Саалтыр 94 - Сибэтиэй Биибилийэ кинигэлэрэ

¹ Кэлиҥ, Айыы Тойоҥҥо ырыата ыллыаҕыҥ; быыһабыллаах очуос хайабытын үөрэ-көтө айхаллыаҕыҥ!

² Махтал тыллаах кэлэммит, Кини иннигэр туруоҕуҥ, үөрүүлээх ырыанан Кинини уруйдуоҕуҥ!

³ Айыы Тойон – улуу Таҥара, бары таҥаралар үрдүлэринэн турар сүдү Ыраахтааҕы.

⁴ Кини илиитигэр бааллар сир түгэхтэрэ, хайалар чыпчааллара эмиэ – Киниэннэрэ.

⁵ Муора – Киниэнэ: муораны Кини айбыта, кураанах сири эмиэ Кини оҥорбута.

⁶ Кэлиҥ, сүгүрүйүөҕүҥ, атаҕар үҥүөҕүҥ, биһигини айбыт Айыы Тойон иннигэр сөһүргэстиэҕиҥ!

⁷ Кини – биһиги Таҥарабыт, биһиги – Кини көрөр-истэр норуотунабыт, Кини маныыр бараанын үөрүнэбит. Оо, арай бүгүн эһиги Кини саҥатын истэргит эбитэ буоллар!

⁸ «Ол күн Мериваҕа, Масса кураайы дуолугар курдук, эһиги аны дьирээлэһимэҥ.

⁹ Онно өбүгэлэргит Миигин үтэн-анньан көрөллөрө, бары дьайыыбын көрө сылдьан, Миигин тургуталлара.

¹⁰ Түөрт уон сыл ол көлүөнэттэн Мин аҕынньым төллөрө, ол иһин эппитим: „Бу муна-тэнэ сылдьар норуот, кинилэр Мин суолбун билиэхтэрин баҕарбаттар“.

¹¹ Ол иһин абаран-сатаран андаҕайбытым: „Кинилэр Мин уоскулаҥнаах дойдубар киириэхтэрэ суоҕа!“»