Саалтыр 80 - Сибэтиэй Биибилийэ кинигэлэрэ

¹ Хуор салайааччытыгар. Геф куорат инструменын доҕуһуолунан. Асаф псалома.

² Үөрүүлээх ырыаны ыллааҥ Таҥараҕа, биһиги күүспүтүгэр; уруй-айхал этиҥ Иаков Таҥаратыгар.

³ Ырыаҕытын саҕалааҥ, тимпаҥҥытын охсуолааҥ, кэрэ дорҕоонноох лираҕа уонна арфаҕа оонньооҥ;

⁴ турбаҕытын үрүҥ саҥа ый тахсыыта, ый туолуута, биһиги дьоро күммүтүгэр;

⁵ бу Израильга анаммыт сокуон, Иаков Таҥаратын ыйааҕа.

⁶ Таҥара маны, Иосифка анаан, кини Египеттэн тахсыбытын туоһулаан уураахтаабыта. Мин урут билбэт куоласпын иһиттим:

⁷ «Эн санныгыттан Мин ыар сүгэһэри түһэрбитим, Эн илиигин тымтайтан босхолообутум.

⁸ Үтүргэҥҥэ түбэһэн Миигин ыҥырбыккар, Мин эйигин өрүһүйэн ылбытым; этиҥнээх былыт иһиттэн эйиэхэ хардарбытым, Мерива уутун таһыгар эйигин тургуппутум. Села

⁹ Иһит эрэ, норуотум, Мин эйигин сэрэтэрбин; оо, Израиль, арай эн Миигин истэриҥ эбитэ буоллар!

¹⁰ Суох буолуохтун эйиэхэ атын таҥара, сүгүрүйүмэ туора дойду таҥаратыгар.

¹¹ Мин эйигин Египет сириттэн таһаарбыт Айыы Тойон Таҥараҥ буолабын. Айаххын ат – Мин эйиэхэ толору ас уган биэриэм.

¹² Ол эрэн норуотум Миигин истибэтэҕэ, Израиль Миэхэ бас бэриммэтэҕэ.

¹³ Онон, баҕарбыттарынан сырыттыннар диэн, Мин кинилэри өһөс сүрэхтэрин көҥүлүнэн ыыппытым.

¹⁴ Оо, арай онно норуотум Миигин истэн, Израиль Мин суолбунан барбыт буоллун!

¹⁵ Түргэнник да оччоҕо кини өстөөхтөрүн сыһытыам этэ, кинини күөмчүлээччилэри уодьуганныы тардыам этэ!

¹⁶ Оччоҕо Айыы Тойону абааһы көрөөччүлэр кинилэргэ илин-кэлин түһэр буолуо этилэр; норуотум соргулаах олоҕо хаһан да огдолуйуо суоҕа этэ.

¹⁷ Мин кинилэри бастыҥ сэлиэһинэй бурдугунан аһатыам, очуос хайа мүөтүнэн дуоһутуом этэ».