Kawkanta 21 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Pamomori ha Pangino-on banà ha pananalo

(Kanta ni Dabid)

¹ Pangino-on, hay towà nin arì ta binyan mo yan kakhawan; hiya ay talagan maliga ha pambi mo kona nin pananalo na.

² Hay anhangaren na ay inggawà mo kona, boy tinobay moy an-awoken na.

³ Pinolalagan mo ya nin mangahampat ya bawbagay, boy ha pananalo na ay kowinta kinoronawan mo ya nin taganas gintò.

⁴ Hay inawok na komoy biyay ay inggawà mo kona, ta pinakarà moy biyay na boy binyan mo yan biyay ya ayin anggawan.

⁵ Hiya ay nagkama-in nin masyadoy karangalan nin banà ha tambay mo kona, boy ha pamomo-on na ay nag-in yan bantog ha inggawà moy karangalan kona.

⁶ Hay impolalag mo kona ya kahampatan ay anggan makakanoman. Banà ta anti ka kona, hiya ay talagan maliga.

⁷ Hay arì ay ampahimalà ha Pangino-on; banà ha ingangalo ya ma-in panlalabi nin Pinakamakapangyariyan ya Pangino-on, hay pagka-arì na ay manatilin matibay.

⁸ Kaganawan ka-away mo, Pangino-on ay talowen mo, boy mapatalo moy kaganawan ampag-inakit komo.

⁹ No pangno manirà ya apoy ay ombayro itaman ya panirà mo ha kawka-away mo panlomateng mo. Ha kapahangan mo, Pangino-on, apo-en mo hila nin hay gamiten mo konla ay apoy.

¹⁰ Kaganawan inalalak la ay obohen mon patyen.

¹¹ Maski magplano hila nin mala-et ya kontra komo, habayto ay ahè mangyari.

¹² Hay kowinta yawò mo ya inhandà mo nin pamanà konla ay nakapatoyò ana konla; kayà hila ay mipampowayon mog-alih.

¹³ An-itag-ay nawen ka, Pangino-on, banà ha kakhawan mo. Magkanta kayi boy mamori komo banà ha kapangyariyan mo.