Саалтыр 98 - Сибэтиэй Биибилийэ кинигэлэрэ

¹ Айыы Тойон – Ыраахтааҕы; титирэстиэхтиннэр норуоттар! Кини Херувимнар үрдүлэринэн бүрүстүөлгэ олорор; титирэстиэхтин сир үрдэ!

² Айыы Тойон Сиоҥҥа сүдү кыахтаах; Кини бары норуоттар үрдүлэринэн былаастаах.

³ Уруйдаатыннар кинилэр Эн улуукан дьулаан ааккын; Эн аатыҥ сибэтиэй!

⁴ Көнө дьүүлү таптыыр күүстээх Ыраахтааҕы, Эн кырдьыктаах быһыыны-майгыны олохтообутуҥ, Иаковка көнө дьүүлү, кырдьыгы көрдөрбүтүҥ.

⁵ Уруйдааҥ Айыы Тойон Таҥарабытын; сүгүрүйүҥ Кини бүрүстүөлүн атаҕар; Кини сибэтиэй!

⁶ Кини аҕабыыттарын кэккэлэригэр Моисейдаах Аарон бааллара; Кини аатын ыҥырааччылар ортолоругар Самуил эмиэ баара. Кинилэр Айыы Тойону ыҥыраллара, оччоҕо Кини хардарара.

⁷ Айыы Тойон былыт остуолбатыттан саҥарара; кинилэр Айыы Тойон уураахтарын, кинилэргэ биэрбит сокуоннарын тутуһаллара.

⁸ Айыы Тойон Таҥарабыт, Эн кинилэргэ хардарарыҥ, төһө да, буруйу оҥордохторуна, дьарыйарыҥ иһин, Эн кинилэри бырастыы гынар Таҥара этиҥ.

⁹ Уруйдааҥ Айыы Тойон Таҥарабытын, сүгүрүйүҥ Киниэхэ сибэтиэй хайатын үрдүгэр; Айыы Тойон, биһиги Таҥарабыт, сибэтиэй.