Loen 92 - LAWA A BOO SONBORE 2011

Nsɛ Lon a Lawa lɛ n Dɛnaa Lawa lɛa yǎa duduu

¹ Loe mɛn bɛ́ n loe *susu ǹ pii li. Loe ne.

² Gɛrɛsiɛ n ka kɛ-n dɛ! Min nə Dɛnaa Lawa gugurukɔ, a loe lɔ a Lon a Lawa gole kɛ tɔ bɔ nɛ.

³ A din goon nə ka kɛ dɔ nɛ, n yoo baayɛlɛ gɔrɔ, n na a kɔn-narɛɛ gole lɛ laakalaa. Tèlò-n doo, n na a bǐɛ̃ duduu kɛ lɛ pɛ.

⁴ N pɛ tùtun kɛn wuu li: a biɛ fùdɛnaa kɛ nɛ, ka a tɔrɔ gialakunun kɛn dɔn nɛ.

⁵ Sonbore, Dɛnaa Lawa, n nya ǹ dín man ma foo kɔɔ̃n koe. Bɛ̀ ma á giɛ ǹ-a, ma nə n lɛ dii nyɛnyɛɛ gɔn.

⁶ Dɛnaa Lawa, n nya ǹ dín lɛn tá dadara dɛ. N taasiɛn lɛn tá zuzulu, á la yii ni.

⁷ Baãnaan ba màn kɔn doɛ̃ a-n wa, yiriwɛɛnaan ba màn kɔn dɔ giala miɛ a-n wa.

⁸ Min babaraan man yui fufuu, ka buu bɛ́ lɔn. Baraa-zɛnaalin kɛn man ka maǹ là nyantoro la. Sɛnɛ, ǹ lɛ nyɔmɔɔ ǹ bǎã n bɔ̀n duduu lɛa.

⁹ Sɛnɛ, Dɛnaa Lawa, nsɛ mɛn bɛ́ lon, nsɛ n Dɛnaa Lawa Gole lɛ lɛa yǎa duduu.

¹⁰ Dɛnaa Lawa, n zɔ́ɔn kɛn kaa, n zɔ́ɔn kɛn man die bɔ̀n biɛ, baraa-zɛnaalin kɛn tumaa á re sasawɛɛ.

¹¹ Sɛnɛ, ń masɛ mìi saa lon, má pàã yɛ ka don a zù bɛ́ lɔn. Ń wusoo ń maa sii tumaa bǐɛ̃ kɔ.

¹² Ma yii n maa zɔ́ɔn mɛnaa ganaa, ma too nə ǹ lɛ dɛ miɛ, bɛa minin kɛn lɛn giɛ maa bɔ̀n li.

¹³ Min pepere n yui ka sèwo da bɛ́ lɔn, a n pàã boe a kaka kɔ, ka Liban a da dadaran kɛn bɛ́ lɔn.

¹⁴ A n goɛ̃ zumii-n Dɛnaa Lawa a Kion, a n boe a gole kɔ Lawa a sumu-n.

¹⁵ Ta a na á zizi kɔ, a nɛ-kɔ a sàabiɛ wa. Mu n goɛ̃ a gɔ̀nɔn nɛ giãgiã, a n goɛ̃ buruu miɛ̃ duduu.

¹⁶ A n goɛ̃ Dɛnaa Lawa a peperebaa laakalɛɛ, a pɛ: Lawa n ma tamaa ǹ bǎã lɛa, sii kɔkɔrɔ kɔn ba a li wa.