Саалтыр 96 - Сибэтиэй Биибилийэ кинигэлэрэ

¹ Айыы Тойон – Ыраахтааҕы! Үөрдүн-көттүн сир үрдэ; аата-ахса биллибэт арыылар өрөгөйдөрө үрдээтин!

² Халыҥ былыт, им балай хараҥа Кинини тулалыыр; Кини бүрүстүөлүн тирэҕэ – көнө дьүүл, кырдьыктаах быһыы.

³ Кини иннигэр уот күлүбүрүү айанныыр, тула өстөөхтөрүн түрүтэ салыыр.

⁴ Кини чаҕылҕана аан дойдуну сандаардар; сир, ону көрөн, титирэстээн ылар.

⁵ Хайалар буоска курдук ууллаллар Айыы Тойон иннигэр, сир бүттүүнүн Айыы Тойонун иннигэр.

⁶ Халлааннар Кини кырдьыктаах быһыытын биллэрэллэр; бары норуоттар Кини кэрэмэн килбиэнин көрөллөр.

⁷ Саакка киирдилэр мас таҥараларга сүгүрүйээччилэр, туһата суох эмэгэттэринэн киэн туттааччылар; таҥаралар бука бары Кини иннигэр нөрүйэллэр.

⁸ Сион, ону истэн, үөрэр-көтөр, Иуда куораттара өрөгөйдүүллэр – Эн көнө дьүүлгүттэн, Айыы Таҥара!

⁹ Айыы Тойон, Эн бүтүн сир үрдүнэн тураҕын; Эн бары таҥаралартан үрдүккүн.

¹⁰ Айыы Тойону таптааччылар, куһаҕаны абааһы көрүҥ; Кини сибэтиэй дьонун олоҕун араҥаччылыыр, кинилэри хара дьайдаахтар илиилэриттэн быыһыыр.

¹¹ Кырдьыгы тутуһааччыга сырдык сыдьаайар, көнө сүрэхтээхтэргэ үөрүү үөскүүр.

¹² Айыы Тойонтон үөрүҥ, кырдьыктаахтар, махтаныҥ Кини сибэтиэй аатыгар!