Саалтыр 82 - Сибэтиэй Биибилийэ кинигэлэрэ

¹ Ырыа. Асаф псалома.

² Айыы Таҥара, саҥата суох буолума; хардарбакка хаалыма, Айыы Таҥара, уоскуйан уостума!

³ Көр, ол өстөөхтөрүҥ хайдах өргөйбүттэрин, Эйигин абааһы көрөөччүлэр төбөлөрүн өндөппүттэрин.

⁴ Эн норуоккун утары уодаһыннаахтык куомуннаһаллар; Эн араҥаччылыыр дьоҥҥун утары куомсуктаһаллар.

⁵ «Бараммыт, норуот аатыттан аһарыаҕыҥ, – дэһэллэр. – Израиль аата аны хаһан да ахтыллыбатын!»

⁶ Биир санаанан киксэннэр, Эйигин утары сөбүлэһии түһэрсибиттэр:

⁷ Едом норуота, Измаиль дьоно, Моав уонна агаряннар,

⁸ Гевал, Аммон уонна Амалик, Филистина уонна Тир олохтоохторо;

⁹ Ассирия эмиэ, кинилэргэ холбоһон, Лот уолаттарын тутаах күүстэринэн буолбут. Села

¹⁰ Айыы Таҥара, Эн Мадиам дьонугар уонна Сисаралаах Иавиҥҥа Киссон үрүйэтин үрдүгэр хайдах сыһыаннаспыккыный да, баларга эмиэ соннук сыһыаннас;

¹¹ олор, Аендорга сууһарыллан, сир уоҕурдуута буолбуттара.

¹² Эн балар кинээстэригэр, Оривка уонна Зивка курдук, баһылыктарыгар, Зевейдээх Салмаҥҥа курдук сыһыаннас;

¹³ олор эмиэ тыыннаахтарыгар: «Баран, Таҥара сирин-уотун былдьааммыт, бэйэбит бас билиэҕиҥ», – дииллэрэ.

¹⁴ Айыы Таҥарам, Эн кинилэри буор холорук оҥортоо, соломо гынан, тыалга ыһаттаа.

¹⁵ Уот ойууру сииринии, төлөн хайаны хаарыйарыныы,

¹⁶ буркуҥҥунан кинилэри сойуолаа, холоруккунан уолуталаа.

¹⁷ Эн ааккын билинэллэрин туһугар, Айыы Тойон, кинилэри сир-буор сирэйдээ.

¹⁸ Саакка баран, үйэлэр тухары кутталтан көммөтүннэр, ааттара-суоллара баранан өллүннэр.

¹⁹ Биллиннэр кинилэр: Эн эрэ бааргын Айыы Тойон диэн ааттаах, бүтүн сир үрдүнэн турар Үрдүктэн Үрдүк.