Nya ǹ dín 19 - LAWA A BOO SONBORE 2011

Pooli a dɔ Efɛɛzi boo

¹ Apolɔɔsi bɛ́ Korɛnti kiwi, Pooli Galaasi laanka Frizii gána a kele bǎãn wɔsɔ, á daa dɔ Efɛɛzi kiwi. Pooli woo kialandɛnan kɔnɔn yaa Efɛɛzi kiwi lɛ nɛ.

² Á nɔ̀n da ǹ la: «Ka bɛ́ ka Lawa-nyankɔlen baa, Yiri Fu gisĩ ka la ke?» Sɛnɛ, ǹ ná a lɛ si: «Wɔsɛn dinin nə Yiri Fu boo ma wa.»

³ Pooli tɔ́n nɔ̀n da ǹ la: «Sɛnɛ, ka n ka *batɛmu mɛn tɔrɔ yɛ?» Ǹ nə́ pɛ: «Zaã bɛ́ á goã ǹ mɛn diɛ minin-a, wɔsɛn man wɔ́ bɛ yɛ.»

⁴ Pooli wusoo á pɛ ǹ nɛ: «Zaã na á goã wusoo sii baraa kio ǹ batɛmu diɛ minin ganaa, bɛ̀ á pii ǹ ni, mà min mɛn bɛ́ die asɛ kio, mà ǹ golee bɛa dɛnaa li, mà bɛ n ka Yezu ni.»

⁵ Ǹ nə́ n too kɔ Pooli lon, ǹ nə́ batɛmu lɛ si ka Dɛnaa Yezu tɔ nɛ.

⁶ Pooli nə́ n gɔn da ǹ la, á Lawa nyankɔ, Yiri Fu gisĩ ǹ la. Ǹ nə́ bɔlɔ soreen pɛ, ǹ nə́ Lawa a boo gii da.

⁷ Bɛa minin lɛn nə́ dɔ min fulupaa kɛ miã.

Pooli Lawa a boo mɛn da Efɛɛzi

⁸ Mui sɔɔ gɔ́ɔ̃ nɛ, Pooli na á goã we lɛsɔkɔn kion, bɛ̀ a boo da ka foo tãbaa nɛ *Lawa a kiibaa ǹ bǎã kɛ wɔ gɔn la. A na á goã n doɛ màn mɛn bɛ́ toɛ, a too kɔmalon wolen lɛn nə boo lɛ si taãn lɛa.

⁹ Sɛnɛ, ǹ tɛnɛn nə́ n too kaka kɔ, ǹ lɛ kɔ ǹ nə́ boo lɛ si taãn lɛa wa. Ǹ nə́ boo baraa da Dɛnaa a zii lɛ ganaa zaman lɛ bii. Pooli nə́ ǹ toa walan, á Lawa-nyankɔlen lɛn sɛn kũ ǹ gɔrɔn, bɛ̀ a Lawa a boo lɛ pɛ ǹ nɛ baraabaraa Tiranɔɔsi a minin daraa ǹ kion.

¹⁰ Bɛa sii kɛ lɛ ná a n zɛnaa yǎa lɛ̀ paa, bɛ lɛ na á toa, Azii gána minin tumaa, a Zuifun laanka a Grɛkin ni, ǹ tumaa Dɛnaa a boo kɛ ma.

Sevaa a nɛnyaanan boo

¹¹ Lawa na á goã kaãbaa ǹ sii dadaran zɛnɛɛ Pooli gɔn.

¹² Bɛ lɛ gɔ́ɔ̃ nɛ, minin man nə́ goã giɛ, patara laanka mɔnaa lɛkoron mɛnɛn nə n lɔ Pooli gɔ̀nɔn ganaa, ǹ bɛn goa ǹ nə ǹ da busulən ganaa. Bɛa busulən lɛn dɔn man nə́ goã kaka koe, nɔ̀ɔn baraa dɛnan nɔ̀ɔnɔn nə́ goã n boe ǹ ganaa.

¹³ Zuifun kɔnɔn dɔn man nə́ goã n bibiĩ nɔ̀ɔnɔn lui ǹ boe minin ganaa. Ǹ ná a giala kɔ, mà maǹ die nɔ̀ɔnɔn lui ka Yezu tɔ nɛ. Ǹ nə́ pɛ nɔ̀ɔnɔn lɛn manɛ: «Pooli bɛ́ Yezu mɛn boo diɛ ke, wɔsɛn man pii ka nɛ bɛ tɔ a lɛa, wáa ka n bɔ minin ganaa.»

¹⁴ Zuifu goon ne, n din biɛ wúlu-bɔlen kiã lɛa, a tɔ n Sevaa, bɛa nɛnyaan sɔbaa na á goã bɛa dí kɛ lɛ nyɛɛ.

¹⁵ Nɔ̀ɔn baraan lɛn nə́ ǹ lɛ si: «Wɔsɛn tá Yezu doɛ̃, Pooli dɔ bɛ́ min mɛn lɛa, wɔsɛn tá bɛ dɔ doɛ̃. Sɛnɛ, kasɛn kɛn lɛn man dien lɛa?»

¹⁶ A din bǎã-n gɔrɔ, nɔ̀ɔndɛnaa lɛ parɛ á ǹ kũ, á ǹ tumaa sɔɔ ka kaka. Ǹ bɛ́ ǹ sii la ǹ mɛn waáraa, bɛ̀ ǹ mɔnaan nə́ tɔtoɛ̃, mà bɔ ǹ dininmaan dɔn ganaa.

¹⁷ Efɛɛzi kiwi minin tumaa, a Zuifun laanka a Grɛkin ni, ǹ tumaa bɛa sii kɛ lɛ a zɛnaa boo ma. Nyɛ́ɛ nə́ ǹ tumaa kũ, ǹ nə́ Dɛnaa Yezu tɔ kɛ a gugurubaa boo da.

¹⁸ Min mɛnɛn nə golee Lawa li, ǹ gigiã nə́ ǹ sii-durii zɛnaan pɛ zaman yɔrɔ-a.

¹⁹ Koe sii-zɛnaali gigiã daa ka ǹ sɛ́wɔn nɛ, ǹ nə́ ǹ kaa kɔn la, ǹ nə́ tɛ da ǹ ganaa min tumaa yɔrɔ-a. Ǹ bɛ́ ǹ nə́ bɛa sɛ́wɔn lɛn giɔ̀mɔ nimi ǹ nə́ kaa kun, ǹ nə́ yɛ mà á dɔ lɛawaa duu posooro dí-nya ǹ giɔ̀mɔ li.

²⁰ Bɛa yɔrɔ kɛ la, Dɛnaa din a boo kɛ na á goã n pii ka pàã nɛ, a ná a din a boo sii la kɛ nyɛɛ.

Gɔ́ɔ̃-tii mɛn yɛ Efɛɛzi kiwi

²¹ Bɛa siin kɛn lɛn zɛnaa kio, Pooli ná a yɔrɔ bɔ a din yiri ni, mà a n die boe Masedoanɛ gána nɛ ka Grɛki gána nɛ, a kiɛ̃ a wo Zeruzalɛmu. A na á goã pii: «Bɛ̀ masɛ dɔ walan, ma doamaa nɛ ma kiɛ̃ ma wo Rɔmu kiwi dɔ nɛ.»

²² A ná a dí nya kun wole min paa dia Masedoanɛ gána nɛ, Timote laanka Erasti ni, bɛ̀ a dinmaa á tɔn Azii gána-n bɔrɔ.

²³ Bɛa biikoo kɛ lɛ nɛ, sii lɔlɔkɔn kakan nə́ n zɛnaa Lawa a zii lɛ a lɛa.

²⁴ Fuũn giĩ goon ne a tɔ n Demetrisi, ǹ goã dì mɛn bíi Artemisi, asɛ na á goã bɛa guguru kɔ ǹ kion a kɔnboe zɛnɛɛ ka wɔrɔgiala nɛ. A dɔ na á goã wɔrɔ gigiã yii a dí-nyalin manɛ bɛ lɛ ganaa.

²⁵ Demetrisi lɛ ná a dí-nyalin lɛ sɔkɔn, ka min kɔsɔn mɛnɛn dɔn dí bɛ́ kɔnboe ka ǹ wɔ nɛ, á pɛ ǹ nɛ: «Maa giaáran lɛn, ka á doɛ̃ mà wɔsɛn màn yɛ din tumaa n boe kɛa dí kɛ nɛ.

²⁶ Ka dinin yii tá a ganaa, hinlaa ka tá a boo miɛ, mà Pooli lɛ bie a dí nyɛɛ Efɛɛzi kiwi dinsɔɔ̃-n wa, a n goon Azii gána din tumaa nɛ. A n pii zaman nɛ a tá ǹ sɔsɔmɛ, ǹ bɛ́ dìn mɛnɛn zɛnɛɛ ka ǹ gɔnɔn nɛ, mà bɛn ba Lawa taãnan lɛa wa.

²⁷ Bɛa sii kɛ lɛ gɔ́ɔ̃ nɛ, barka bie re n boe wɔsɛn dí kɛ dinsɔɔ̃-n wa, sɛnɛ, wɔa dì lɔdɛnaa gole Artemisi ke, Azii gána laanka kanaa tumaa tá a guguru koe, bɛa kion kɛ n die kooro biɛ, a din a gugurubaa dɔ n die n sii la.»

²⁸ Min mɛnɛn bɛ́ n too koe a lon, bɛn bɛ́ ǹ nə́ bɛa boo kɛ ma lɔn gɔrɔ, ǹ foo yoo, ǹ nə́ yoo ǹ tá n lɛ dii mà Efɛɛzi a dì Artemisi lɛ n gole.

²⁹ Kiwi lɛ a zaman tumaa nə́ n lɔlɔkɔn, ǹ nə́ yoo kun ǹ nə́ woo lɛsɔkɔn bǎã lɛ nɛ. Ǹ bɛ́ woe, Pooli a zii tɔ-wɔ kun wolen mɛnɛn bɛ́ Masedoanɛ kiwi minin lɛa, Gayusu laanka Aristarki ni, ǹ nə́ bɛn kũ.

³⁰ A na á goã Pooli gɔ́ɔ̃ nɛ a wo lɛsɔkɔn bǎã lɛ nɛ, sɛnɛ, Lawa-nyankɔlen lɛn nə toa á zɛnaa miɛ wa.

³¹ Azii gána nyɛɛnaandɛnan mɛnɛn bɛ́ Pooli a giaáran lɛa, bɛn dɔn nə́ minin dia, ǹ nə́ n gɔn waa nɛ, mà a baran wo lɛsɔkɔn bǎã lɛ-n wa.

³² Zaman lɛ na á goã n lɛ dii, min kɔ́n dɔ a lɛ-dɛ ǹ bɔlɔ a goon ka n miã wɔ-n wa. Minbuiin lɛ bɔlɔ na á goã lɔloɛ-n kɔn taãn-taãnɛ, ǹ gigiã dɔ goã lɛsɔkɔn lɛ mìi doɛ̃ wa.

³³ Zuifun nə́ Alɛksandrə nyanaa ǹ nə́ da nyɛɛnɛ, yǎa minin kɔnɔn nə sii lɛ yɔrɔ pɛ nɛ. Alɛksandrə nə́ n gòon saa lon, mà a n die boo diɛ zaman lɛ nɛ, á nyɛɛ mà Zuifun nə sii kɛ lɛ la wa.

³⁴ Sɛnɛ, ǹ bɛ́ ǹ nə́ dɔ̃ mà Zuifu ni, ǹ tumaa nə́ n lɛ kaa kun, ǹ nə́ pɛ ka lɛn gole ne yǎa biikoo paa kɛ miã: «Efɛɛzi a dì Artemisi lɛ n gole.»

³⁵ Ka bɛ din yii ni, kiwi lɛ a sɛ́wɔ-kiɛ̃li boo la á zaman lɛ lɛ kuru, á pɛ: «Efɛɛzi minin lɛn ganaa, min tumaa á doɛ̃, mà Efɛɛzi kiwi kɛ n Artemisi gole kɛ a guguru kɔ ǹ bǎã kɛ lɛduĩ, ka a nyín kɛ dɔ nɛ, á bɔ lon á gisĩ tán.

³⁶ Liere bɛ́ a bie bɛa boo kɛ lɛ-a wa, ka n foo basã, ka baran toa min ka yiri sã wa.

³⁷ Sonbore, ka ǹ ka daa kànaa ka minin ni, minin mɛnɛn bɛ́ ǹ wɔsɛn dì soɛ̃ yiɛ wa, ǹ boo baraa dɔ da a ganaa wa.

³⁸ Bɛ̀ Demetrisi laanka a dí-nyalin tá zia la ka min ni, kiri-wɔ pinaan tan, ka kiin ni, ka wo dɔ kɔn nɛ walan.

³⁹ Sɛnɛ, bɛ̀ sii yɔrɔ-bɔ kɔsɔn tan, bɛ̀ ǹ nə́ ǹ nyaa, kiwi minin lɛsɔkɔn tá re bɛn yɔrɔ boe.

⁴⁰ Zɛ̀rɛ á boe la a wɔsɛn kũ pelo a lɛsɔkɔn kɛ lɛ a lɛa, a giala, sii banban wɔsɛn nə́ boe la wɔ nyaa pelo a lɛsɔkɔn kɛ lɛ mìi lɛa wa.» Bɛa boo kɛ lɛ kio, á zii kɔ zaman lɛ la ǹ nə́ woo.