Саалтыр 8 - Сибэтиэй Биибилийэ кинигэлэрэ

¹ Хуор салайааччытыгар. Геф куорат инструменын доҕуһуолунан. Давид псалома.

² Айыы Тойон, биһиги Айыы Тойоммут, хайдах курдук сүдүнүй Эн аатыҥ бүтүн сир үрдүнэн! Эн кэрэмэн килбиэҥҥин халлааннар үрдүлэринэн тэниттиҥ.

³ Эн өстөөхтөрүҥ тустарыттан – өһүөннээҕи, өһөгөйдөөҕү өһөрөөрү, – кыра оҕолор, эмиийдээх оҕолор уостарынан айхал тылларын Бэйэҕэр этиттиҥ.

⁴ Эн уран тарбаҕыҥ оҥоһуктарын, халлааннаргын, анаардахпына, Эн оннун булларбыт ыйгын, сулустаргын одуулаатахпына, мин бэркиһии да саныыбын:

⁵ кимий-тугуй киһи диэн, тоҕо Эн кинини өйдүү сылдьаҕын, кимнээҕий ол дьон диэн, тоҕо Эн кинилэргэ кыһаллаҕын?

⁶ Бэрт кыранан Эн киһини Аанньалга тиэрпэтиҥ: кэрэмэн килбиэни, үрдүк чиэһи киниэхэ мэнньиэстии кэтэртиҥ,

⁷ айбытыҥ барытын үрдүнэн кинини туруордуҥ, баары барытын кини атаҕын анныгар уурдуҥ:

⁸ барааннары-оҕустары барыларын, хонуу кыылын-сүөлүн,

⁹ халлаан көтөрүн, байҕал балыгын, муоранан суолланары барытын.

¹⁰ Айыы Тойон, биһиги Айыы Тойоммут, хайдах курдук сүдүнүй Эн аатыҥ бүтүн сир үрдүнэн!