Matiə 27 - LAWA A BOO SONBORE 2011

Maǹ Yezu koe Pilati la

¹ Baayɛlɛ yiisoon ne, Lawa a wúlu-bɔlen goledɛnan tumaa nə́ n lɛ kaa kun ka Zuifun goledɛnan kɔsɔn nɛ, mà maǹ die Yezu dii a gã.

² Ǹ nə́ Yezu yii, ǹ nə́ woo kɔ Rɔmun gánadɛnaa Pilati la.

Zudaasi a gɛ̀

³ Zudaasi mɛn nə Yezu kɔ a zɔ́ɔn la, bɛ bɛ́ á yɛ mà ǹ nə́ Yezu a dɛ sii yɔrɔ bɔ, a gɔ́ɔ̃ yii wɔ̃. Á nɔmaa á wɔrɔ we pɔsɔɔ lɛ goa á woo ne Lawa a wúlu-bɔlen goledɛnan lɛn laanka Zuifun goledɛnan lɛn li,

⁴ á pɛ ǹ nɛ: «Maa zɛ̀rɛ baãnaa kɔ ka la ke, má sii baraa zɛnaa!» Ǹ nə́ tɔ́n pɛ nɛ: «Wɔsɛn wàa n sii n bɛ nɛ? N din mìi gɔ́ɔ̃ ǹ sii ni!»

⁵ Zudaasi nə́ n gɔn bɔ wɔrɔ lɛ ganaa, á pɛsɛ̃ tán Lawa a kion, á soo á woo n din bɔlɔ da biɛ nɛ.

⁶ Wúlu-bɔlen goledɛnan nə́ wɔrɔ lɛ goa, ǹ nə́ pɛ: «A kɔnpɛ ka wɔsɛn landa nɛ, minin bɛ́ Lawa goe ka wɔrɔ mɛn nɛ, wɔrɔ kɛ doamaa bie a n kaa kun ka bɛ-n wa, a giala minbuiin nyin giɔ̀mɔ nɛ.»

⁷ Ǹ bɛ́ ǹ nə́ da ǹ nə́ kaa kun, ǹ nə́ woo bǎã kɔ́n pii dɔnɔn-zɛnaali lon ka bɛa wɔrɔ lɛ nɛ, mà maǹ die tiin gere biĩ a nɛ.

⁸ Bɛ lɛ na á toa, ǹ tá bɛa bǎã lɛ bíi "mà bǎã" haalɛ tɔn pelo.

⁹ Lawa a boo gii-dali Zeremii boo mɛn pɛ, bɛ lɛ lɛ nɔmaa á pã: «Ǹ nə́ wɔrɔ pɔsɔɔ lɛ goa, Izirayeli minin nə́ lɛ kɔ mà ǹ tá màn mɛn sarɛɛ a pii ǹ giɔ̀mɔ lɛa,

¹⁰ ǹ nə́ woo bǎã pii ni dɔnɔn-zɛnaali lon, ka Dɛnaa bɛ́ á pɛ masɛ-n lɔn.»

Pilati nɔ̀n mɛn da Yezu la

¹¹ Yezu woo, á n bɔlɔ pɛ gánadɛnaa yɔrɔ-a. Bɛ́ nɔ̀n da la: «N din lɛ n Zuifun kii lɛa ya?» Yezu tɔ́n pɛ: «N din nə bɛ pii.»

¹² Bɛ kio, Lawa a wúlu-bɔlen goledɛnan laanka Zuifun goledɛnan kɔsɔn bɛ́ a zɛ̀rɛ biɛ, a boo kɔ́n da wa.

¹³ Pilati tɔ́n pɛ nɛ: «Ǹ bɛ́ zɛ̀rɛ mɛn tumaa diɛ n la, n too a miɛ wa?»

¹⁴ Sɛnɛ, Yezu na a lɛ si ka bɛ kɔ́n nɛ wa. Bɛ lɛ na á gánadɛnaa tɔwaa parsiini.

Pilati a lɛ kɔ Yezu a gɛ̀ ganaa

¹⁵ Bɛ̀ *kiɛ̃mala ǹ zɔ́n nə́ dɔ lɔn, gánadɛnaa n kòso nɛ goon diɛ. Zaman bɛ́ giɛ li, mà a min mɛn da, a n bɛ diɛ.

¹⁶ Bɛa waáraa lɛ nɛ, bɛ̀ kòso nɛ goon tá ǹ lon, a tɔ n Yezu ǹ nə́ bíi Barabaasi. A tɔ bɔ parsiini.

¹⁷ Zaman lɛ bɛ́ á n lɛ sɔkɔn, Pilati tɔ́n nɔ̀n da ǹ la: «Ka ǹ giɛ li ma die da? Yezu mɛn bɛ́ ka á bíi Barabaasi, hinlaa Yezu mɛn bɛ́ ka á bíi Minin Nyin-sili?»

¹⁸ A giala Pilati dɔ̃ parsiini, mà foo a wuu pɛ na á toa ǹ nə́ Yezu wɔ asɛ gɔn.

¹⁹ Pilati bɛ́ kiri wɔ ǹ bǎã nɛ, a lɔ min dia mà a wo pɛ nɛ: «N nyan toa n nə n sii wɔ giĩ zɛ̀rɛ baãnaa kɛ a sii-n wa. A giala masɛ narɛɛ mɛn wɔ a wɔ gɔn la gunun tèlò-n, á masɛ nɔmaa parsiini.»

²⁰ Lawa a wúlu-bɔlen goledɛnan laanka Zuifun goledɛnan nə́ zaman lɛ gòãn sɔmɔ, mà ǹ Pilati nyankɔ a Barabaasi da, a Yezu dɛ.

²¹ Gánadɛnaa wusoo á nɔ̀n da ǹ la: «Ka ǹ giɛ li ma kɛa min paa kɛ lɛ mɛn da?» Ǹ nə́ tɔ́n pɛ nɛ: «Barabaasi!»

²² Pilati tɔ́n nɔ̀n da ǹ la: «Yezu mɛn bɛ́ ǹ tá bíi Minin Nyin-sili, ma wàa zɛnaa bɛ nɛ?» Ǹ dinin tumaa nə́ n toa: «A dere gɔn ganaa!»

²³ Pilati wusoo á nɔ̀n da: «A na á wàa sii baraa zɛnaa?» Sɛnɛ, ǹ nə́ wusoo ǹ nə́ n lɛn saa lon kɔsɛkɔsɛ: «A dere gɔn ganaa!»

²⁴ Pilati bɛ́ á dɔ̃, mà asɛ a die boe la a sii kɔ́n zɛnaa wa, mà màn nə́ tɔn miɛ zaman lɛ a lala diɛ li, á mu saa, á n gɔn pii zaman lɛ yɔrɔ-a, á pɛ: «Ma gòɛ̃ ba giĩ kɛ a gɛ̀ sii-n wa! Ka dinin mìi gɔ́ɔ̃ ǹ sii ni!»

²⁵ Zaman lɛ tumaa tɔ́n pɛ: «A gɛ̀ lɛ a koen nə goã wɔsɛn dinin laanka wɔa nɛnyaanan mìi ni!»

²⁶ Pilati nɔmaa á Barabaasi bɔ á kɔ ǹ la, á minin kaa Yezu ganaa ǹ nə́ duwəə ka sɔsɔrɔ nɛ, á tɔ́n kɔ ǹ la mà ǹ dere gɔn-lakerekaã ganaa.

Sɔraasin man yaa we Yezu ganaa

²⁷ Gánadɛnaa a sɔraasin nə́ woo ka Yezu ni a sumu-n. Sɔraasin tumaa daa a lɛnpɛnɛ walan.

²⁸ Ǹ ná a mɔnaan sɔlɔ ǹ nə́ ǹ bɔ a ganaa, ǹ nə́ dɔnkɛ tã wɔ a ganaa.

²⁹ Ǹ nə́ kii bafolo tã ka nyan gùrùn ni, ǹ nə́ wɔ a mìi ganaa, ǹ nə́ bàbàla wɔ a gusin a gɔn, ka n pɛ mà maǹ koɛ kii lɛa. Bɛ kio, ǹ nə́ n musi lɛn kurumaa tán a giulun, ǹ nə́ yaa wɔ a ganaa, bɛ̀ ǹ tá pii: «Fòo le, Zuifun kii!»

³⁰ Ǹ nə́ sɛ̀ kaa a ganaa, ǹ nə́ bàbàla lɛ saa bɛ̀ ǹ duwəə ne a mìi ganaa.

³¹ Ǹ bɛ́ ǹ nə́ yaa wɔ a ganaa ǹ nə́ nya ǹ mɛn waáraa, ǹ nə́ dɔnkɛ lɛ sɔlɔ ǹ nə́ bɔ a ganaa, ǹ nə́ wusoo ǹ ná a din a mɔnaan goa ǹ nə́ ǹ wɔ a ganaa, bɛ kio ǹ nə́ woo ne, mà maǹ dere gɔn ganaa.

Maǹ Yezu dere gɔn-lakerekaã ganaa

³² Ǹ bɛ́ soe kiwi gɔ́ɔ̃ nɛ, ǹ nə́ kaa Sirɛnin giĩ goon lɛ, a tɔ n Simɔn. Sɔraasin lɛn nə́ kũ ka pàã nɛ, mà a Yezu a dere ǹ gɔn gũ.

³³ Ǹ nə́ dɔ bǎã kɔ́n nɛ, ǹ nə́ bíi "mìi pán bǎã", ǹ dinin bɔlɔ nɛ, mà "Golgootaa".

³⁴ Ǹ nə́ duvɛ̃ lɔlɔkɔn ka yii tii ǹ màn kɔɔsɛ kɔ́n nɛ walan, ǹ nə́ kɔ Yezu la mà a mi. Sɛnɛ, a bɛ́ a ná a nɛ̀n da, a lɛ kɔ á mi wa.

³⁵ Ǹ nə́ dere gɔn ganaa, ǹ nə́ n pã a mɔnaan ganaa, ǹ nə́ tɔ́n nə ǹ gii kɔn.

³⁶ Bɛ kio, ǹ nə́ giã tán-a ǹ ná a lɛduə̃.

³⁷ Ǹ dɔlɔ bɔ a ganaa sii mɛn tumaa taman yii, ǹ nə́ bɛn kiɛ̃ màn ganaa, ǹ nə́ dere a mìi la mà "Zuifun kii Yezu lɛ n ka kɛ nɛ".

³⁸ Ǹ nə́ mɛnaa minin la wole min paa dɔ dere gɔn ganaa Yezu li, goon ná a gusin, goon ná a gɔsɛ.

³⁹ Min mɛnɛn nə́ goã kiɛ̃ walan, bɛn man nə́ goã ǹ mìi papasɛ bɛ̀ ǹ tá sɔ kiɛ la.

⁴⁰ Maǹ nə́ goã pii ni: «N din mɛn bɛ́ mà nsɛ n die Lawa a Kion wurii, n wusoo n kɔsɔ dɔ lɛawaa sɔɔ gɔ́ɔ̃ nɛ, n din kirisibaa, bɛ̀ ma n Lawa a Nɛgiĩ lɛa sonbore, gisĩ n nə n bɔ dere ǹ gɔn ganaa kəni!»

⁴¹ Lawa a wúlu-bɔlen goledɛnan laanka landa sii-daraalin dɔn nə́ yaa wɔ a ganaa kun ka Zuifun goledɛnan nɛ, ǹ nə́ pɛ:

⁴² «N min kɔsɔn kirisibaa, sɛnɛ, n din ba boe la n nə n din kirisibaa wa! Táa ma n Izirayelin kii lɛa? Gisĩ sisia kəni n nə n bɔ dere ǹ gɔn ganaa, wɔsɛn nə tɔn golee n li.

⁴³ N foo doa Lawa ganaa n pɛ, mà nsɛ n Lawa a Nɛgiĩ lɛa. Haya! Bɛ̀ Lawa lɛ a n narɛ kəni, a n kirisibaa sisia, wɔsɛn nə yɛ!»

⁴⁴ Ǹ mɛnaa minin la wole min paa mɛn dɔ dere gɔnɔn ganaa a li, bɛn dɔn man nə́ goã sɔ kiɛ la miɛ̃.

Yezu a gɛ̀

⁴⁵ Wasa bɛ́ á dɔ baã bii, wɔlɔ tii gána lɛ paǹ din tumaa nɛ yǎa biikoo sɔɔ, wasa lɛ kanɛɛ a biikoo li.

⁴⁶ Wasa lɛ bɛ́ á kanaa, Yezu nə́ n lɛ dɛ kɔsɛkɔsɛ á pɛ: «Maa Lawa, maa Lawa, wàa na á baa n tá masɛ toɛ walan?» (ǹ dinin bɔlɔ nɛ, mà "Yilii, Yilii, lema sabakatanii?")

⁴⁷ Min mɛnɛn bɛ́ ǹ nə́ goã walan, bɛn tɛn ná a lɛ ma, ǹ nə́ tɔ́n pɛ: «Á ke lɛ diɛ Yilii la!»

⁴⁸ Ǹ goon nə́ baa si gɔrɔ, á woo màn sã duvɛ̃ pipiã li á wɔ bàbàla ganaa á dia Yezu la, mà a mi.

⁴⁹ Gialakunun nə́ tɔ́n pɛ: «A toa dɛ, bɛ̀ Yilii á die a kirisibiɛ, wɔsɛn tá re giɛ a ganaa!»

⁵⁰ Yezu wusoo á n lɛ dɛ doo ka kɔsɛkɔsɛ, a fɔfoã nə́ n si la.

⁵¹ A din biikoo lɛ li, Lawa a kion gɔ́ɔ̃ kuru kɔn-a ǹ mɔnaa toɛ̃ kɔn-a màn paa, a saa a lon ganaa, a daa a tán-a yaa. Tán bìn da, páran nə́ yuyu,

⁵² yalan nə́ n lɛ bũ. Lawa a minin mɛnɛn nə gã lɛlɛ, bɛ gigiã yii wusoo á kaa,

⁵³ ǹ nə́ soo ǹ nə́ ǹ bɔ yala-n. Yezu yii a kaa a bɔ geren bii kio, ǹ nə́ wɔ Zeruzalɛmu kiwi lɛ gɔ́ɔ̃ nɛ, min gigiã nə́ ǹ yɛ walan.

⁵⁴ Rɔmun sɔraasin goledɛnaa laanka sɔraasin mɛnɛn nə́ goã Yezu lɛduĩ, bɛn nə́ tán a bìn-diɛ lɛ yɛ, kun ka sii mɛn tumaa nə́ n zɛnaa, nyɛ́ɛ nə́ ǹ kũ parsiini, ǹ nə́ tɔ́n pɛ: «A na á goã Lawa a Nɛgiĩ lɛa sonbore!»

⁵⁵ Lɔ gigiã mɛn nə kɔ Yezu kio lɛ haalɛ Galilee gána nɛ, bɛ̀ ǹ dí nya nɛ, bɛn nə́ ǹ toa sɔsɔɔ ǹ nə́ ga bɛa siin lɛn ganaa.

⁵⁶ Bɛa lɔn lɛn bii, Magadalaan Mariya tan, Zaaki laanka Zozɛfu a náa Mariya nɛ, ka Zebedee a nɛnyaanan náa nɛ.

Yezu gere biĩ boo

⁵⁷ Wasa bɛ́ á mɛ, Arimateen giĩ pàãma goon nə́ daa, á tɔ n Zozɛfu, a dɔ na á goã koe Yezu lɛ.

⁵⁸ Á woo Pilati li, á Yezu gere nyankɔ a lon. Pilati tɔ́n pɛ mà ǹ kɔ la.

⁵⁹ Zozɛfu ná a gere lɛ saa, á bĩ ǹ mɔnaa dii pɛnɛ a ganaa.

⁶⁰ A yala mɛn fɔ̃ kele kolo ganaa a din wɔ lɛa, á woo bĩ walan. Bɛ kio, á kɔlɔ kaara birikəə᷉ á yala lɛ lɛ tã nɛ, á tɔn kiɛ̃.

⁶¹ Magadalaan Mariya laanka Mariya goon kɛ lɛ goã walan giã-n tán-a yala lɛ yɔrɔ-a.

Yezu a yala lɛduə̃

⁶² Bɛa lɛawaa, *susu ǹ pii a siin yɔrɔ bɔ pinaa a lɛawaa, Lawa a wúlu-bɔlen goledɛnan laanka *Fariziɛ̃n nə́ woo Pilati li kun,

⁶³ ǹ nə́ pɛ: «Goledɛnaa, wɔsɛn yiri tá a nɛ minin yiri-sãli kɛ lɛ pɛ, bɛ̀ a yii bɛ́ tɔn koo mà asɛ a gɛ̀ lɛawaa sɔɔ, mà asɛ yii á die kiɛ.

⁶⁴ Bɛ lɛ taman yii, wɔsɛn man nə n nyankoe, n pɛ n sɔraasin manɛ ǹ yala lɛ lɛduə̃ yǎa a lɛawaa sɔɔbaa ǹ wɔ pinaa, màn mɛn bɛ́ toɛ, a kialandɛnan baran da a gere lɛ koã, ǹ wusoo ǹ pɛ minin manɛ bɛ kio, mà a yii na á kaa á n bɔ geren bii wa. Bɛ̀ a n zɛnaa miɛ̃ wa, bɛa minin yiri sã á gole koe á la bibinaa wɔ kɛ nɛ.»

⁶⁵ Pilati tɔ́n pɛ ǹ nɛ: «Sɔraasin nə́ ke, ǹ tá boe la ǹ na a lɛduə̃. Ka woo ka n doa ka ga yala lɛ walan parsiini.»

⁶⁶ Ǹ nə́ tɔ́n woo ǹ nə́ yala lɛ a lɛduə̃ sii yɔrɔ bɔ. Kɔlɔ mɛn bɛ́ a lɛ tiɛ̃, ǹ nə́ gɔn bǎã da bɛ ganaa, min ba a lɛ buĩ a din gɔn wìi a lɛa wa. Ǹ nə́ sɔraasin koa a li, mà ǹ na a lɛduə̃.