n nə n yiri koa ka wɔ digolon siɛ̃n kɛn nɛ wa, sɛnɛ, biikoo kɛ gɔ́ɔ̃ nɛ, n yiri koa ka n pàã kakabaa kɛ nɛ, mà n tá Lawa lɛa.

⁶ Hiĩ, wɔa Dɛnaa Lawa n ka n din ni, wɔa re n tɔ-bɔ ǹ loe loe.

⁷ Ma nə́ n guguru-kɔ da wɔ foo ne, mà wɔ boo la wɔ lɛ dia nsɛ la. Wɔa tá gána sɔsɔɔ gɔ́ɔ̃ nɛ, wɔa re n tɔ-bɔ ǹ loe loe. Hiĩ, wɔ digolon nə sii baraa mɛn tumaa zɛnaa n nɛ, wɔ́ a wɔlɔ lui wɔ foon ganaa.

⁸ Pelo, n bɛ́ n wɔ dia gána mɛn nɛ, wɔ n sɔsɔɔ wɔa piɛ ganaa. Maǹ sɔ kiɛ wɔ la walan, ǹ nə́ dìn bíi wɔ li. Dɔlɔ n wɔ mìi ni wɔ digolon siɛ̃n kɛn tumaa a lɛa nɛ, ǹ nə́ n na ǹ nə́ n bɔ n din ganaa wɔa Dɛnaa Lawa.»

Yiriwoorobaa Yiri a bɔ ka yiriwoorobaa nɛ

⁹ Dí-pɛn mɛnɛn bɛ́ yiitákoobaa koe, ka n too kɔ bɛn ganaa Izirayeli minin lɛn. Ka n too kanaa, ka boo la ka doɛ̃ yɛ.

¹⁰ Ka n giã-n kaa zɔ́ɔn li, ka n zizi koe tiibaa ǹ gána nɛ. Wàa na á baa kəni?

¹¹ Ka n gɔgɔrɛ, a giala, ka nə n gɔn diɛ geren ganaa. Ka n kun ka min mɛnɛn bɛ́ ǹ yiitákoobaa zɛnɛɛ geren piɛ. Wàa na á baa?

¹² Ka n ka n la bɔ yiriwoorobaa a mu zii yala ganaa.

¹³ Bɛ̀ ka n ká goã ka kɔ Lawa a zii lɛ, bɛ̀ ka á re goɛ̃ là nyantoro la yǎa duduu.

¹⁴ Ka n daraa a ganaa, doɛ̃ bɛ́ yii bǎã mɛn nɛ, pàã nɛ, ka yiri ni. Nyin sasa bɛ́ yii bǎã mɛn nɛ, ka á re bɛ doɛ̃. Ga ǹ gɔn mɛn bɛ́ tɛ pii ka bólon fúlu ni, ka là nyantoro ne.

Minbuiinin ba boe la ǹ dɔ yiriwoorobaa ganaa wa

¹⁵ Die na á Yiriwoorobaa á giã ǹ bǎã yɛ? Die na á wɔ a naforon kaa ǹ kion?

¹⁶ Tɔrɔ kɔsɔn kɛn nyɛɛnaandɛnan man nə́ n baa lɔn? Ǹ mɛnɛn nə goã don siĩn mìi la,

¹⁷ ǹ mɛnɛn nə goã kiɛ bàanan foo la? Min mɛnɛn bɛ́ gɔn màn gigiã goã ǹ lon, lɛ dan ná a ba la wa. Ǹ nə́ goã sana ka wɔrɔ koɛ, minbuiinin nə́ goã n foo doɛ a ganaa?

¹⁸ Gɔn dí-nyalin lɛn, ǹ nə́ goã wɔrɔgiala dí nyɛɛ ka yiri ni, ǹ nə́ maa? Sɛnɛ, ǹ bɛ́ ǹ nə́ màn mɛn zɛnaa a là kɔ́n yɛ wa.

¹⁹ Ǹ nə́ papaã, ǹ nə́ gisĩ geren piɛ, kɔsɔn nə́ ǹ bǎã saa.

²⁰ Min tenən nə́ yɛ ǹ nə́ giã tán la. Sɛnɛ, ǹ goã ǹ nə́ yiriwoorobaa a zii dɔ̃ wa.

²¹ Ǹ bɛ́ yii lɔn, ǹ goã doɛ̃ wa, ǹ yiri bɔ li wa. Ǹ minin nə goã ǹ nə́ zii mɛn saa, ǹ nɛnyaanan dɔn wɔlɔ goã sɔsɔɔ bɛ ganaa.

²² Min kɔ́n bini yiriwoorobaa boo ma Kanaan wa, a yɛ Teman wa.

²³ Haalɛ Agaara a sumu minin kɛn giɛ li tán la, Haalɛ Madian ka Teman a pii-kɔlen ne, nyuù-dalin ni, ka ga sonbore li wolen kɔ́n zii dɔ̃, woe yiriwoorobaa ganaa wa.

²⁴ Izirayeli minin, ka ga-a ka kanaa bɛ́ lɔn, bɛa Lawa a kion kie, a n gole! Kanaa mɛn bɛ́ a wɔ lɛa, a lɛ n boe-n la!

²⁵ A n kaaraa, lɛdan ná a ba la wa, a n lon, ǹ nə́ ǹ ba boe la ǹ zɔɔ̃ wa!

²⁶ Min sɔsɔrɔn man nə́ yɛ kànaa, bɛa min tɔnaan kɛn lɛlɛ biikoon li, ǹ mìi la n lon, ǹ nə́ zia-baali sonboren lɛa.

²⁷ Sɛnɛ, Lawa nə ǹ bɔ á yiriwoorobaa a zii nyaa ǹ nɛ wa.

²⁸ Ǹ nə́ gã, a giala, yiri nyaabaa ǹ ganaa, ǹ nə́ papaã ǹ yiriwɛɛnaabaa kɛa lɛa.

²⁹ Die na á dii lon, á woo yiriwoorobaa saa á gisĩ ni, á bɔ lon?

³⁰ Die na á yìsi mu gole wɔsɔkɔn á woo ga li, á n wusii die ne, a ná a lonkoe ka sana yoreen ne?

³¹ Min kɔ́n ba yiriwoorobaa a zii doɛ̃ wa, a bɛ́ yii lɔn, min kɔ́n ba doɛ̃ wa.

Lawa dinsɔɔ̃ n yiriwoorobaa doɛ̃, á kɔ Izirayeli la

³² Ka bɛ din yii ni, Lawa mɛn bɛ́ màn tumaa doɛ̃, á yiriwoorobaa doɛ̃, á yɛ a yiri pàã ganaa. A na á tán yɔrɔ bɔ duduu wɔ lɛa, á pã ka tɔɔ gòã sii dɛnan nɛ.

³³ A n wɔlɔ fúlu dɛwɛ, a n woe. A n wusii lɛ diɛ la, a n lɛ sii, a gɔ̀nɔn nə́ bìn diɛ.

³⁴ Leeren man tɛ pii ka foo kɔɔ̃n nɛ, ǹ dí nya ǹ bǎã nɛ.

³⁵ Lawa n lɛ diɛ ǹ la maǹ nə n nyii. «Wɔ á kie!» Maǹ tɛ pii ka foo kɔɔ̃n nɛ, ǹ Zɛnaali wole a lɛa.

³⁶ A din ni kie wɔa Lawa lɛa, min kɔ́n ba ka a bɛ́ lɔn ma.

³⁷ Á zii tumaa yɛ a n woe doɛ̃ ganaa. Á nyaa a dí-nyali Zakɔba tɔrɔ nɛ ka Izirayeli ni, a tɔrɔ mɛn bɛ́ á narɛ parsiini.

³⁸ Bɛ kio, yiriwoorobaa nə́ n din nyaa tán la, á giã minbuiin nɛn biin ni.