Kawkanta 114 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Kanta ya tongkol ha pangilibri nin Diyos ha Aw-israylita

^1-2 Hay aw-inalalak ni Hakob ya ayin kanayon no alwan Aw-israylita ay napa-iri hin hato ha nasyon Ihipto ya hay tawtawo bayro ay kahalakoy halità ha halità nin Aw-israylita. Hin nog-alih bayro ya Aw-israylita, hay dogal ya an-ingaten Hoda ay nag-in masagradoy dogal ya kama-inan nin Diyos, boy hay dogal ya an-ingaten Israyil ay ginawà nan pag-ari-an na.

³ Hin kowinta nakit nin Dagat ya Ma-orit ya Aw-israylita ya anlomateng, hay lanom nin hatoy dagat ay napihiyay; ombayro simpri ha lanom nin balah nin Hordan.

⁴ Hay bawbakil boy bawbakilbakil ay kowinta ampagtakompaw nin bilang ha toron kanding boy bilang ha oybon topa.

⁵ Antà napihiyay ya lanom nin Dagat ya Ma-orit, boy lanom nin balah nin Hordan?

⁶ Antà hay bawbakil boy bawbakilbakil ay kowinta ampagtakompaw nin bilang ha toron kanding boy ha oybon topa?

⁷ Hay babon lotà ay dapat mamegpeg, ta hay Pangino-on ya Diyos ya pinahimala-an ni Hakob ay anti bayro.

⁸ Hiya ya Diyos ya namahobol nin lanom ha bato, boy pina-agoh nay lanom ya nangibat bayro ha matyà ya bato.