Kawkanta 38 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Panalangin nin tawoy ampagdanas nin ka-irapan

(Kanta ni Dabid ya ma-in pamakirawat ha Pangino-on)

¹ Pangino-on, agmo ko ha-aren nin pahang mo, boy agmo ko parosawan no ampamahang ka.

² Hiko ay pinarosawan mon hinogathogatan nin kowinta yawò mo, boy nakatanam ako nin mabyat ya parosa mo.

³ Banà ha pahang mo, hay masakit ya angkatanam ko ha nawini ko ay masyadon mabyat, boy banà ha kasalanan ko, hay tanam ko ha bawbot-o ko ay emen anan ampangapihihiyay.

⁴ Hay kawkasalanan ko ay talagan kalipoyna, boy habayti ay masyadon biyat nin bilang ha karga ya agkoyna kayan gitan.

⁵ Hay hawhogat ko ay ampanhayo boy kapaparami-il nin banà ha katangahan ko.

⁶ Hiko ay nakayoyongoh nin banà ha kalele-an ko, boy ayin tegen ya pami-a-anito ko.

⁷ Emen akon ampo-olan ha ka-amotan ko, boy hay masakit ya angkatanam ko ha nawini ko ay masyadon mabyat.

⁸ Hiko ay angkomapey boy agkoyna makayan te-ehen ya kabyatan nin masakit ko; kayà ampan-agol ako ha kagolowan nin nakem ko.

⁹ Pangino-on, tandà moy kaganawan labay ko, boy angkalengè moy an-i-agol ko.

¹⁰ Hay posò ko ay pomitogpitog ha kakatogan ko. Angka-alihan akoynan hokaw, boy hay tegteg ko ay ambomereg ana.

¹¹ Hay aw-amigo ko boy kawkalamowan ko ay agana labay pakarani kongko nin banà ha hawhogat ko; kateng pamilya ko ay ampakarayò ana kongko.

¹² Hay tawtawoy labay mamati kongko ay nangikanà nin pandakep kongko; hay tawtawo itaman ya labay mamakakhit kongko ay ampagtotol nin ikahirà ko; hay pirmi lan an-ihipen ay panana-ol.

¹³ Hiko ay bilang ha teek ya ahè nin makalengè boy bilang ha pipih ya ahè makapaghalità.

¹⁴ Awò, talagan bilang ako ha tawoy ahè ampakalengè ta agko antombay.

¹⁵ Pangino-on, ampahimalà ako komo; tandà koy tobayen mo ko, Pangino-on kon Diyos.

¹⁶ Kayà ombayri ya hinalità ko: “Agmo dayi payagan nin galgalan ako nin kawka-away ko, o maghambog hila kongko no hiko ay kowinta natombah ta nakapagkasalanan ako.”

¹⁷ Hiko ay magayna matombah, ta hay angkatanam ko ay ahè angka-alih.

¹⁸ An-aminen ko boy ampaghehean ya kawkasalanan koy ampanggolo kongko.

¹⁹ Hay kawka-away ko ay mangaganday pawpagnanawini boy mangakhaw; malakè hila boy maski ayin bara-nan ay ampag-inakitan la ko.

²⁰ Hay ampipanggantin kala-etan ha kahampatan ay ampipangkomontra kongko, ta hay ansikapen kon gaw-en ay tamà.

²¹ Pangino-on kon Diyos, agmo ko pa-olayan boy agmo ko pakarayo-an.

²² Tampol kan pakarani kongko, ta tambayan mo ko, Pangino-on ya Mapangilibri kongko.