Kawkanta 118 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Pasasalamat ha Pangino-on ha pangilibri na banà ha kahampatan na

¹ Pasalamatan moyoy Pangino-on ha kahampatan na; hay panlalabi na ay ayin angga.

² Dayi, hay aw-inalalak ni Israyil ay maghalità nin ombayri: “Hay panlalabi na ay ayin angga.”

³ Dayi, hay pawparì ya aw-inalalak ni Aron ay maghalità simpri nin ombayri: “Hay panlalabi na ay ayin angga.”

⁴ Dayi, hay ampipanggomalang ha Pangino-on ay maghalità itaman nin ombayri: “Hay panlalabi na ay ayin angga.”

⁵ Banà ha kagipitan ko ay dinoma-ing ako ha Pangino-on; tinobay na ko boy inlibri, ta binyan na kon ka-inomayan.

⁶ Hay Pangino-on ay kalamo ko; kayà agko angkalimo. Warì ma-in tawo ya makapangno kongko?

⁷ Pangino-on ya kalamo ko; hiya ya ampanambay kongko. Kayà angkasigoro koy pananalo ko ha kawka-away ko.

⁸ Mas mahampat ya pahimalà ha Pangino-on kisa magkompiyansa ha tawo.

⁹ Mas mahampat ya pahimalà ha Pangino-on kisa magkompiyansa ha tawtawoy ampipamo-on.

¹⁰ Hay tawtawo ha kaganawan nasyon ay nakapalibot kongko ta angkalabanen la ko, piro ha kapangyariyan nin Pangino-on, hila ay mapatalo ko.

¹¹ Hila ay nakapalibot kongko, piro ha kapangyariyan nin Pangino-on ay mapatalo ko hila.

¹² Bilang hilan panilan ya ni-o-opong kongko, boy hila ay bilang ha nayangoy dawdowih ya ayin ka-ongnon na-opoh nin apoy, ta ha kapangyariyan nin Pangino-on ay mapatalo ko hila.

¹³ Ayin tegen ya pangalaban la kongko; kayà ampanga-ampoling la kon mapatalo, piro tinambayan ako nin Pangino-on.

¹⁴ Pangino-on ya ampamakhaw kongko; kayà ampagkanta ko nin pamomori kona. Hiya simpri ya nangilibri kongko.

¹⁵ Hay angkalengè ha ampa-iriyan nin tawtawoy mangahampat ay pamibobo-angaw ha katowa-an banà ha pananalo la ya hay an-ibo-angaw la ay ombayri: “Habayti ya pananalo ay ha panggogomawà nin kapangyariyan nin Pangino-on!

¹⁶ Hay kapangyariyan nin Diyos ay itag-ay; habayti ya pananalo ay ha panggogomawà nin kapangyariyan nin Pangino-on!”

¹⁷ Agko pon mati no alwan mabiyay ako et, ta ibabalità koy ginawà nin Pangino-on.

¹⁸ Maski masyadoy pamarosa kongko nin Pangino-on ay agna ko et pinayagan nin mati.

¹⁹ Hay poltan bali nin Diyos ay pagdanan nin mangahampat ya tawtawo; kayà lo-atan para kongko, ta pomahok akon magpasalamat ha Pangino-on.

²⁰ Habayti ya polta nin magpalako ha Pangino-on ay ayin kanayon ya makapahok, no alwan tawtawon bongat ya mangahampat.

²¹ Pasalamatan kata, Pangino-on, ta nilengè mo ko; hika ya nangilibri kongko.

²² Hay bato ya ahè tinanggap nin manggagawà bali ay nag-in pinakama-alagà ya bato.

²³ Habayti ay gawà nin Pangino-on; kapapa-ispanta bayti ya angkakit tamo.

²⁴ Habayti ya allo ay inggawà nin Pangino-on; kayà magtowà tamo nin banà bayri.

²⁵ Pangino-on, ilibri mo kayi; biyan mo kayi, Pangino-on, nin ka-inomayan.

²⁶ Bindisyonan nin Pangino-on ya anlomateng ha ngalan nin Pangino-on; hika ay bindisyonan nawen ha bali nin Pangino-on.

²⁷ Hay Pangino-on ay Diyos; hiya ya ampambin hawang konnawen. Hay ayop ya papatyen nin idolog ha Diyos ay itakel ha kortin hawhongay ya anti ha altar.

²⁸ Hika ay Diyos ko; kayà magpasalamat ako komo. Hika ay Diyos ko ya an-itag-ay ko.

²⁹ Pasalamatan moyoy Pangino-on ta hiya ay mahampat, boy hay panlalabi na ay ayin angga.