Саалтыр 83 - Сибэтиэй Биибилийэ кинигэлэрэ

¹ Хуор салайааччытыгар. Геф куорат инструменынан доҕуһуолунан. Корей уолаттарын псалома.

² Ахтылҕаннаах да буоллаҕа Эн олорор сириҥ, Аанньал сэриитин Айыы Тойоно!

³ Айыы Тойон тиэргэнигэр тардыһан, олус да дууһам туорхаһыйар; сүрэҕим үөрэн, бүтүн бэйэм өрө көтөҕүллэн, мин тыыннаах Таҥараҕа ырыа ыллыыбын.

⁴ Аанньал сэриитин Айыы Тойоно, Ыраахтааҕым миэнэ, Таҥарам! Бэл чыычаах көй дьиэтин Эн сиэртибэнньигиҥ аттыгар булунар, хараҥаччы эмиэ, оҕолорун угаары, онтон чугас уйаланар.

⁵ Дьоллоохтор даҕаны – Эн Дьиэҕэр олорооччулар! Кинилэр куруутун Эйигин уруйдаан ыллыыллар. Села

⁶ Дьоллоохтор даҕаны – Эйигиттэн күүс-уох сомсооччулар, сүрэхтэрин ыллыктара Эйиэхэ салаллааччылар!

⁷ Кутурҕан хочотунан да иһэннэр, кинилэр онно дьүүктэлэри арыйаллар, күһүҥҥү ардах ол сиргэ алгыһы курулаччы кутар.

⁸ Кинилэр күүһүрдэр күүһүрэн иһэллэр; Сиоҥҥа таҥаралар Таҥаралара кинилэргэ көстүөҕэ.

⁹ Айыы Тойон, Аанньал сэриитин Таҥарата! Иһит мин үҥэрбин, болҕой, Иаков Таҥарата! Села

¹⁰ Көр, Айыы Таҥара, биһиги куйахпытын, көр-иһит Бэйэҥ туруорбут ыраахтааҕыгын.

¹¹ Хайа эрэ сиргэ тыһыынча күн буолуохтааҕар, Эн тиэргэҥҥэр биир күн буолбут быдан ордук. Хара дьай ордууламмыт уораҕайыгар олоруохтааҕар, Таҥара Дьиэтин боруогар турбутум миэхэ быдан ордук.

¹² Айыы Тойон Таҥара – күн икки куйах икки; Айыы Тойон илгэлээх үтүөнү биэрэр, албан аакка тиксэрэр; Кини көнө суоллаахтары ханнык да үтүөттэн матарбат.

¹³ Аанньал сэриитин Айыы Тойоно, Эйиэхэ эрэнээччилэр дьоллоохтор.