Саалтыр 93 - Сибэтиэй Биибилийэ кинигэлэрэ

¹ Иэстэбил Таҥарата, Айыы Тойон, иэстэбил Таҥарата, Бэйэҕин көрдөр!

² Туран, сир Судьуйата, улуутумсуктары дьаныйтаа!

³ Төһөөҥҥө диэри нэгэйдэр, Айыы Тойон, төһөөҥҥө диэри нэгэйдэр өрөгөйдүүллэр?

⁴ Баламат тыллары суккуйаллар; куһаҕаны оҥорооччулар бары улуутумсуйаллар.

⁵ Эн норуоккун күөмчүлүүллэр, Айыы Тойон, Эн бас билэр дьоҥҥун баттыыллар-үктүүллэр.

⁶ Огдообону, кэлии дьону өлөртүүллэр, тулаайахтары өһөртүүллэр.

⁷ «Айыы Тойон көрүө суоҕа, Иаков Таҥарата билиэ суоҕа», – дииллэр.

⁸ Оо, өйдөөҥ эһиги, дьон толкуйа суоҕа; ньүдьү-балайдар, хаһан эһиги өйдөнөҕүт?

⁹ Кини, кулгааҕы олордубут, истиэ суоҕа дуо? Кини, хараҕы оҥорбут, көрүө суоҕа дуо?

¹⁰ Кини, норуоттары өйдөтөөччү, киһи аймахха билиини биэрээччи, ама дьарыйыа суоҕа дуо?

¹¹ Айыы Тойон киһи санаатын билэр, билэр кини санаата тыал курдугун.

¹² Дьоллоох даҕаны, Айыы Тойон, Эн көннөрөр, Сокуоҥҥар үөрэтэр киһиҥ!

¹³ Хара дьайдаахтар ииннэрэ хаһыллыар диэри, Эн киниэхэ ыарахан кэмҥэ уоскулаҥы биэрэҕин.

¹⁴ Айыы Тойон норуотун киэр анньыа суоҕа, Бэйэтин бас билиитин хаалларыа суоҕа;

¹⁵ көнө дьүүл кырдьыктаах дьоҥҥо төннүөҕэ, көнө сүрэхтээх барыта кырдьык суолунан барыаҕа.

¹⁶ Ким мин туспар хара дьайдаахтары утары охсуһуоҕай? Ким мин туспар кэрээнэ суохтары утары туруоҕай?

¹⁷ Айыы Тойон миэхэ көмөлөспөтө эбитэ буоллар, мин дууһам чуумпу дойдуга аттаммыта ыраатыа этэ.

¹⁸ Айыы Тойон, халтарыйан эрэбин диэм эрэ кэрэх, Эн бигэ тапталыҥ миигин өйүүргэ тиэтэйэр.

¹⁹ Сүрэҕим муҥа-таҥа элбээтэҕинэ, Эн, дууһабын уоскутан, миигин үөрдэҕин.

²⁰ Хара дьайыҥнаах судьуйалар, сирэйдэрин сокуонунан саптан, Эйигин биир куомуннаах оҥостуохтара дуо?

²¹ Көнө киһини утары күргүөмүнэн тураннар, кинилэр буруйа суоҕу өлөргө уураллар.

²² Ол эрэн, Айыы Тойон – мин бигэ кириэппэһим, Айыы Таҥарам – мин хорҕойор очуоһум.

²³ Кэрээнэ суох дьайыыларын Кини бэйэлэригэр эргитиэҕэ, нэгэй быһыыларын иһин, бэйэлэрин эһиэҕэ, Айыы Тойон Таҥарабыт кинилэри имири эһиэҕэ.