Loen 55 - LAWA A BOO SONBORE 2011Maa dàã a yoo ma gialaa loe 1 Loe-saalin goledɛnaa loe mɛn lɔ, ǹ nə́ da zii ka loe lɔ ǹ mànan nɛ, biɛn nə́ ǹ ganaa. Davida a loe goon ne. 2 Lawa! N too kɔ maa nyankɔ li, bɛ̀ ma á goã-kũ diɛ n-a, n baran n duru ma la wa. 3 N yiri kɔ ma li, n maa nyankɔ si. Maa foo ziziɛ̃ gɔ́ɔ̃ nɛ, ma nə n yiri binbirin boe, man busu ǹ boon diɛ. 4 Zɔ́ɔ kɛ bɛ́ boo mɛn diɛ, min baraa kɛ bɛ́ boe ma yii-n lɔn, ǹ bɛ́ baraa mɛn zɛnɛɛ ma nɛ, ǹ bɛ́ ma gialaa ka foo-busii mɛn nɛ, bɛ́ ma yiri lɔlɔkɔn. 5 Ma foo n biɛ niɛ̃ ma gɔ́ɔ̃ nɛ, gɛ̀ a nyɛ́ɛ n ma kuĩ. 6 Nyɛ́ɛ laanka gɔ̀nɔn bìn diɛ n ma gialaa, foo biɛ niɛ̃ dɔ n die ma dii. 7 Bɛ lɛ nɛ má pɛ, máa bɛ̀ wuruun nyàa kan man ma lon! Bɛ̀ man die piɛ̃, ma ga susu ǹ bǎã li. 8 Sonbore, bɛ̀ a n miɛ̃, bɛ̀ man baa sii, ma wo sɔsɔɔ, ma wo giã don bii. *Doa 9 Bɛ̀ ma á re duru ǹ bǎã yii fufuu, a ma si piɛ̃ gole kɛ la. 10 Dɛnaa! Maa zɔ́ɔn lɛn sii lɔlɔkɔn, toa ǹ dinin nə mɛ kɔn. Má yɛ, kiwi lɛ gɔ́ɔ̃ nɛ, kakaarɛbaa laanka sii lɔlɔkɔn na a tan, 11 Bɛa siin kɛn lɛn man kiwi lɛ lɛnpɛnɛ penleen laanka tèlò ne. A gɔ́ɔ̃ dɔ nɛ, bɛa baraabaa siin kɛn lɛn manə ǹ tan. 12 Gɛ̀-dɛ nɛ, pàã nyaa kɔn nɛ nɛ, koɛ̃n-koe ne, bɛn manə n zɛnɛɛ a ziin la. 13 Min mɛn bɛ́ sɔ koe ma ganaa, ǹ dɛnaa bie maa zɔ́ɔ lɛa wa, bɛ bie wa, bɛ̀ ma á sii ma ganaa. Maa zɔ́ɔ bie ma gialaa wa, bɛ bie wa, bɛ̀ ma á re n duri la. 14 Sɛnɛ, nsɛ kɛ nɛ, ma din a dàã lɛa, maa giaára lɛa, maa koa kun wole dɔ lɛa. 15 Wɔ́ goã boo sonboren diɛ kɔn nɛ, bɛ̀ wɔ bɛ́ tɔ we kun, Lawa a kion kɛ nɛ. 16 Lawa, toa bɔ̀n maa zɔ́ɔn kɛn yɛ. Toa ǹ gisĩ geren piɛ, ǹ yii n koo, a giala, baraabaa nə́ ǹ gɔ́ɔ̃ pã. 17 Masɛ n lɛ diɛ Lawa la, a da n dɔ ma lɛ. Dɛnaa Lawa á re ma kirisibiɛ. 18 Wasamiɛ̃nɛ, baayɛlɛ ka penleen ne, bɛ̀ ma yiri nə́ n lɔlɔkɔn, má n busu ǹ boo diɛ, Lawa ma lɛ ma. 19 Á ma si sii la, á ma tamaa là nyantoro gɔ́ɔ̃ nɛ, bɛ̀ zɔ́ɔn bɛ́ ma gialaa. 20 Lawa die a ma lɛ ma, a sìi da ǹ ganaa, Lawa mɛn bɛ́ kii lɛa, haalɛ lɛlɛ lɛlɛ. Doa Minin kɛn lɛn ba re n bɔyɛɛ wa, a giala, ǹ ba nyɛ́ɛ biɛ Lawa-n wa. 21 Maa lɛlɛ a dàã kɛ lɛ nə́ n bɔyaa a giaáran li. Á lɛ kɔ kɔn la kɛ lɛ ziziɛ̃ wɔ biin ni. 22 A lɛ gɔ́ɔ̃ ǹ boo n parɛparɛ ka zoo ne, sɛnɛ, zia na a gɔ́ɔ̃ nɛ. A boon lɛn man suusuu, ǹ nə́ la nyɔɔ nɛ, sɛnɛ, minin fɔ ǹ gɔyan manɛ. 23 N taasiɛ siin tumaa kɔ Dɛnaa Lawa la. Á re pàã koe n la. A re toɛ min pepere lɛ tatalaa duduu wa. 24 Lawa! N din tá re toɛ minin kɛn nə gã, ǹ wo yala-n. Ǹsɛn kɛn lɛn gɛ̀ dii, ǹ nə́ minin yiri siɛ̃. Ǹ yii ba re goɛ̃ koo, ǹ nə ǹ lɛawaan talɛɛ din bɔ wa. Sɛnɛ, masɛ foo n doa nɛ n din ganaa, Dɛnaa Lawa. |
San Bible Protestant Edition © Bible Society of Burkina Faso, 2011.
Bible Society of Burkina Faso