Саалтыр 87 - Сибэтиэй Биибилийэ кинигэлэрэ

1 Ырыа. Корей уолаттарын псаломнара. Хуор салайааччытыгар. Духовой инструмент доҕуһуолунан. Еман

¹ Ырыа. Корей уолаттарын псаломнара. Хуор салайааччытыгар. Духовой инструмент доҕуһуолунан. Еман Езрахит үөрэтиитэ.

Езрахит үөрэтиитэ.

² Айыы Тойон Таҥара, Быыһааччым миэнэ, Эйигин ыҥырабын мин түүннэри-күннэри.

³ Мин үҥэрим Эйиэхэ тиийиэхтин, иһит мин энэлийэр саҥабын.

⁴ Эрэй-муҥ дууһабын иэдэтэн, үтүгэн түгэҕэр түһэрим бу кэллэ.

⁵ Ииҥҥэ түһээччилэр ахсааннарыгар киирсэммин, мин хантан да көмө кэлбэт киһитэ буоллум;

⁶ өлбүттэр ортолоругар быраҕыллыбыт киһи курдукпун, өлөрүллэн ииҥҥэ сытааччылар кэриэтэбин, – Эн кинилэри аны санаабаккын, көмөлөһөр илиигин кинилэргэ утары ууммаккын.

⁷ Эн миигин дириҥ иин түгэҕэр, им балай аҥхайга түһэрдиҥ.

⁸ Эн уоруҥ-кылыныҥ миэхэ суоһаата, Эн бары долгуҥҥун мин үрдүбүнэн ыыттыҥ. Села

⁹ Билэр дьоммун барытын киэр тэйиттиҥ, кинилэри миигиттэн сиргэнэр оҥордуҥ; миигин хам хатаатылар, аны мантан тахсар кыаҕым суох;

¹⁰ сору-муҥу көрөммүн, хараҕым болоордо. Хас күн аайы, Айыы Тойон, Эйигин ыҥырабын, икки илиибин Эйиэхэ өрө уунабын.

¹¹ Ама, өлбүттэргэ анаан Эн дьиктини оҥоруоҥ дуо? Биитэр күлүктэр, Эйигин айхаллаары, туруохтара дуу? Села

¹² Иин иһигэр иһитиннэриэхтэрэ дуо Эн бигэ тапталгын, биитэр анараа дойдуга – Эн кырдьыккын?

¹³ Им балайга көрүөхтэрэ дуо Эн оҥорор дьиктилэргин, умнуллуу дойдутугар – Эн абыраллаах көмөҕүн?

¹⁴ Оттон мин Эйигин ыҥырабын, Айыы Тойон; мин үҥэрим Эйиэхэ тыҥ хатыыта тиийиэҕэ.

¹⁵ Айыы Тойон, тоҕо Эн миигин төттөрү анньаҕын? Тоҕо миигиттэн киэр хайыһаҕын?

¹⁶ Эдэр сааспыттан мин эрэйи көрөбүн, өлө сыһабын, Эн миигин ыардык дьарыйаргыттан сылбам быһынна.

¹⁷ Мин үрдүбүнэн ааста Эн уоҕуҥ-кылыныҥ барыта, миигин Эн суоһуҥ-суодалыҥ самнарда.

¹⁸ Хас күн аайы халаан уута буолан миигин хаайаллар, бары өттүбүттэн күргүөмүнэн ыгаллар.

¹⁹ Эн миигиттэн доҕорбун, чугас киһибин тэйиттиҥ, аргыстарым бука бары им балайга сүттүлэр.