Baruku 2 - LAWA A BOO SONBORE

¹ Dɛnaa goã á boo mɛn da wɔ ganaa, á ná a yɔrɔ bɔ. A n kɔn ka wɔa kiri-kurulin ni, ǹ mɛnɛn bɛ́ kiri kuri Izirayeli, wɔa kiin ni ka nyɛɛnaandɛnan nɛ, Izirayeli minin ni ka Zudaa wɔn nɛ.

² Á koe gole bɔ Zeruzalɛmu ganaa. Bɛa koen kɛn miã dɔ tɔn yɛ duduu tán la ka kɛ bɛ́ lɔn ma. A da yaa, á goã kiɛ̃ nɛ Muizu a landa nɛ.

³ Minin nə́ ǹ nɛgiĩn ka ǹ nɛlɔn siĩ sɔ̃.

⁴ Ka bɛ-n doo, gánan mɛnɛn tumaa bɛ́ ǹ lɛnpɛnɛ, á ǹ kɔ bɛn pàã la. A bɛ́ miɛ̃, tɔrɔn mɛnɛn bɛ́ ǹ miãkɛnɛn lɛa, Dɛnaa nə́ ǹ dia ǹ li, ǹ nə́ sɔ kɔ ǹ ganaa, ǹ nə́ sìi da ǹ ganaa.

⁵ Màn mɛn tá mà wɔ goã mìilandɛnan lɛa, wɔ n wɔ́ goã bɛ̀rɛn lɛa. Ka bɛ nɛ, wɔ́ sii baraa zɛnaa kɔn ka wɔa Dɛnaa Lawa nɛ, a bɛ́ á goã boo mɛn diɛ wɔ nɛ, wɔ goã wɔ́ n too kɔ a ganaa wa.

⁶ Wɔa Dɛnaa Lawa n pepere, sɛnɛ, wɔsɛn ka wɔ digolon ne, sìi n wɔsɛn ganaa ka wɔ yii bɛ́ a lɔn pelo.

⁷ Dɛnaa koe gigiãn boo da kɔn wɔsɛn nɛ, ǹ nə́ wɔ dɛ.

⁸ Wɔ Lawa nyankɔ wáa a wɔa min gogoonmaa yɔrɔ bɔyaa a bɔ a taasiɛ bɔnɛɛn la wa.

⁹ Dɛnaa na á bɛa koen kɛn lɛn yɔrɔ bɔ á ǹ dia kɔn-a wɔsɛn nɛ. Hiĩ, Dɛnaa màn mɛn tumaa laa wɔ ganaa mà wɔ zɛnaa, á pepere.

¹⁰ Sɛnɛ, wɔ goã wɔ́ n too kɔ a lon ma, a dí-pɛn mɛnɛn koa wɔ yɔrɔ-a, wɔ goã wɔ́ kɔ ǹ lɛ wa.

Dɔmalɛ ǹ bii-wɔ

¹¹ Dɛnaa, Izirayeli a Lawa, ń soo ka n tɔrɔ nɛ Ezipti ka n we gole ne, n pàã gole pàã ganaa, n pàãyiidɛnaabaa nɛ ka kaãbaa ǹ sii dadaran nɛ tɔwaa gole diɛ. N bɛ́ min mɛn lɛa, man nə́ n bɛ nyaa ka wɔ yii bɛ́ a tɔn lɔn pelo. Kanna,

¹² wɔ á tɔn doɛ̃ wɔ á wɔ́ sii baraa zɛnaa, wɔ n wɔ́ n gòã dii, wɔ́ n dí-pɛn lɛn tumaa lɛ tii, wɔa Dɛnaa Lawa.

¹³ N bɛ́ n wɔ dia bǎã mɛn nɛ, wɔ n tɔrɔ boɛɛn dinsɔɔ̃ lɛa tɔrɔ kɔsɔn kɛn bii. N foo-yoo yɔrɔ bɔyaa n bɔ wɔ la.

¹⁴ N too kɔ Dɛnaa, wɔ bɛ́ màn mɛn nɔ̀n diɛ n la wɔa Lawa nyankɔ gɔ́ɔ̃ nɛ, n bɛ́ min mɛn lɛa, wɔ kirisibaa bɛa lɛa. N toa, min mɛnɛn nə wɔ goa, ǹ nə ǹ bɔnaanbaa nyaa wɔ nɛ.

¹⁵ Ka bɛ nɛ, tán tumaa á re doɛ̃ mà n tá wɔa Dɛnaa Lawa lɛa, mà wɔsɛn, Izirayeli tɔrɔn ma nə n din wɔn lɛa.

¹⁶ Dɛnaa, n toa n kion sonbore kɛ mìi ni n ga wɔ ganaa, n taasɛ ka wɔ nɛ. N too dia wɔ la, n too kɔ wɔ lon.

¹⁷ N yiin bũ Dɛnaa n ga. Bɛ̀ wɔ gã, bɛ̀ wɔ telenboen nə́ n nakɔn ka wɔ gɔ̀nɔn nɛ, bɛ̀ wɔ á woe geren piɛ, wɔ a re boe la wɔ n tɔ gole kɔ doo hinlaa, wɔ n peperebaa dɔ̃ doo wa Dɛnaa.

¹⁸ Sɛnɛ, min mɛn bɛ́ n tɔ gole koe, a n wusii n peperebaa dɔ doɛ̃, á kie Dɛnaa: Minbuiin nɛ nɛ, a foo n ziziɛ̃ nɛ parsiini, a n tɔ we kuməə ne, pàã ná a ba a lon ma, a n min lɛa a yii n tii, bòo ná a ganaa.

¹⁹ A bɛ́ miɛ̃, bɛ̀ wɔ́ daa n din yɔrɔ-a, wɔ́ n wɔa Lawa nyankɔ koe n la, wɔ nə n gòã kuĩ, Dɛnaa Lawa, wɔ bie n gòã koɛ wɔ digolon la ka wɔa kiin bɛ́ kɔnboe ka sii mɛn nɛ wa.

²⁰ Ka bɛ nɛ, ma nə́ n foo-yoo kaka dia kɔn ka wɔsɛn nɛ. Ma nə́ n goã n bɛa boo kɛ da ka n dí-nyalin, Lawa boo gii-dalin lɛ nɛ, n nə́ pii:

²¹ «Masɛ Dɛnaa, ma bɛ́ boo mɛn diɛ, á kie: Ka n kuməə ka dí nya Baabilonii a kii ni. Ka bɛ nɛ, ma gána mɛn kɔ ka digolon la, ka á re giɛ̃ bɛ nɛ.

²² Sɛnɛ, bɛ̀ ka n piã mà ka a dí nyɛɛ Baabilonii a kii n wa, ka ma bɛ́ nɔ̀n diɛ-n ka la lɔn wa,

²³ foo kɔɔ̃n kɔ ǹ loen ne ka zɔ́n nɛ, foo kɔɔ̃n kɔ ǹ lɛ-dɛn nɛ ka kɔn-wɔle tenən loen ne, ma á re bɛn kurii Zudaa ka Zeruzalɛmu kiwin kɛn nɛ. Gána lɛ tumaa á re n biɛ kɔlɔn kaa kɔn la lɛa, a minin tá re n wɛɛ ǹ nə n bɔ a nɛ.»

²⁴ Sɛnɛ, n bɛ́ n goã pii wɔ nɛ mà wɔ dí nya Baabilonii a kii ni, wɔ n too kɔ n lon wa. Bɛ ganaa, n goã n sii mɛn yɔrɔ bɔ ka n dí-nyalin Lawa a boo gii-dalin boo-diɛ nɛ, n ná a yɔrɔ bɔ. «Kaa kiin ni ka ka digolon wen tá re n wɛɛ ǹ nə n bɔ ǹ yalan nɛ.»

²⁵ Wɔ digolon ne ka wɔa kiin man nə́ gã fuu kakan gɔ́ɔ̃ nɛ, bòo kaka nɛ, ziabaa nɛ ka piɛ̃ busu ni. Ǹ geren man nə́ goã bii-a kanaa, wɔlɔ yii fúlu a wɔlɔ wɛɛ̃ ganaa ka tèlò a nyɛ̃n nɛ.

²⁶ Lawa a kion sonbore kie, á goã á n kɔ n la, n baa ka yɔrɔ kɔ́n tɔrɔ nɛ ka a bɛ́ bǎã mɛn nɛ pelo, Izirayeli ka Zudaa a tɔrɔn baraabaa a lɛa nɛ.

²⁷ A da yaa, wɔa Dɛnaa Lawa, n sii gigiã zɛnaa wɔsɛn lɛa ka foo-kũ gole ne ka kɔn-narɛɛ nɛ.

²⁸ Ma nə́ n goã n bɛ pɛ ka n dí-nyali Muizu lɛ nɛ, bɛ̀ n bɛ́ n laa a ganaa ǹ mɛn pinaa mà a nsɛ a landa boon kiɛ̃ sɛ́wɔ nɛ Izirayeli minin yɔrɔ-a. N goã n pɛ:

²⁹ «Bɛ̀ kaa n too koe ma lon wa, ma bɛ́ re ka diɛ bǎã mɛn nɛ tɔrɔ kɔsɔn bii, ka bɛ́ zaman gigiã mɛnɛn darɛɛ kanna, ǹ ba re goɛ̃ tɛ doo wa.

³⁰ Ma á doɛ̃, ka a re n too koe ma lon wa, a giala, ka n tɔrɔ mìi kakaan lɛa. Sɛnɛ, ǹ bɛ́ re ka goɛ ǹ wo ka nɛ bǎã mɛn nɛ, ka á re yui ka n taasɛ,

³¹ ka á re doɛ̃ mà kaa Dɛnaa Lawa n masɛ nɛ. Ma á re foo nyantoro koe ka la, ka toon mɛnɛn bɛ́ n too koe.

³² Ka bɛ́ re goɛ̃ bǎã mɛn nɛ sɔsɔɔ kaa gána ganaa, ka á re maa tɔ-bɔ ǹ loe loe, ka á re n yiri koɛ ka masɛ nɛ.

³³ Ka á re n yiri koɛ ka sii mɛn bɛ́ á kɛbaa ka digolon la, ǹ nə́ n nyɛnaa masɛ Dɛnaa nɛ. Ka mìi a re kaka koe doo wa, ka á re n yɔrɔ bɔyɛɛ ka bɔ kaa nya ǹ dí bɔnɛɛn kɛn la.

³⁴ «Ka bɛ nɛ, ma á re wusii ma da ka nɛ gána mɛn bɛ́ má lɛ kɔ nɛ ka digolon la ka liɛ-wɔ nɛ, Abrahamu ni, Izaaki ni ka Zakɔba nɛ, ka á re goɛ̃ a nyɛɛnaandɛnan lɛa. Ma a re màn boe kaa zaman lɛ doo wa, sɛnɛ, ma á re ka mɔnɛɛ.

³⁵ Ma á re lɛ kɔ kɔn la we ka ka nɛ duduu wɔ lɛa. Ma á re goɛ̃ kaa Lawa lɛa, ka á re goɛ̃ ma tɔrɔ lɛa. Ma gána mɛn kɔ ma tɔrɔ Izirayeli la, ma a re wusii ma saa ma wo-n sɔsɔɔ bɛ ganaa doo wa.»