Loen 109 - LAWA A BOO SONBORE 2011

Nɔmaa-wɔle a lɛ dɛ Lawa ganaa ǹ loe

1 Loe-saalin goledɛnaa loe mɛn lɔ. Davida a loe goon ne. Loe ne.

¹ Loe-saalin goledɛnaa loe mɛn lɔ. Davida a loe goon ne. Loe ne. Lawa, ma nə n din tɔ boe, n baran n lɛ tã wa.

² Min babaraa soɛ-bɔlen kɛn manə n lɛ bũ, ǹ nə́ boo da ma ganaa. Ǹ boo mɛn tumaa da ma ganaa, a tumaa n soɛ lɛa.

³ Ǹ boon lɛn man zɔ́ɔbaa boon lɛa, ǹ nə́ ma lɛnpɛnɛ nɛ. Maǹ yui ma gialaa kooro kooro.

⁴ Masɛ nə́ ǹ kuĩ maa dàãn lɛa, sɛnɛ, ǹsɛn man zɛ̀rɛ koɛ ma ganaa. Ka bɛ yii ni, man Lawa nyankoe ǹ lɛa.

⁵ Ǹ nə́ maa bǐɛ̃ saraa ka baraa nɛ, ǹ nə́ maa dàãbaa saraa ka zɔ́ɔbaa nɛ.

⁶ Ǹ nə́ kɛ pɛ dɔn dinin maa wɔ paǹ li: Min bɔ, bɛ yoo a gialaa a zɛ̀rɛ baali lɛa. Toa ǹ dɛnaa goã min babaraa lɛa, a n tele lon a gusin, sɛnɛ, a baran n dɔ lɛ wa.

⁷ A kiri lɛ gɔ́ɔ̃ nɛ, toa zɛ̀rɛ kũ. Toa a nyankɔ din nə goã ka sii baraa bɛ́ lɔn.

⁸ Toa a nyin kunun kɔ, min kɔsɔ na a dí nya ǹ bǎã saa.

⁹ Toa a nɛnyaanan nə nɛ toenən baa, a lɔ dɔ giɔɔrɔ baa.

¹⁰ Toa a nɛnyaanan nə biə́ wolen baa, ǹ nyankɔlen baa, sɔɔsɔɔ ǹ kɛbɔlɔ ganaa.

¹¹ A giɔ̀mɔ dama-a wole die a daa, a na a gɔn màn tumaa goa. A màn mɛn yɛ, tiin die ǹ bɛ kokoo.

¹² Min kɔn din baran bǐɛ̃ zɛnaa-n wa, min kɔn dɔ baran makara bɔ a nɛ toenən kɛn-a, á ǹ toɛ a kio wa.

¹³ A tɔrɔ die a papaã. Kànaa ka lɛ̀ dan kɔn, yiri bɔ ka a tɔ-n ka lenlen.

¹⁴ Ǹ die ǹ nə ǹ di laanka ǹ digolon sii baraan pɛ, ǹ Dɛnaa Lawa yiri da a nɛ.

¹⁵ Bɛa siin kɛn lɛn tumaa die ǹ goã Dɛnaa Lawa yɔrɔ-a duduu, ń giɛ, a tá minin kɛn lɛn tɔ tuturi, a bɔ kanaa.

¹⁶ Sonbore, giĩ kɛ lɛ nə n yiri koa a nɛ, á bǐɛ̃ zɛnaa wa. A na á bɔ doobaa yii ni, ka a daa a gã, doobaa laanka foo ziziɛ̃ wole ne.

¹⁷ Minin koe boo na á goã kɔɔ̃n a ganaa, bɛ lɛ die a wusoo, a na a din yɛ. Minin barka dama-a ǹ boo goã kɔɔ̃n a ganaa wa, a dɔ baran barka dama-a yɛ wa.

¹⁸ Lɛn baraa koe baa a ganaa, ka dɔnkɛ bɛ́ min ganaa lɔn, a die a wɔ a gɔ̀nɔn nɛ ka mu bɛ́ lɔn, a kiɛ̃ a wen ne ka nyɔɔ bɛ́ lɔn.

¹⁹ Lɛn baraa lɛ din nə goã a ganaa, ka mɔnaa bɛ́ lɔn. A na a binbin yii biikoo tumaa li, ka maabɛlɛ bɛ́ lɔn.

²⁰ Taarɛ! Dɛnaa Lawa n die ma zɛ̀rɛ-baalin lɛn sarɛɛ bɛa yɔrɔ kɛ lɛ la, min mɛnɛn lɛn bɛ́ boo baraa diɛ ma ganaa.

²¹ Nsɛ dɔ, Dɛnaa Lawa, sii kɔn zɛnaa maa wɔ paǹ li, n din tɔ kɛa lɛa. N kɔn-narɛɛ gole lɛ á bǐɛ̃ zɛnɛɛ ma nɛ, ma kirisibaa.

²² Man doobaa lɛa, má nɔmaa dɔn. Ma foo dɔ ziziɛ̃ ma gɔ́ɔ̃ nɛ.

²³ Maa yiikoonaabaa lɛ n kiɛ̃, ka wasamiɛ̃-n wúlu bɛ́ lɔn. Maǹ ma lui ka bisin ni ma nɛ.

²⁴ Má n lɛ sɔɔ taãn-taãnɛ, haalɛ pàã ba ma-n doo, ma á golee lon wa. Màn-bii baã lɛ taman yii, má laa ka kaka.

²⁵ Má n baa sàn kɔ ǹ màn lɛa maa zɔ́ɔn gɔn. Bɛ̀ ǹ nə́ ma yɛ, manə ǹ wii yiɛ, ǹ yaa wɔ ma ganaa.

²⁶ N dɔ ma lɛ, Dɛnaa Lawa, maa Lawa. Ma kirisibaa a kɔnpɛ n kɔn-narɛɛ gole kɛ nɛ.

²⁷ Dɛnaa Lawa, toa ǹ nə n din pàã kɛ dɔ̃, toa ǹ dɔ̃, mà n din nə́ ń dí kɛ nya.

²⁸ Ǹsɛn man lɛn baraa bíi ma li sɛnɛ, nsɛ n barka diɛ ma-a. Maǹ nə́ yoo ǹ nə́ n gòãn dii ma ganaa, sɛnɛ, sìi nə́ ǹ kũ, n dí-nyali sɛ nə́ n nyɛnyɛɛ.

²⁹ Barka nə́ n bɔ ma zɛ̀rɛ-baalin lɛn nɛ, sìi nə́ ǹ kũ babaraa nɛ, ǹ ba n sii la doɛ̃ wa.

³⁰ Man die barka diɛ Dɛnaa Lawa nɛ ka lɛn gole ne, man die a tɔ boe zaman bii.

³¹ A giala, a din nə n tele lon doobaa gusin, a n dɔ lɛ, a si a dɔlɔ damala wolen la.