Kawkanta 120 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Panalangin para ha kalibriyan

(Kanta ya angkantawen mintras ampako ha bali nin Diyos)

¹ Hin anti ko ha kagipitan ay dinoma-ing ako ha Pangino-on boy nilengè na ko.

² Pangino-on, ilibri mo ko ha gawgawà nin mangabongkok boy mawmanloloko.

³ Hikawoy mangabongkok, anyay gaw-en nin Diyos komoyo, boy anyay iparosa na komoyo?

⁴ Hikawo ay parosawan nan pana-en nin matarem ya yawò, boy parosawan na kawo ha pagka-amot ya pinabayay oling.

⁵ Hay pamakipa-iri ko komoyo ay bilang akon nakipa-iri ha tawtaga Misik boy tawtaga Kidar ya tawtawoy katowà ya ogalì; kayà hiko ay ka-ingalo.

⁶ Sobray boyot nin pamakipa-iri ko ha tawtawoy angka-inakit ha katinekan.

⁷ Hay labay ko ay katinekan, piro no anhalita-en ko konla ya tongkol ha katinekan, hay anhalita-en la itaman ay tongkol ha kagolowan.