Саалтыр 77 - Сибэтиэй Биибилийэ кинигэлэрэ

1 Асаф үөрэтиитэ.

¹ Асаф үөрэтиитэ. Бар дьонум, өйдөөн истиҥ мин үөрэтэрбин, болҕойуҥ амалыйар аман өспүн.

² Өс домохторун мин эһиэхэ сэһэргиэм, былыргы кистэлэҥнэри иһитиннэриэм.

³ Биһиги тугу истибиппитин-билбиппитин, аҕаларбыт биһиэхэ кэпсээбиттэрин

⁴ кистиэхпит суоҕа кинилэр удьуордарыттан; кэлэр көлүөнэлэргэ иһитиннэриэхпит Айыы Тойон килбиэннээх дьайыыларын, Кини күүһүн-уоҕун, оҥорбут дьиктилэрин.

⁵ Иаковка анаан, Кини уураах таһаарбыта, Израильга Сокуон олохтообута, уонна, оҕолоргутугар үөрэтиҥ диэн, кэс тылын өбүгэлэрбитигэр эппитэ;

⁶ ону барытын кэлэр көлүөнэлэр, кэнэҕэс төрүөхтээх оҕолор билэннэр, бэйэлэрин тустаах кэмнэригэр кэнчээри ыччаттарыгар кэпсиэхтээхтэрэ.

⁷ Оччоҕо кинилэр Айыы Таҥараҕа эрэниэхтээхтэрэ, Таҥара дьайыыларын умнубакка, Кини кэриэстэрин тутуһуохтаахтара;

⁸ оччоҕо өсөһөн өрө турар адьынаттаах, бигэтэ суох сүрэхтээх өбүгэлэрин – Таҥараҕа бэриниитэ суох көлүөнэ курдук аны хаһан да буолуо суохтаахтара.

⁹ Ох саанан сэбилэммит Ефрем уолаттара охсуһуу күнүгэр чугуйбуттара;

¹⁰ Таҥара кэс тылын тутуспатахтара, Сокуонун толорортон аккаастаммыттара;

¹¹ Кини оҥорбут дьайыыларын, көрдөрбүт дьиктилэрин умнубуттара.

¹² Оттон Таҥара кинилэр өбүгэлэрэ көрөллөрүгэр, Египет сиригэр, Цоан толоонугар эҥин дьиктини оҥороро.

¹³ Кини, муораны икки аҥыы хайытан, норуотун туораппыта, ууну эркиннии өрө туруорбута.

¹⁴ Күнүһүн былытынан кинилэри сирдиирэ, түүнү быһа кинилэргэ уот сырдыгын түһэрэрэ;

¹⁵ кураайы дуолга тааһы хайа охсон, улуу далайтан ууну кутардыы, утахтарын ханнарара;

¹⁶ очуос хайаттан ууну үрүйэлии сүүрдэрэ, дохсун ууну өрүстүү күрүлэтэрэ.

¹⁷ Оттон кинилэр син биир Кинини утары аньыыны оҥороллоро, кураайы дуолга сылдьан, Үрдүктэн Үрдүккэ утарылаһаллара.

¹⁸ Соруйан Таҥара тулуурун тургутан, сөбүлүүр астарын-үөллэрин ирдииллэрэ.

¹⁹ Таҥараны утары тыллаһан: «Иччитэх дуолга Таҥара биһиэхэ ас бэлэмниэ дуо? – дииллэрэ. –

²⁰ Төһө да тааһы хайа охсубутугар, уу суккуллубутун, үрүйэ сүүрдүбүтүн иһин, килиэби Кини биһиэхэ кыайан биэриэ дуо, норуотун этинэн хааччыйыа дуо?»

²¹ Айыы Тойон, итини истэ абаран, Иаковка уора-кылына уоттуу оргуйбута, Израильга кыыһырбыта сэтэрэн турбута –

²² кинилэр Таҥараны итэҕэйбэттэрин, Кини өрүһүлтэлээх күүһүгэр эрэммэттэрин иһин.

²³ Ол да үрдүнэн, үөһээҥҥи былыттары соруйан, халлааннар ааннарын тэлэччи аспыта,

²⁴ аһаатыннар диэн, мааннаны ардахтыы куппута – халлаан бурдугун кинилэргэ биэрбитэ.

²⁵ Онон киһи Аанньал килиэбин сиэбитэ; Таҥара кинилэргэ дэлэй аһы ыыппыта.

²⁶ Кини халлаантан илиҥҥи тыалы түһэрбитэ, соҕурууҥҥу тыалы үүрэн аҕалбыта.

²⁷ Быылы ыһар кэриэтэ үөһэттэн эти ыспыта – муора кумаҕын курдук элбэх көтөрү ыыппыта;

²⁸ ол көтөрдөрү кинилэр тохтообут сирдэригэр – отууларын тулатыгар түһэрбитэ.

²⁹ Онон тото-хана, дуоһуйа аһаабыттара – Таҥара тугу баҕарбыттарын биэрбитэ.

³⁰ Ол эрээри, эккэ баҕалара хана илигинэ, өссө да аһыы олордохторуна,

³¹ Таҥара, кинилэргэ уордайан, саамай күүстээхтэрин суох оҥорбута, Израиль эдэр уолаттарын умса уурбута.

³² Оттон кинилэр аньыыны оҥороллорун уураппатахтара, Кини дьикти дьайыыларын итэҕэйбэтэхтэрэ.

³³ Ол иһин Таҥара кинилэр күннэрин сүпсүккэ сүтэрэр, сылларын кутталга аһардар оҥорбута.

³⁴ Онтон, кинилэри өлөртөөн барбытыгар, дьэ Кинини көрдүүр буолбуттара; аньыыларын-буруйдарын кэмсинэн, Таҥараны ис сүрэхтэриттэн көрдөөбүттэрэ.

³⁵ Таҥара кинилэргэ халыҥ хахха буоларын, Үрдүктэн Үрдүк Таҥара кинилэри өрүһүйэн ыларын онно эрэ өйдөөбүттэрэ.

³⁶ Ол да үрдүнэн Кинини кытта албыннык кэпсэтэллэрэ, Киниэхэ сымыйаны этэллэрэ;

³⁷ бигэ санаата суох буоланнар, Кини кэс тылын кэһэллэрэ.

³⁸ Оттон аһыныгас Таҥара буруйдарын бырастыы гынара, кинилэри имири эспэт этэ; кыыһырартан элбэх төгүл туттунара, уорун-кылынын толору күөдьүппэт этэ.

³⁹ Кини өйдүүрэ кинилэр өлөр үйэлээхтэрин, төннүбэттии, ил гынан ааһар сиккиэр кэриэтэлэрин.

⁴⁰ Хаста кинилэр кураайы дуолга сылдьан, Киниэхэ утарыласпыттарай, иччитэх сиргэ сылдьан, Кинини хомоппуттарай!

⁴¹ Күнтэн күн Таҥараны тургуталлара, Израиль Сибэтиэйин атаҕастыыллара.

^42-43 Кинилэр Таҥара сүдү күүһүн – өстөөхтөн кинилэри өрүһүйбүт күнүгэр Египеккэ сөҕүмэр бэлиэлэри көрдөрбүтүн, Цоан толоонугар дьиктилэри оҥорбутун умнубуттара.

⁴⁴ Ол саҕана Кини, Египет дьоно иһэр уута суох буоллун диэн, дойдуларын өрүһүн барытын хааҥҥа кубулуппута.

⁴⁵ Кинилэри, үөн-көйүүр былытын аҕалан, тэһитэ кэйдэрбитэ, алдьатыылаах баҕалары ыытан үрэйтэрбитэ.

⁴⁶ Бурдуктарын үүнүүтүн түүлээх үөҥҥэ сиэппитэ, үлэлэрин түмүгүн саранчаҕа биэрбитэ.

⁴⁷ Виноградтарын тобураҕынан эспитэ, смоковницаларын хаһыҥҥа мэлиппитэ.

⁴⁸ Сүөһүлэрин толонунан тоҕута сыспыта, үөрдэрин чаҕылҕанынан дапсыйбыта.

⁴⁹ Кыыһырбыт уоҕун-төлөнүн, бары абатын-сататын, уорун-кылынын түһэрэн, кинилэргэ аан алдьархайы – өлөрөр-өһөрөр үтүмэн аанньалы ыыппыта.

⁵⁰ Онно Кини уордайартан туттуна барбатаҕа, олохторун аны харыһыйбатаҕа – өлүүлээх сутулу кинилэргэ туруорбута.

⁵¹ Египет бары ыалларын бастакы уолаттарын, Хам отууларын бастыҥ күүһүн, өлөртөөбүтэ.

⁵² Дьэ онтон маныыһыт курдук, норуотун илдьэ барбыта, кураайы дуол устун бараан үөрүнүү сирдээбитэ.

⁵³ Куттала суох сиринэн илдьэ иһэр буолан, кинилэр туохтан да кыраҕыйбат этилэр; өстөөхтөрүн муора уута саба халыйбыта.

⁵⁴ Кини норуотун сибэтиэй томторугар, уҥа илиитинэн ылбыт хайатыгар, аҕалбыта.

⁵⁵ Омуктары кинилэртэн үүртэлээн баран, олор отууларыгар Израиль аҕа уустарын олохтообута; барыларыгар өлбүгэ сир быһаттаан биэрбитэ.

⁵⁶ Ол да үрдүнэн Үрдүктэн Үрдүк Таҥараны тургуталлара, уураахтарын тутуспакка, Киниэхэ утарылаһаллара.

⁵⁷ Өбүгэлэрин курдук, кинилэр эмиэ Таҥараттан тэйэн, Киниэхэ бэриниитэ суох этилэр, алдьаммыт ох саа курдук, эрэбилэ суохтара.

⁵⁸ Сымыйа таҥараларга үҥэр үрдэллэринэн Айыы Таҥараны хомотоллоро, эмэгэккэ сүгүрүйэн, Кинини күнүүлэтэллэрэ.

⁵⁹ Таҥара, барытын истэн, улаханнык уордайбыта: Кини Израильтан букатын аккаастаммыта.

⁶⁰ Онон Силомҥа баар олоҕун, дьон ортотугар олорбут Отуутун, быраҕан барбыта;

⁶¹ ковчегын билиэҥҥэ туттарбыта – албан аатын өстөөх илиитигэр туран биэрбитэ.

⁶² Норуотун кылыс уһугар туруортарбыта, ол курдук Кини Бэйэтин дьонугар уордайбыта.

⁶³ Онон уолаттарын уот мэҥиэстибитэ, кыргыттарыгар уруу ырыата ылламматаҕа;

⁶⁴ аҕабыыттара кылыстан охтубуттара, огдооболоро кинилэри аһыйан ытыыр кыахтара суоҕа.

⁶⁵ Дьэ онуоха Айыы Тойон уутуттан уһуктардыы, уохтаах арыгыттан өрө көтөҕүллүбүт бухатыырдыы,

⁶⁶ кинилэр өстөөхтөрүн киэр үүртэлээбитэ, аны көммөттөрүн курдук, сир сирэйдээбитэ.

⁶⁷ Кини Иосиф удьуоруттан аны аккаастаммыта, Ефрем аҕатын ууһун талбатаҕа,

⁶⁸ ол оннугар Иуда аҕатын ууһун, таптыыр Сионун хайатын, талан ылбыта.

⁶⁹ Онно үрдүк халлааннар курдук сүдү, үйэлэргэ олохтообут сирин курдук бигэ сибэтиэй Дьиэни Бэйэтигэр тэриммитэ.

⁷⁰ Онтон кулутун Давиды талан ылан, бараанын далыттан аҕалтарбыта;

⁷¹ эмньик барааннарын көрө сырыттаҕына ылларан, Бэйэтин норуотун Иаковы, бас билэр Израилын, көрөр-истэр маныыһыт оҥорбута.

⁷² Давид, ыраас сүрэҕиттэн кыһаллан, сатабыллаах илиитинэн кинилэри салайара.