KZS1 27 - LAWA A BOO SONBORE 2011

Gána lɛ a sɔraasin yɔrɔ bɔ ǹ gɔn

¹ Izirayeli minin mɛnɛn bɛ́ dí nyɛɛ kii ni, ǹ tɔn goa ǹ sɛ́wɔ á ke: Kɛdɛnan manɛ, sɔraasin nyɛɛnaadɛnan mɛnɛn bɛ́ sɔraasi duu goon hinlaa paabiɛ mìi la, sɔraasin sii yɔrɔ-bɔlen ne. Ǹ dí n ka sɔraasi kurun gamawalan nɛ lɛ̀ din tumaa gɔ́ɔ̃ nɛ. Bɛa sɔraasi kurun kɛn lɛn man dí nyɛɛ ǹ nə́ kɔn boboe a ganaa mui li. Sɔraasi kuru goon ne minbuiin nɛ duu fuəwensii (24 000).

^2-3 Ǹ goã sɔraasin goledɛnan mɛnɛn kio, bɛbn man ka kɛn nɛ: Mui bibinaa, Perɛso a tanlɛ nɛ, Zabdiyeli a nɛgiĩ Yakobamu ni. Min duu fuəwensii na a sɔraasi kuru lɛ nɛ. A din ni sɔraasin nyɛɛnaandɛnan tumaa mìi la mui bibinaa lɛ nɛ.

⁴ Mui paabaa ǹ wɔ: Awoki a nɛgiĩ Dodaayii n sɔraasin nyɛɛnaandɛnaa lɛa, Mikilɔti na a sɔraasin mìi la. A sɔraasi kuru lɛ n min duu fuəwensii.

⁵ Mui sɔɔbaa ǹ wɔ: Lawa a wúlu) bɔlen goledɛnaa Yoyada a nɛgiĩ Benaya nɛ. A sɔraasin man min duu fuəwensii.

⁶ Benaya lɛ n min foo tanaa lɛa kun ka min pɔsɔɔ lɛ nɛ, a din dɔ nə ǹ mìi la. A nɛgiĩ Amizabaadi dɔ n kun ka sɔraasi kuru lɛ nɛ.

⁷ Mui siibaa ǹ wɔ: Zoabu ǹ dɔɔ̃n Azayeli ni, bɛ kio, a nɛgiĩ Zebadia nɛ. A sɔraasin man min duu fuəwensii.

⁸ Mui soorobaa ǹ wɔ: Izira a tanlɛ min Samuti ni kiã lɛa. A sɔraasin man min duu fuəwensii.

⁹ Mui sɔrɔbaa ǹ wɔ: Tekoa min Ikɛsi a nɛgiĩ Ira nɛ. A sɔraasin man min duu fuəwensii.

¹⁰ Mui sɔbaabaa ǹ wɔ: Palɔn min, Efrayimu tɔrɔ Elɛsi ni. A sɔraasin man min duu fuəwensii.

¹¹ Mui kiwisibaa ǹ wɔ: Husaa min Zera a tanlɛ min Sibekayii ni. A sɔraasin man min duu fuəwensii.

¹² Mui manangɔrɔbaa ǹ wɔ: Anaatɔti min, Bɛnzamɛn tɔrɔ Abiezɛɛrɛ nɛ. A sɔraasin man min duu fuəwensii.

¹³ Mui fùbaa ǹ wɔ: Netofaa min, Zera a tanlɛ min Marayii ni. A sɔraasin man min duu fuəwensii.

¹⁴ Mui fulugoonbaa ǹ wɔ: Piratɔn min, Efrayimu tɔrɔ Nenaya nɛ. A sɔraasin man min duu fuəwensii.

¹⁵ Mui fulupaabaa ǹ wɔ: Netofaa min, Ɔtniyeli a tanlɛ min Ɛldayii ni. A sɔraasin man min duu fuəwensii.

Tɔrɔn kiãn

¹⁶ Kiãn mɛnɛn bɛ́ Izirayeli tɔrɔn lɛn mìi la bɛn man ka kɛn nɛ. Urubɛn tɔrɔn: Zikiri a nɛgiĩ Eliezɛɛrɛ nɛ. Simiɔn tɔrɔn: Maakaa n nɛgiĩ Sefatiya nɛ.

¹⁷ Levi tɔrɔn: Kemuwɛli a nɛgiĩ Akabia. Aarɔn a sumu-n: Sadɔki ni.

¹⁸ Zudaa tɔrɔn: Davida ǹ dɔɔ̃n Eliwu ni. Isakaara tɔrɔn: Mikayele a nɛgiĩ Ɔmrii ni.

¹⁹ Zabulɔn tɔrɔn: Odavia a nɛgiĩ Isimaya nɛ. Nɛfutalii tɔrɔn Azirayeli a nɛgiĩ Yerimɔti ni.

²⁰ Efrayimu tɔrɔn: Azazia a nɛgiĩ Oze nɛ. Manaasee tɔrɔn talɛɛ: ǹ mɛn bɛ́lɛ̀nyɛɛn gɔn la, Pedayia a nɛgiĩ Zowɛli ni.

²¹ Manaasee tɔrɔn talɛɛ ke giã-n Galaati, Zakari a nɛgiĩ Ido ni. Bɛnzamɛn tɔrɔn: Abnɛɛrɛ a nɛgiĩ Yasiyeli ni.

²² Dan tɔrɔn: Yerohamu a nɛgiĩ Azareli ni. Izirayeli tɔrɔn kiãn man ka bɛn nɛ.

²³ Nɛ tenən mɛnɛn bɛ́ kɔnpii lɛ̀ fuə ne ka ǹ mɛnɛn bɛ́ nyaabaa-n lɛ̀ fuə ganaa, Davida bɛ kɔn nimi wa, a giala Dɛnaa goã á pɛ mà asɛ á re Izirayeli tɔrɔ mɔnɛɛ ka lon a leeren bɛ́ lɔn.

²⁴ Seruya a nɛgiĩ Zoabu minin nimii giala kɔ, sɛnɛ a boo la á nyɔmɔɔ wa. Lawa foo yoo Izirayeli li bɛa sii kɛ lɛ a lɛa. Bɛ lɛ na á toa zaman lɛ tumaa lɛ á kiɛ̃ nɛ, kii Davida a siin zɛnaa ǹ sɛ́wɔ lɛ n wa.

Kii gɔn mànan gamawalan wolen

²⁵ Adiyeli a nɛgiĩ Azimabɛti n giɛ kii gɔn mànan walan a nə́ ǹ tamiɛ̃. Oziasi a nɛgiĩ Yonatan nə giɛ gána lɛ a màn koan walan kiwi dadaran nɛ, kiwi bɔnboɛɛnɛn nɛ, don kionən ne ka gɔn da ǹ bǎãn nɛ.

²⁶ Kelubu a nɛgiĩ Eziri n gána lɛ a tán dí-nyali din tumaa mìi la.

²⁷ Ramaa min Simeyii n *rezɛ̃ da wurun tumaa mìi la. Duvɛ̃ mɛn bɛ́ boe bɛa rezɛ̃ da wurun kɛn nɛ koa ǹ wɔ lɛa, Sefamu a nɛgiĩ Zabdii n bɛ mìi la,

²⁸ Bɛti-Gedɛɛrɛ min Baali-Anan nə *olivie laanka a gɔrɔ wurun mìi la *Sefelaa nyankɔrɔ lɛ kɛ nɛ. Nyɔɔ mɛn bɛ́ koa n wɔ lɛa Zoasi n bɛ mìi laǹ.

²⁹ Saarɔn min Sitrayii n Saarɔn a tɔɔn buu sɔ̃ ǹ bǎã kɛa tɔɔ dadaran mìi la. Ǹ mɛnɛn bɛ́ buu soɛ̃ nyankɔrɔ lɛ kɔsɔn nɛ, Adalayii a nɛgiĩ Safati n bɛn mìi la.

³⁰ Isimayeli tɔrɔ Obili n nyɔɔmaan mìi la. Meronɔti min Yedia n dundun daãnan mìi la.

³¹ Agaara tɔrɔ Yaziiri n tɔɔ bibisinin mìi la. Min mɛnɛn bɛ́ giɛ kii Davida gɔn mànan walan, ǹ nə́ ǹ tamiɛ̃ bɛn tɔn man ka kɛn nɛ.

Davida a tá kun wolen

³² Davida ǹ dikoɛ Yonatan nə min yiridɛnaa lɛa, sɛ́wɔ-kiɛ̃-li ni. A n kii a yirikɔmala wole lɛa. Yeyiieli n Akimonii min lɛa, kii a nɛnyaanan doroo na a din gɔn.

³³ Ayitofɛli dɔ n kii a yirikɔmala wole lɛa. Kii dinmaa a giaára n ka Arkii tɔrɔ Husali ni.

³⁴ Benaya a nɛgiĩ Zozada laanka Abiataara Ayitofɛli a bǎã saa. Zoabu n kii a sɔraasin goledɛnaa lɛa.