Timəə dí-pɛn 20 - LAWA A BOO SONBORE 2011

Ziabaa

¹ Bɛ̀ ká soo ká woo zia baa kaa zɔ́ɔn ganaa, bɛ̀ ká sùin laanka wotoron yɛ, ka zaman nɛ mɔnaa nɛ ǹ nə́ la ka nɛ, ka baran nyɛ́ɛ baa wa. A giala, kaa Lawa, Dɛnaa Lawa lɛ tá kun ka nɛ. A din lɛ na á ka waa á ka bɔ Ezipti gána nɛ.

² Bɛ̀ ká n yɔrɔ bɔ ka á die zia lɛ giala koe, Lawa a wúlu-bɔle nə n zɔ̃ a dɔ, a boo da ka zia nɛn lɛn nɛ.

³ A pɛ ǹ nɛ: «Izirayeli minin lɛn, ka n too kɔ! Ka á ke ká n yɔrɔ bɔ pelo, ka n die zia biɛ kaa zɔ́ɔn ganaa. Ka foo baran biɛ na wa, ka baran nyɛ́ɛ baa wa, ka nyin baran soo wa, ka gɔ̀nɔn baran bìn da ǹ nyɛɛn wa.

⁴ A giala, kaa Lawa, Dɛnaa Lawa din nə die miɛ kun ka nɛ, a n dɔ ka lɛ, a zia baa kaa zɔ́ɔn lɛn ganaa, a gɔ̀lɔ̀baa kɔ ka la.»

⁵ Zaman-lɛduə̃lin nə nɔ̀n da zia-baalin lɛn la, ǹ pɛ ǹ nɛ: «Giĩ tá ka bii á kion dii dɔ sisia, a ná a tɔn wɔ a-n bɔrɔ wa? Ǹ dɛnaa wusoo a wo piɛ, màn mɛn bɛ́ toɛ, a baran gã zia la, n giĩ kɔsɔ yǎa kiɛ̃ giɛ̃ a kion lɛ-n wa.

⁶ Giĩ tá ka bii á *rezɛ̃ da wuru bɔ, a ná a tɔn na a nɛ bibinaa na bɔrɔ wa? Ǹ dɛnaa wusoo a wo piɛ, màn mɛn bɛ́ toɛ, a baran gã zia la, n giĩ kɔsɔ yaa kiɛ̃ woe a nɛ bibinaa niɛ wa.

⁷ Giĩ tá ka bii á nɛniɛ bɔ, a ná a tɔn wɔ lɔ lɛa bɔrɔ wa? Ǹ dɛnaa wusoo a wo piɛ, màn mɛn bɛ́ toɛ, a baran gã zia la, n giĩ kɔsɔ yǎa kiɛ̃ a nɛniɛ lɛ we lɔ lɛa wa.»

⁸ Zaman-lɛduə̃lin lɛn nə wusoo ǹ nɔ̀n da doo ǹ pɛ: «Min tá ka bii nyɛ́ɛ ná a ganaa, a foo n biɛ niɛ ya? Bɛa dɛnaa wusoo a wo piɛ, màn mɛn bɛ́ toɛ, a baran ǹ dɔɔ̃nɔn lɛn gù dɛ ka a din wɔ bɛ́ lɔn wa.»

⁹ Bɛ̀ zaman-lɛduə̃li lɛn nə́ boo da ka zia-baalin lɛn nɛ ǹ nə́ nya, ǹ zia-baalin goledɛnan bɔ, ǹ nə ǹ koa zia-baalin lɛn mìi la.

¹⁰ Bɛ̀ ka á re woe zia biɛ kiwi mɛn ganaa, ka pɛ ǹ nɛ mà bɛ̀ ǹ tá giɛ là nyantoro li, mà ǹ nə n dinin kɔ kiĩni.

¹¹ Bɛ̀ ǹ nə́ pɛ ka nɛ mà ǹsɛn nə́ lɛ kɔ, bɛ̀ ǹ nə́ ǹ kiwi lɛ lɛ bũ ka nɛ, zaman mɛn tumaa bɛ́ a nɛ, ka ǹ kaa pàã dí ganaa, ǹ dí nya ka nɛ.

¹² Sɛnɛ bɛ̀ ǹ lɛ kɔ ka la wa, bɛ̀ ǹ nə́ yoo ka zia nɛ, ka kiwi lɛ lɛnpɛnɛ.

¹³ Bɛ̀ kaa Lawa, Dɛnaa Lawa kiwi lɛ wɔ ka gɔn, ka a giĩn tumaa dɛ.

¹⁴ Sɛnɛ, lɔn nɛ, nɛnyaanan nɛ ka tɔɔn nɛ, màn mɛn tumaa bɛ́ kiwi lɛ nɛ, a gɔ́ɔ̃gɔ́ɔ̃ ǹ mànan tumaa, ka nɔmɔ bɛn ganaa, bɔ zia la ǹ mànan lɛa. Kaa Lawa, Dɛnaa Lawa bɛ́ re kaa zɔ́ɔn lɛn koe ka la, ka bɛ́ re mànan mɛnɛn sii ǹ la, ka á boe la ka n dinin too ka bɛn nɛ.

¹⁵ Kiwin mɛnɛn wɔlɔ bɛ́ lui ni, ka bɛ́ re giɛ̃ gána mɛn nɛ ǹ nə́ ǹ bie bɛa kiwin lɛa wa, ka die ka zɛnaa bɛn lɛn man miɛ̃.

¹⁶ Sɛnɛ, tɔrɔn kɛn lɛn, kiwin mɛnɛn bɛ́ kaa Lawa, Dɛnaa Lawa nə́ ǹ koe ka la kaa wɔ lɛa, ka nyan màn kɔn toa walan á n fɔfoã sii wa.

¹⁷ Ɛti tɔrɔn kɛn, Amɔɔrɔ tɔrɔn nɛ, Kanaan minin ni, Perɛzi tɔrɔn nɛ, tɔrɔn kɛn ǹ nə́ bíi Evitin, Zebuzu tɔrɔn nɛ, ka die ka bɛn tumaa dɛ lenlen, ka kaa Lawa, Dɛnaa Lawa á ke á pɛ ka-n lɔn.

¹⁸ Ka zɛnaa miɛ̃, màn mɛn bɛ́ toɛ, ǹ bɛ́ sii bɔbɔnɛɛn mɛnɛn zɛnɛɛ ǹ dìn wɔ lɛa, ǹ nyan toa ǹ ka daraa bɛn lɛn zoɛ̃ ganaa wa. Bɛ bie wa, ka n die sii liɛ kaa Lawa, Dɛnaa Lawa lɛ la.

¹⁹ Bɛ̀ ká woo kiwi mɛn lɛnpɛnɛ, ká n zia biɛ a ganaa mà ka kũ, bɛ̀ á belebɔ á la yii ni, ka nyan sɛ̀miɛ̃ saa ka a dan kukuru wa. A giala, ka á boe la ka ǹ nɛ bii. Ka baran ǹ kuru wa. A giala, da bie minbuiin nɛ lɛa, min tɔn yoo a ganaa ka zia-n wa.

²⁰ Sɛnɛ, ka dinin bɛ́ doɛ̃ mà da mɛn a nɛ ba n bii wa, ka bɛ kuru ka kakã. Kiwi mɛn lɛ á ke zia biɛ ka ganaa, ka ziabaa ǹ bǎãn zɛnaa ka bɛa gɔn lɛ nɛ ka a lɛnpɛnɛ nɛ, yǎa a kiɛ.